Destinacionet e reja te pushimeve

12/06/2011 00:00 0 komente

Shqiptaret po preferojne te eksplorojne destinacione te reja, por nuk do te heqin dore nga Turqia. Kriza ne disa rajone te ndryshme ka favorizuar turizmin ne Europe, edhe pse cmimet jane rritur. rMonitorr sjell nje guide, por edhe keshilla per prenotimet individuale
Nga Elona Bedalli

çfarë ishte “mollë e ndaluar”, tani nuk është më, të duhet vetëm një kuletë e mbushur dhe, sa hap e mbyll sytë, mund t’i bësh pushimet ku të dëshirosh. Zgjidhja është e juaja. Natyrisht që më parë duhet të zgjidhni disa detaje. A do t’i besoni eksperiencës së një profesionisti apo intuitës suajr
Nëse planifikoni pushime familjare, zgjidhja mund të jetë Turqia me resortet e saj “të gjitha në një”. Për sa i takon vendeve “të reja”, më intriguesja për shqiptarët eksplorues mbetet Spanja me Barcelonën, Ibizën dhe sigurisht Palma de Majorka. Në këtë rast përballesh me çmime të larta.
Natyrisht që jashtë vëmendjes nuk lihen dy shtetet fqinje, si Italia dhe Greqia. Nëse keni ndonjë të afërm, mund të kurseni ca për të bërë pushime, në të kundërt duhet të pranoni ofertat që agjencitë ju servirin.
Egjipti nuk ka kërkesën e dikurshme, por favorizohet nga çmimet më të ulëta në krahasim edhe me Turqinë. Agjencitë thonë se frika për t’iu drejtuar këtyre destinacioneve është më shumë psikologjike, pasi aty sezoni vazhdon shumë i qetë.

Pa viza, josh Europa
Ky sezon turistik dallohet për shumëllojshmërinë e destinacioneve të arritshme për shqiptarët, falë liberalizimit të vizave. Për agjencitë shqiptare nuk ka më kokëçarje në dyert e ambasadave me lista në dorë, ndaj dhe produktet që ofrojnë, mbartin larmishmëri. Sigurisht Europa është e këndshme, e kërkuar, pas kalimit të barrierave të vizave, por mbetet në standarde të larta të çmimeve për periudhën e verës.
Ilda Bushi, menaxhere turizmi në agjencinë “Union Travel”, thotë se liberalizimi i vizave ka dhënë efekte pozitive te klientët.
“Tani dhe ata janë në gjendje të programojnë pushimet e tyre në zonën ‘Shengen’, pasi më parë ju duhej të vendosnin në momentin e fundit, pas marrjes së vizës. Kjo, natyrisht që ndikonte në rritjen e çmimit të paketës”, thotë znj. Bushi.
Specialistët e agjencive turistike, edhe pse është ende herët për të bërë një parashikim se si do të jetë sezoni në pikun e tij, shprehen se është vënë re fluks i lartë i kërkesave për Europën.
Agim Mehmeti, menaxher i produktit pranë agjencisë “Vas Tour”, thotë se liberalizimi i vizave ka nxitur shtimin e fluturimeve “charter” në destinacione si Palma de Majorka në Spanjë, apo Kreta në Greqi. “Liberalizimi i vizave ka nxitur dëshirën për të shijuar destinacione të reja, më parë të pamundura për mbajtësit e pasaportave shqiptare”, thotë Etleva Fetahu, koordinatorja për turizmin e agjencisë “Globus Travel”.
Marselinda Kortoçi, drejtuese e agjencisë “Pasha Holiday”, thotë se drejt Europës bëhet fjalë kryesisht për udhëtime individuale apo thjesht blerje bileta avioni.
Sipas drejtueses së agjencisë “MTI Travel”, Jorida Martiro, tashmë ata mund të shesin çdo lloj destinacioni europian, pa pasur frikë nëse merren ose jo vizat. “Ka rritje të klientelës që kërkon këto destinacione, pasi mund të udhëtohet, pavarësisht nëse i kanë apo jo dokumentet që kërkoheshin nga ambasadat dhe, për më tepër, është eliminuar kostoja e vizës 35 euro, e cila nëse llogaritej për një familje, kishte më shumë kosto.

