Drejtuesit e dy partive më të mëdha në vend, ai i mazhorancës Edi Rama dhe ai i opozitës Lulzim Basha përmbyllën takimin e dytë mes tyre në Pallatin e Kongreseve ku u detajuan pikat e marrëveshjes së arritur pas më shumë se 3 muajsh krize politike.
Edhe pse nuk ka një dalje zyrtare mësohet se data e zgjedhjeve mund të jetë 25 qershori, ndryshe nga sa u përfol më herët mes datës 9-16 korrik.
Kjo krizë e cila nuk ka kaluar pa efekte edhe te sipërmarrja private, e cila duket se ka ngrirë planet e investimit.
Edhe për institucionet ndërkombëtare financiare zgjidhja e kësaj krize shihej si domosdoshmëri për mbajtjen e ritmeve të rritjes së ekonomisë.
Palët ranë dakord në 20 pika konkrete.
- Një zëvendëskryeministër i përkohshëm (person jopolitik), i propozuar nga opozita;
- Caktimi konsensual i katër ministrave (ekspertë teknikw të respektuar) me qëllim parandalimin e keqpërdorimit të administratës publike dhe ndikimeve në procesin zgjedhor;
- Kryetari i Komisionit Qendror të Zgjedhjeve i zgjedhur nga opozita;
- Avokati i Popullit i zgjedhur nga opozita;
- Ndryshimet në Kodin Zgjedhor, tw cilat do tw garantojnë standardet më të larta të nevojshme për zgjedhje të lira dhe të ndershme;
- Përzgjedhja konsensuale e një kandidati të respektuar për President, i pranueshëm për qeverinë dhe për opozitën. (Nuk është më e mundur pasi Presidenti tashmë është zgjedhur në Parlament vetëm me votat e shumicës qeverisëse)
- Krijimi i një ministrie të re speciale, të drejtuar nga një figurë politike e zgjedhur nga opozita, e cila do të merret ekskluzivisht me zbatimin e çdo hapi që duhet të merret, në mënyrë që në të ardhmen shqiptarët, të kenë mundësinë të votojnë përmes një sistemi elektronik.
- Ndryshime në ligjin për transparencën e financimit të partive politike.
- Ndryshime në Kodin Penal, dënime më të ashpra për blerjen e votës, fotografimin e fletës së votimit dhe krime të tjera lidhur me zgjedhjet.
- Burime shtesë për KQZ-në për të monitoruar financimin e zgjedhjeve dhe transparencën e shpenzimeve, duke përfshirë auditues ndërkombëtarë për financimin e fushatës së partive politike dhe ndryshime të mundshme në ligjet përkatëse.
- Emërimi i ekspertëve teknikë si zëvendësministra në ministritë që mund të ndikojnë në procesin zgjedhor, të ndihmuar nga partnerët ndërkombëtarë, të cilët do të monitorojnë çdo çështje që ka të bëjë me procesin zgjedhor.
- Caktimi i përkohshëm i personave të respektuar, të cilët nuk përfaqësojnë parti politike, si zyrtarë të lartë të Ministrisë së Arsimit dhe Policisë dhe monitorim i fortë ndërkombëtar për të parandaluar abuzimet e mundshme të administratës publike.
- Strukturë e veçantë në Policinë e Shtetit për të monitoruar problemet e lidhura me zgjedhjet, të përbërë nga zëvendësdrejtori i Përgjithshëm dhe 12 zëvendësdrejtorë rajonalë, të ndihmuar nga PAMECA dhe ICITAP.
- Shtyrja e zgjedhjeve deri më 16 korrik (Ky propozim daton që nga 25 prilli, pra 3 javë para se propozimi i integruar ju prezantua palëve!)
- Droga:
- Komuniteti ndërkombëtar do të monitorojë çrrënjosjen e kanabisit.
- Pjesëmarrja e opozitës në Task Forcën Kombëtare të luftës kundër Drogës.
- Dekriminalizimi (Largimi dhe parandalimi i kriminelëve nga mbajtja ose kërkimi i posteve publike)
- Partitë politike angazhohen publikisht për ekzaminimin e fortë të kandidatëve në listat partiake dhe të koalicionit.
- KQZ ekzaminon kandidatët nëpërmjet personelit shtesë, me mbështetje ndërkombëtare (të plotësuara në përputhje me Ligjin e Dekriminalizimit dhe Kodin Zgjedhor)
- Angazhimi i SHBA dhe partnerëve të tjerë për t’u dhënë Kryetarëve të partive politike rekomandime të mbështetura mbi të dhënat penale të kandidatëve.
- Mbështetje ndërkombëtare për forcimin e monitorimit të regjistrit të zgjedhësve.
- Mbështetje ndërkombëtare për KQZ-në për ngritjen e linjave telefonike të ndihmës, për vëzhgimin dhe shqyrtimin e ankesave mbi ligjin e shërbimit civil dhe blerjen e votës.
- Mbështetje ndërkombëtare për vëzhgimin e rolit të medias në zgjedhje dhe caktimin e segmenteve orare në media. Ndalimi i transmetimeve të videokasetave të partive politike të regjistruara më parë pa identifikim të qartë.
- Kthimi i Opozitës në Parlament, për formimin e Komisioneve të Vetting-ut.
Ky është artikull ekskluziv i Revistës Monitor, që gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”.
Artikulli mund të ripublikohet nga mediat e tjera vetëm duke cituar “Revista Monitor” shoqëruar me linkun e artikullit origjinal.