Gara për ajrin

06/03/2018 11:12 AM 0 komente

Cilat janë kompanitë ajrore kryesore dhe si ndahet tregu mes tyre për vitin 2017. Cilat janë destinacionet kryesore ku udhëtojnë shqiptarët në Itali dhe shtete të tjera?

Trafiku i pasagjerëve në Aeroportin e Rinasit ka ardhur në rritje vit pas viti, për të arritur në një rekord prej 2.6 milionë pasagjerësh në vitin 2017, sipas të dhënave nga Tirana International Airport (TIA). Në raport me vitin e mëparshëm, numri i pasagjerëve është rritur me rreth 20%.

Shqiptarët që udhëtojnë tek të afërmit, apo për qëllime turistike, apo dhe të huajt që vizitojnë vendin e më pas kthehen në shtëpitë e tyre, e kanë mbajtur mjaft të zënë aeroportin e vetëm në vend. Shqipëria në vitin 2017 përjetoi një lulëzim turistik dhe kjo ka ndihmuar shtimin e trafikut në aeroportin e vetëm në vend.

 

 

Gara e kompanive ajrore, si po rishpërndahet tregu i Italisë

Në vitin 2002, rreth 50% të tregut të fluturimeve, sipas numrit të pasagjerëve, e zinte kompania Belle Air, që kishte fluturime të shumta direkte drejt qyteteve italiane. Por, pas falimentimit të saj në fund të vitit 2013, tregu u rikonfigurua dhe operatorë të rinj kanë hyrë, duke ndarë, së bashku me AlItalia, tregun e Italisë.

Në fund të vitit 2017, sipas të dhënave nga TIA, Blue Panorama, operatori italian që zëvendësoi Belle Air, kishte 29% të tregut total të fluturimeve, nga 30% vitin e mëparshëm.

Pas saj renditet AlItalia, me 11% të tregut. AlItalia ka humbur vazhdimisht terren dy vitet e fundit, pasi ka shkurtuar destinacionet direkte me disa qytete të Italisë. Në vitin 2015, kjo kompani zinte 31% të tregut.

Krahas Blue Panorama dhe AlItalia në 2017-n forcuan pozitat në tregun e Italisë edhe Albawings me 8% të totalit (nga 2% vitin e mëparshëm) dhe Ernest Airlines dhe Mistral Air me përkatësisht 6% dhe 3%.

Destinacionet drejt Italisë zinin 57% të tregut total të fluturimeve në 2017-n, e pandryshuar në krahasim me vitet e mëparshme.
Më pas renditen Austrian Airlines dhe Turkish Airlines, të cilat në vite kanë pasur një pjesë tregu të qëndrueshme prej 7% secila.
Listën e vijojnë Adria Airways, me 4% të tregut (rënie me një pikë përqindje në krahasim me një vit më parë), dhe më pas me nga 3% secila, Aegean Airlines, British Airways, Pegasus Airlines dhe Lufthansa me 2%. Operatorët e rinj, Transavia dhe Wizz Air kanë marrë përkatësisht 2% dhe 1% të tregut.

 

Destinacionet, kryeson Roma

Destinacioni kryesor ku udhëtohet nga dhe drejt Rinasit është Roma, me 323 mijë pasagjerë, me rritje prej 7.6% me bazë vjetore. Roma shërben jo vetëm si destinacion direkt, por edhe si tranzit për të udhëtuar në Europë dhe jashtë saj.
Destinacioni i dytë është Milano, me 267 mijë pasagjerë, me rritje 27% në raport me një vit më parë. Në total, pasagjerët nga dhe drejt Italisë ishin gati 1.5 milionë në vitin 2017 (rritje 18.4%), ose 62% e totalit.