Përgjithmonë Turqia
Do të vazhdojë të mbetet destinacioni i preferuar i atyre shqiptarëve që kanë vendosur të shkojnë jashtë vendit për të kaluar disa ditë të këndshme. Oferta turke duket se iu përshtatet më së miri atyre shqiptarëve (kryesisht familjarë) që duan pushime komode, ku kursehet kohë dhe para. Sava Bardhi, drejtuesja e agjencisë “Sava Tours”, thotë se edhe në këtë sezon, Antalia mbetet më e preferuar. Sipas saj, Turqia është një destinacion i provuar prej vitesh tashmë nga shqiptarët. Sistemet e trajtimit me “all” ose “ultra all inclusive” e qetësojnë psikologjikisht klientin që, niset me idenë se çdo gjë e ka të paguar. Qershori është testimi se nuk ka reduktim të kërkesës drejt Turqisë dhe se ky destinacion ofron një raport të mirë të çmimit dhe cilësisë së akomodimit. Ilda Bushi, e agjencisë “Union Travel”, thotë se ata që zgjedhin të udhëtojnë jashtë janë të moshave të ndryshme. “‘Union Travel’, si çdo vit, i kushton rëndësi të veçantë pushimeve të verës, destinacionet kryesore që ofrohen në këtë sezon veror janë të shumta, por dallon Turqia me qytetet e saj bregdetare, të njohura tashmë nga shqiptarët, si Antalia, Kemeri, Side, Lara, Belek, Alania etj. Familjarët preferojnë kryesisht Turqinë, duke qenë se është një ndër vendet që ofron më shumë mundësi dhe shumëllojshmëri argëtimi, për çdo moshë. Periudha më e kërkuar vazhdon të jetë korriku, gushti dhe fillimi i shtatorit, koha kur pjesa më e madhe e shqiptarëve marrin lejet”, thotë znj. Bushi.
Përtej entuziazmit të planifikimit të pushimeve, ajo që tek e fundit ka më shumë rëndësi për këdo është çmimi. Lajmet nuk janë shumë pozitive, pasi sipas agjencive ato janë rritur me rreth 10% krahasuar me të njëjtin periudhë të vitit të kaluar.
Sipas drejtueses së agjencisë “Sava Tours”, Turqia, në muajin qershor është ofruar me një çmim që llogaritet në 280 euro për person me shtatë net qëndrimi, ndërsa pëson rritje për muajin korrik dhe gusht, paketa më e lirë llogaritet në 469 euro për person. “Në krahasim me një vit më parë është vënë re një rritje që mund të ketë ardhur si pasojë e parashikimeve dhe politikave të çmimit që po ndjekin vendet turistike, në këtë rast Turqia, dhe ka lidhje me preferencat e pushuesve në rajon për këtë destinacion. Megjithatë agjencia bën përpjekjet e saj që kjo të mos prekë klientin, duke ruajtur cilësinë e pushimeve të tij”, thotë përfaqësuesja e agjencisë “Globus Travel”.
Sipas drejtueses së agjencisë “Pasha Holiday”, çmimet në destinacionet e Europës dhe Turqisë kanë rritje krahasuar me një vit më parë. Në Antalia, kjo agjenci, në një hotel me pesë yje, për shtatë net, ofron çmime që variojnë nga 499 euro për person (për qershorin) deri në 599-699 euro për person, 7 net, për muajin korrik. Ajo thotë se pushuesi shqiptar që preferon të shkojë jashtë vendit vazhdon të ruajë të njëjtin mentalitet, atë të pushimeve me plazh e “all inclusive” dhe kryesisht në muajt korrik e gusht, që konsiderohen dhe piku ose sezoni i lartë.

