Per nje kuzhine shqiptare

26/03/2011 00:00 0 komente

Një qytet si Londra, ku kuzhina vendase nuk shquhet për ndonjë traditë, ka krijuar hapësira për restorante tradicionale të vendeve nga më të ndryshmet, që nga ato më të njohurat për gatime deri te gatimet tradicionale të vendeve më të vogla si Mongolia. Pavarësisht se në kryeqytetin britanik jetojnë e punojnë shumë shqiptarë, asnjë prej tyre nuk ka arritur të krijojë një restorant që të prezantojë traditën e kuzhinës shqiptare. Në fakt, restorante të mirëfillta me gatime tërësisht të traditës vendase, me një meny nga A tek Z tërësisht shqiptare (siç e quajnë ekspertët e gastronomisë) nuk gjenden as në vendin tonë.
Për të promovuar gatimin shqiptar, është krijuar Klubi i Shefave të Kuzhinës Shqiptare. Zëvendëspresidenti i këtij klubi, Gjelosh Roktina tha se, “qëllimi i klubit është që të përzgjedhë gatimet tradicionale të zonave të ndryshme të vendit dhe t’i bëjë të njohura ato edhe te konsumatorët e huaj”. Roktina pohon se në vend ka kuzhinierë të mirë, madje restorantet më të mëdha kanë punësuar edhe kuzhinierë të huaj, por Klubi i Shefave të Kuzhinës Shqiptare do të kërkojë të krijojë një standard të përbashkët për të gjitha restorantet që kanë karakteristikë gatimet vendase.
Ekspertët e gastronomisë vlerësojnë se gatimi shqiptar është një “kartë” që mund të luhet shumë mirë për të tërhequr turistët e huaj. Një vizitor që pëlqen kuzhinën tradicionale, jo vetëm që do të mendonte të kthehej sërish, por do t’u fliste për këtë edhe miqve të tij. Do të gaboheshim nëse nënvlerësojmë rëndësinë që mund të marrë kuzhina shqiptare te vizitorët e huaj. Mjafton të përmendim autorët e huaj që kanë shkruar për mbretin Zog, duke vënë theksin edhe te gatimet shqiptare dhe atë çfarë konsumonte mbreti. Për të bërë të njohur kuzhinën shqiptare na vjen në ndihmë edhe prodhimi natyral vendas. Konsumatorët po bëhen gjithnjë e më të vëmendshëm për prodhimet bio.
Por çfarë shohin ekspertët e biznesit përtej kufijve shqiptarër! Kuzhina tradicionale është një mundësi e mirë biznesi për ekspertët e gastronomisë edhe jashtë vendit.
Një zgjedhje e mirë, sipas presidentit të Dhomës Britanike të Tregtisë e Industrisë, Zenel Hoxha, është hapja e një restoranti tradicional shqiptar në Londër. Ai tregon se ndihet keq kur nuk gjen asnjë restorant shqiptar në Britani.

Gatimi, grepi i turizmit

Me pasionin për kuzhinën, pas më shumë se 20 vitesh punë, z. Roktina thotë se gatimet e mira shqiptare na bëjnë që t’i hamë edhe kur nuk kemi uri, por mbi të gjitha nuk janë të dëmshme për shëndetin. Duke qenë pjesë e kuzhinës mesdhetare, gatimi shqiptar vlerësohet i shëndetshëm. Sipas ekspertëve në sektorin e turizmit, promovimi i pjatave shqiptare është një element i domosdoshëm për turizmin vendas, i cili po vuan betonizimin e brigjeve të detit, infrastrukturën ende të dobët rrugore dhe cilësinë e kufizuar të shërbimeve të hotelerisë në tërësi.
Në vendin tonë, ende nuk ka një “inventarizim” të gatimeve tradicionale, e cila do të shërbente shumë mirë si një vlerë kombëtare. Ekspertë të fushës së gastronomisë shpjegojnë se vlera e ushqimit nuk është vetëm ajo e shijes personale. Krahas kësaj, gatimet tradicionale shërbejnë për të identifikuar kulturat dhe për t’i krahasuar ato. Ndërsa rakia (një pije e ndikuar kryesisht nga Turqia) konsumohet në shumë vende, deri edhe në Azerbajxhan, te një pjatë fasule me mish do të gjejmë kulturën e përbashkët të gatimit me irlandezët.

Shkruaj një koment

Ju duhet të logoheni për të komentuar.