Stambolli është në vend të tretë, me 235 mijë pasagjerë (16% rritje). Edhe Stambolli është bërë konkurrues vitet e fundit si një destinacion tranzit, kryesisht drejt SHBA-së, por edhe vendeve aziatike. Vjena mbetet pika kryesore e kalimit drejt gjithë Europës e jashtë saj. Në vitin 2017, nga dhe drejt Aeroportit të Vjenës udhëtuan rreth 174 mijë pasagjerë, me një rritje prej 9.6% në krahasim me 2015-n.

Më pas renditen qytetet e Italisë, si Piza, Bergamo, Bolonja, Verona, ku jetojnë e punojnë shumë emigrantë. Me Athinën udhëtuan rreth 84 mijë pasagjerë, teksa qytetet e Greqisë janë përgjithësisht të arritshme përmes kufirit tokësor. Ka pasur një rritje të ndjeshme të pasagjerëve për në Frankfurt, me 75 mijë pasagjerë, trefishim në krahasim me vitin e kaluar. Edhe nga dhe drejt Londrës udhëtuan 85 mijë pasagjerë, një rritje 15%. Destinacionet e reja të vitit 2017 janë Amsterdami dhe Parisi, me përkatësisht 27 mijë dhe 25 mijë pasagjerë, pasi operatori Transavia filloi fluturimet direkte drejt këtyre qyteteve. Nga dhe për në Budapest, nga ku filloi fluturimet Wizz Air, udhëtuan 30 mijë pasagjerë.

 

Të huajt vijnë, shqiptarët ikin; Rriten me 53% pushuesit që shkojnë në Antalia

Shqipëria në vitin 2017 u “zbulua” nga shumë të huaj që erdhën për turizmin e detit e rërës, kulturor, malor e deri të aventurës.
Por, vetë shqiptarët nuk i ndahen Turqisë. Të dhënat e Tirana International Airport tregojnë se numri i pasagjerëve që kanë udhëtuar me charter drejt Antalias dhe kthim ishte rreth 63 mijë persona në vitin 2017, me një rritje të fortë prej 53% në krahasim me një vit më parë.

Në gati dy vjet, shqiptarët që preferojnë të shkojnë me pushime në Turqi pothuajse janë dyfishuar. Në 2015-n, numri i pasagjerëve që udhëtuan me charter ishte rreth 35 mijë. Ai shënoi rritje me 18% një vit më pas, në 2016-n, edhe pse Turqia u përfshi në një valë terrorizmi, që largoi pushuesit e huaj, por jo ata shqiptarë, që u joshën nga tarifat më të ulëta. Ndërsa në 2017-n, kur situata u qetësua, rritja ishte edhe më e lartë.
Antalia mbetet një nga destinacionet e preferuara të familjeve shqiptare, për shkak të larmishmërisë së zgjedhjeve, raportit mes cilësisë dhe çmimit dhe lehtësisë së transportit përmes charter-ave.

Koha e qëndrimit llogaritet mesatarisht nga 7 në 10 net. Duke llogaritur një mesatare minimale prej 300-400 euro për person, që kushton një paketë (shumë familje shkojnë me fëmijë që paguajnë më pak ose falas), shpenzimet e shqiptarëve në plazhin e Turqisë vitin e kaluar llogariten të paktën 10-12 milionë euro.

Sipas të dhënave të TIA-s, gjatë vitit 2017 kanë fluturuar me charter nga Aeroporti i Rinasit dhe anasjelltas 179 mijë persona, me një rritje prej 8% në raport me të njëjtën periudhë të vitit të kaluar.
Destinacioni kryesor ishte Antalia, me 35% të totalit të pasagjerëve.

Në vend të dytë është Polonia (me Varshavën dhe Katovicën), me 54 mijë pasagjerë në total, ose 30% të totalit, që janë udhëtimet e kthimit të turistëve polakë, të cilët vitin e kaluar “pushtuan” bregdetin shqiptar, pasi rezervuan paketa “all inclusive” në disa hotele. Më pak renditen Londra, Kievi dhe Praga, vende nga të cilat u shënua rritje e numrit të turistëve në 2017-n.

 

Komente

avatar
  Subscribe  
Notify of