Spanja, dashuria e re
Spanja është destinacioni që intrigon më shumë këtë verë. është pikante, e bukur, e nxehtë, por edhe më “calliente” për sa i përket çmimeve. Me gjithë lehtësimin e vizave, luksin për ta vizituar vazhdojnë ta ketë vetëm ajo kategori me të ardhura të mira financiare. “Spanja ka më shumë kërkesa nga moshat e reja. Dihet që Ibiza mbahet për jetën e saj të natës me club-et joshëse, Palma de Majorka gjithashtu, por nuk duhet harruar edhe bregdeti i Barcelonës, Lloret de Mar apo Costa Brava e duke vazhduar me Benidorm, që është një mrekulli. Për Palma de Majorkën, paketa më e lirë kushton 499 euro për person. Qëndrimet kryesisht janë 7 net”, thotë menaxheria e turizmit pranë “Union Travel”. Agjencia “Pasha Holiday” për Spanjën ofron paketa që për qëndrime në hotel me tre yje, në qershor llogaritet duke filluar nga 599 euro për person dhe në korrik nga 699 euro për person. Sipas menaxherit të produktit, pranë agjencisë “Vas Tour”, oferta për Spanjën për dy persona në hotele nga tre deri në pesë yje variojnë me çmime nga 1,200 në 5,300 euro.
Agjencive iu kanë ardhur në ndihmë edhe kompanitë ajrore që kanë shtuar destinacionet e fluturimeve. Kështu Barcelona ofrohet një herë në javë me fluturim direkt.

Egjipti, kriza ul çmimet
“çdo e mirë e ka një të keqe dhe çdo e keqe e ka një të mirë”, shprehja e famshme e Konfucit e ilustron më së miri atë çka po ndodh me Egjiptin si destinacion turistik. çmimet e paketave janë ulur ndjeshëm. Konfliktet politike që kaloi vendi pak kohë më parë shtuan frikën tek ata që e kishin menduar si një “strehë” të mundshme për të kaluar një javë a më shumë e kjo bëri që agjencitë ta ofrojnë me çmime konkurruese.
“Konflikti në Egjipt dhe Tunizi ka ndikuar psikologjikisht te një pjesë e klientelës, por realiteti është ndryshe. Situata në këto destinacione është shumë e qetë dhe sezoni turistik vazhdon normalisht. Këtë e tregon edhe fakti që ne si agjenci turistike dhe organizues të pushimeve e kemi zgjedhur ta ofrojmë si destinacion. Në rast të kundërt do të ishim të parët që nuk do të rrezikonim me emrin e seriozitetin”, thotë Marselinda Kortoçi, drejtuese e agjencisë “Pasha Holiday”. Sipas saj ka një kërkesë më të madhe për Sharm el Sheik, pasi ka çmime më të lira se destinacionet e tjera, duke qenë se është destinacion operativ gjatë gjithë vitit. Hotelet ofrojnë çmime më të lira se destinacionet e tjera që operojnë vetëm tre muajt e verës, për arsye të klimës. Për muajin qershor, në hotel me pesë yje, ky destinacion është ofruar në paketa deri edhe në 200 euro për person. Në muajin korrik, thotë drejtuesja e “Pasha Holiday”, çmimet nisin nga 499 euro për person, për qëndrime nga 10-11 net. Sipas përfaqësuesit të agjencisë “Vas Tour”, Agim Mehmeti, kriza në Egjipt e Tunizi ka sjellë mbushjen e destinacioneve të tjera si Antalya apo Spanja.
Sipas menaxheres së turizmit pranë “Union Travel”, Ilda Bushi, Sharm El Sheik do të vazhdojë të jetë një destinacion i kërkuar nga pushuesit shqiptarë. “Si çdo vit, ne vëmë në dispozicion të pushuesve charter. Magjia e detit të kuq të bën për vete”, thotë znj. Bushi. Sipas saj, konfliktet e ndodhura nuk kanë sjellë ndikime në uljen e kërkesave për të kaluar pushimet në Sharm El Sheik apo edhe në Tunizi. “Sezoni tashmë ka filluar dhe fluksi i pushuesve vazhdon të rritet në Sharm, duke qenë se është një destinacion që ka çmime më të lira se Turqia apo vendet bregdetare të zonës ‘Shengen’”, thotë ajo.

