Flet Jonian Antoni, administrator i Century 21
Interesi për blerje nga të huajt ka qenë i konsiderueshëm, veçanërisht nga vendet që nuk kanë dalje në det. Megjithatë për Jonian Antonin, kërkesa, duke marrë në konsideratë natyrën e territorit shqiptar, duhet të ishte katërfish më e lartë. Antoni shton se fokusi për sa i përket segmentit të pasurive të paluajtshme në bregdet duhet të jetë te kapja e tregjeve të huaja.
Së fundi ka pasur interes nga të huajt për të blerë apartamente në zonat bregdetare shqiptare. Si e keni parë këtë lloj kërkese gjatë sezonit të verës?
Interesi për blerje nga të huajt në Shqipëri është i konsiderueshëm çdo vit përgjatë sezonit, por edhe përtej tij. Kryesisht të huajt që blejnë janë nga vendet e rajonit, Maqedonia, Kosova dhe Bosnjë- Hercegovina. Gjithsesi referuar pozitës gjeografike dhe shteteve që na rrethojnë, të cilat nuk kanë dalje në det, Shqipëria duhet të kishte të paktën katër herë më shumë blerës të huaj në vit.
Cilat janë zonat më të preferuara dhe si variojnë çmimet?
Nuk ka zona të preferuara, në varësi të buxhetit të klientit përzgjidhet dhe zona. Le të themi që gjithë Riviera Shqiptare parapëlqehet, por klienti i drejtohet një zone në varësi të infrastrukturës dhe buxhetit. P.sh., blerësit nga Kosova blejnë me tepër në Veri të Shqipërisë për efekt logjistik dhe përfitim kohe në udhëtim. Blerësit nga Europa e Veriut parapëlqejnë zonën e Gjirit të Lalëzit, ose Qerretin për efekt afërsie me aeroportin.
Tiranasit me të ardhura të larta synojnë për të blerë një apartament në Vlorë ose më tepër në Jug. Skandinavët, duke përdorur Aeroportin e Korfuzit, kërkojnë të blejnë edhe në Sarandë.Për të përmbledhur, sipas buxhetit dhe sipas origjinës bëhet përzgjedhja më e mirë.
Cilat janë disa nga problematikat që hasni në finalizimin e transaksioneve me të huajt?
Siguria e dokumentacionit është diçka parësore. Gjithsesi, kompania jonë i garanton të huajt, duke bërë 2-3 filtra me kompani ligjore dhe duke garantuar se dokumentacioni është i rregullt dhe historiku i dokumentacionit nuk ka pasur kurrë probleme. Ne nuk i prezantojmë asnjëherë pronat, qoftë edhe nëse kanë problemin më të vogël.
Si ka ndikuar përmirësimi i infrastrukturës te shitjet?
Jemi ende mbrapa si shtet për infrastrukturën urbane, por jo vetëm. Në vitet e fundit kanë dalë disa spekulime për Aeroport në Jug, ose për rrugë të reja, por shumica janë ende në diskutime, ose ende në letër. Klientët, sidomos të huajt, kur kanë të bëjnë me vende jo stabël si Shqipëria, nuk besojnë pa parë. Ndoshta preferojnë të blejnë pak më shtrenjtë në një moment të dytë, sepse shume herë janë djegur nga spekulimet ose nga vonesat në ndërtime infrastrukture në vende të tjera të botës. Mos harroni se investitorët e huaj punojnë me plane biznesi të sakta dhe çdo vonesë qoftë edhe njëmujore e një infrastrukture ose një leje i pengon ata në arritjen me sukses të objektivit të tyre.
Si ka qenë kërkesa nga shqiptarët e diasporës për apartamente në bregdet?
E konsiderueshme por jo si më parë. Ndërkohë që çmimet po rriten në Shqipëri edhe shqiptarët e diasporës po largohen gjithnjë e më shumë nga Shqipëria. Mos harroni se emigrantët tanë të stabilizuar në diasporë nuk fitojnë të ardhura aq të larta saqë të përballojnë një shtëpi të dytë. Në shumë raste janë qiramarrës edhe në vendin ku jetojnë.
Si e parashikoni ecurinë e këtij segmenti të tregut?
Një pjesë e mirë e tyre janë stabilizuar dhe kanë krijuar familje në diasporë duke i ndryshuar edhe synimet afatgjata në investime jashtë vendit. Shumë prej tyre dhe sidomos një pjesë e madhe e fëmijëve të tyre nuk e shikojnë kthimin si mundësi dhe si rrjedhojë nuk parapëlqejnë të blejnë asete të palëvizshme në Shqipëri. Nuk besoj se do të ketë rritje, madje mendoj se Shqipëria është më mirë të fokusohet te përthithja e tregjeve të huaja sesa te rikthimi i diasporës.
Ky është artikull ekskluziv i Revistës Monitor, që gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”.
Artikulli mund të ripublikohet nga mediat e tjera vetëm duke cituar “Revista Monitor” shoqëruar me linkun e artikullit origjinal.