Edhe në Sardenjë, Sicili, Kretë, Halkidiki apo Rodos
Maqedonia dhe Mali i Zi, që zgjidheshin shpesh për të kaluar fundjavat, tani janë zëvendësuar me zgjedhje të reja drejt Greqisë, apo edhe Italisë. Bëhet fjalë kryesisht për udhëtime individuale ku shmanget ndërmjetësimi i agjencive, sepse dikush mund të ketë të afërmit apo miqtë e kështu një rrugë e dy punë. Megjithatë agjencitë kanë përgatitur gjithsesi ofertat e tyre. Sardenja, për shembull, ishulli i pushimeve të lakmuara dhe tejet i frekuentuar është një destinacion që propozohet. Natyrisht, thonë drejtuesit e agjencive, nuk mund të ofrohen paketa me hotele me 5 yje si në Antalia, por me 3 yje. Ata thonë se ky ishull është i përshtatshëm për të kaluar muajin e mjaltit, në qershor apo shtator edhe për familjarët, pasi çmimet në këtë periudhë ofrohen më të ulëta, 600 euro për person për një javë. Drejtuesit e agjencive thonë se Europa, si destinacion, ka një konceptim të ndryshëm nga Antalia, ku çdo gjë është e përfshirë dhe për rrjedhojë ka pak motiv për të dalë nga hoteli. Ndërsa me makinë personale apo të marrë me qira në Itali apo Greqi mund të shëtisësh kudo. Europa ofron shumë histori, objekte muzeore, koncerte artistike, argëtim dhe vlen për ata që pëlqejnë pushimet aktive dhe jo pasive siç ofron Turqia apo ishujt Maldive e Mauritius. Kështu arsyetojnë agjencitë teksa ofrojnë paketa joshëse për ishujt italianë apo ata grekë. “Ne ofrojmë paketa për destinacione në Spanjë, si Palma de Majorka, Barcelona, Costa Brava, në Greqi për ishuj si Halkidiki, Kretë, Rodos, në bregdetin e Jugut të Italisë, si Pulia, Bazilikata, Kalabria, Sicilia e Sardenja, por edhe në Kroaci e Mal të Zi. Këto rezervohen për aq kohë sa klientëve iu leverdis financiarisht, por zakonisht variojnë nga 7-14 net”, thotë Etleva Fetahu, e agjencisë “Globus”.
Jorida Martiro e agjencisë “MTI Travel” thotë se destinacionet europiane kryesore janë Greqia me Korfuzin dhe Kalkidhikinë dhe Kroaci. Paketat fillojnë nga 300 euro për person, për 7 net deri në 1,000 euro për person.
Sipas drejtues së agjencisë “Pasha Holiday”, qytetet bregdetare dalmate si dhe shumë ishuj të Kroacisë janë të frekuentuara, ndërsa propozon edhe destinacionet e largëta si Maldive, Tajlanda, Republika Domenikane, Meksika me kombinime të ndryshme dhe me kosto jo shumë të lartë. Sipas saj, një propozim tjetër interesant është edhe paketa kurative në Karlovy Vary pranë Pragës. Nga kjo agjenci, Kroacia vjen me çmime nga 299 euro për person në qershor, në 399 euro për person në muajin korrik. Një udhëtim në Maldive për person ju kushton 999 euro në muajin korrik, në Meksikë çmimi për person llogaritet në 1,499 euro për person, ndërsa në Tajlandë në 1,199 euro për person.
Duke iu referuar edhe fluturimeve ajrore, kompanitë kanë shtuar frekuencën gjatë javës. Athina llogarit fluturime çdo ditë të javës dhe nga pothuajse të gjitha kompanitë. Frekuencë të lartë fluturimesh nga Tirana kanë edhe qytetet si Bergamo, Stambolli, Firence, Piza, Roma, Torino, Verona etj.
 

Ndikimi nga situata politike

Drejtuesit e agjencive ndajnë mendime të ndryshme për ndikimin e situatës politike në vend te planifikimi i pushimeve. Ka nga ata që mendojnë se situata paszgjedhore nuk ka dhënë efekte negative, ndërsa të tjerë shprehen se gërshetimi edhe me vështirësitë ekonomike ka bërë që kërkesa për të udhëtuar jashtë të mos jetë e lartë. Drejtuesja e agjencisë “Pasha Holiday”, thotë se turizmi ka pësuar një “ngërç”, ku një pjesë e madhe e klientelës ka preferuar të shtyjë pushimet e tyre për më vonë ose të zgjedhin të mos udhëtojnë gjatë këtij viti. Ndërsa drejtuesja e agjencisë “MTI Travel”, thotë se ndikimi ishte më i madh në dy-tre muajt e parë të vitit, ndërsa periudha në vazhdim ka kërkesa për udhëtime.

Pse jo në një kroçierë

Një javë në det të hapur, duke i rënë Mesdheut mes për mes mbetet gjithmonë ide grishëse. Agjencitë e udhëtimit thonë se kroçierat kanë qenë të kërkuara për pranverën, në sezonin prill-maj, të nisura nga Italia apo Athina. Sipas Sava Bardhit, kroçierat janë një eksperiencë tërheqëse. Për një person, çmimi llogaritet nga 700–800 euro për një javë qëndrim. Ky udhëtim shikohet si interesat për moshat e vjetra apo edhe për çiftet me fëmijë. Udhëtimi më interesant për fëmijë në kroçierë është ai që propozohet nga norvegjezët “Jade”. është një program argëtues, për të cilin kujdeset një staf i specializuar, me lojëra për çdo moshë. Me shpirt aventurier mund të përshkohen vende si Kroacia dhe Greqia.
Pushime me një “klik”
Të planifikosh pushimet, në fakt nuk është edhe aq e thjeshtë, por mund të kthehet në një përvojë të tillë vetëm me një klikim. Quhet “booking” ose “prenotim on line”. Në faqen e internetit mund të gjesh gjithçka të ilustruar me foto, por kujdes sepse ajo që kërkohet është karta e kreditit. Mes një planifikimi individual dhe asaj me një agjenci udhëtimesh ka avantazhe dhe dizavantazhe. Të zgjedhësh përmes ekranit të ftohtë kompjuterit do të thotë t’i kursesh vetes kohë dhe bredhje sa andej-këndej nëpër agjenci. Pasi ke klikuar tek opsionet ajo që të kërkohet në fund, që rezervimi të konsiderohet i realizuar të duhet të fusësh numrin e kartës së kreditit. Një detaj shumë i rëndësishëm dhe ku duhet kujdes maksimal, sepse mund të gjendesh përballë një eksperience të hidhur. Sipas agjencive, shqiptarët kryesisht preferojnë që udhëtimet t’i rezervojnë me agjenci për t’i shmangur vetes ndodhi të pakëndshme, si gjetja në dhomë e një krevati marinar në vend të atij dopio, apo me pamje nga muri në vend të detit. Ndaj në çdo rast ata kanë përfshirë në faqet e tyre edhe mundësinë e “booking”.
“Mund të zgjedhësh në morinë e vendeve magjepsëse që të ofrohen, brenda dhe jashtë vendit dhe me çmimin, që i shkon më për shtat xhepit tënd vetëm me një klik”, thonë drejtuesit e agjencive. Ka edhe nga ata drejtues që janë pesimistë në përdorimin e “booking”. Ata thonë se numri i agjencive që e përfshin këtë shërbim është i ulët, pasi shqiptarët më së shumti preferojnë të jenë në agjenci, me specialisten përballë, të kryejnë çdo procedurë me shkrim dhe jo me “miun” e kompjuterit. Duan të bëjnë dhe një pazar të fundit për një ulje çmimi, e këtë kompjuteri nuk ta ofron. Një proces në parim i lehtë, por që rezulton të jetë tejet i komplikuar për Shqipërinë.
Për këto, por edhe për arsye të tjera, si përdorimi i internetit apo i kartave të kreditit, numri më i madh i klientëve, që bëjnë “booking” në agjencitë turistike janë shqiptarë që jetojnë jashtë vendit ose të huajt.
E duke folur për internetin, nuk mund të anashkalojmë edhe këtë mënyrë si një medium që gjithnjë e më shumë po tregon fuqinë e tij. Për të joshur sa më shumë klientë, por edhe për të kursyer ca para për marketingun, agjencitë shqiptare kanë nisur të shtojnë numrin e kanaleve përcjellëse të mesazheve. Të gjithëve na ka ndodhur që në postën elektronike të na vijnë oferta për pushime, që i referohen një apo më shumë destinacioneve. E njëjta gjë ndodh edhe me rrjetin social “Facebook”, që propozon për përdoruesit (falë reklamës së paguar) propozimet për “like”.

Të prenotosh në minutë të fundit

Për shqiptarët, ky është një ves. Shpesh ata trokasin në dyert e agjencive në minutën e fundit, duke kërkuar një ofertë të mirë. Por, në vendet e huaja është një zgjidhje vërtet interesante dhe nuk ka të bëjë aspak me të shkuarit me vonesë tek agjencia. Formulat “last second” e “last minute” (sekonda dhe minuta e fundit), tregojnë paketa pushimesh ose udhëtimi të favorshme, nga pikëpamja ekonomike. Shprehja “last second” identifikon një kategori udhëtimesh të shituara nga tur operatorët ose nga kompanitë ajrore në momentin e fundit me çmim gati të përgjysmuar, për të shmangur rrezikun e të mbeturit e pashitur. Aspekti më interesant është se mund t’i blini me ulje që variojnë nga 10 deri në 50%, me të gjitha karakteristikat që gjenden në katalog, si i njëjti hotel, e njëjta panoramë etj.
Por cila është diferenca mes udhëtimeve “last second” dhe atyre “last minute”r Në të dy rastet kemi të bëjmë me shërbime të shituara pak ditë para nisjes, por ajo që bën diferencën është data e nisjes. Udhëtimet “last minute” propozohen rreth 30 ditë përpara nisjes, ndërsa ato “last second” rreth dy janë nga fillimi i udhëtimit. Për fat të keq, në internet nuk është e lehtë të bësh këtë diferencë. Online ka konfuzion, duke qenë se ka site që nuk marrin llogarisin faktorin kohë ose i përdorin të dy shërbimet për të tërhequr sa më shumë përdorues në faqe.
Në Shqipëri, është e vështirë të gjesh propozime të tillë nga tur operatorët, por nëse niseni nga ndonjë shtet fqinj, si Italia apo edhe Greqia do të mund të gjeni oferta ekonomike. Megjithatë duhet të llogarisni çdo gjë, si mjetin me të cilin do të qarkulloni dhe natyrisht mjetet financiare. TUI është një faqe interneti ku mund të gjeni oferta interesante për çdo destinacion. Por, nëse i jepni më pak rëndësi destinacionit sesa çmimit, atëherë mund të shkoni te faqja e internetit “Lets”, ku mund të gjeni atë që bën për ju.

Tregu i udhëtimeve online

Parashikimet për atë që njihet si tregu i udhëtimeve online ose tregu i lëvizshëm flasin për rritje. Një raport i agjencisë “PhoCusWright’s” mbi parashikimet e tregut europian ofron të dhëna për tregje si Franca, Gjermania, Mbretëria e Madhe, Italia, Spanja e Skandinavia. Rezulton se tregu europian gjatë vitit 2011 do të rritet me 10%. Rritja do të udhëhiqet nga ato vende që janë treguar më të ngadalta në adoptimin e kanaleve të prenotimeve online. Veçanërisht Spanja e Gjermania do të njohin rritje nga 14 deri në 13%.

Shkalla e ulët e penetrimit të turizmit online, vetëm 22% në vitin 2009, ofron për Spanjën marzh të lartë rritjeje.
Edhe në Itali e Francë, situata është në përmirësim, ku rritja parashikon të jetë në nivelin 9%, ndërsa në Mbretërinë e Madhe kjo rritje do të jetë në kuotën 6%. Për Skandinavinë rritja është më e madhe në 10%, që shënon edhe normën më të lartë të prenotimeve online në Europë, për të gjitha kategoritë.

Shkruaj një koment

Ju duhet të logoheni për të komentuar.