Biznesi do të ketë ndryshime edhe te taksa e tabelës. Në Paketën Fiskale të vitit 2018, bëhet një riformatim i kësaj takse me një model që, sipas relacionit shpjegues, është huazuar nga Mali i Zi.
“Për sa i këtij ndryshimi, është marrë në konsideratë eksperienca e Malit të Zi, i cili, bazuar në sipërfaqen e shtrirjes së tabelës, ka vendosur kategorizim të nivelit të taksës sipas madhësisë së tabelës.
Kështu, tabelat deri në një sipërfaqe të caktuar, taksohen në nivelin 100% të taksës. Mbi këtë sipërfaqe, për çdo diapazon rritje nga një sipërfaqe në tjetrën, niveli i taksës ulet në masat 85%, 75%, 55% dhe 40% ndaj nivelit 100%.
Gjithashtu, duke qenë se përgjithësisht tabelat ndahen në të thjeshta, me ndriçim dhe elektronike, niveli i taksës ndryshon me rritje sipas këtyre ndarjeve. Niveli më i lartë është për taksën e tabelës elektronike 100%, duke u ulur në nivelet 77% për tabelat me ndriçim dhe 44% për tabelat e thjeshta” thuhet në relacion.
Ministria e Financave e ka detajuar modelin në relacionin e saj ndërkohë që secili nga Këshillat Bashkiakë ka të drejtë që brenda një tavani dhe dyshemeje të aplikojë vlera të tjera të taksave vendore.
Buxheti i njësive vendore preket këtë herë në tre taksa ku, konkretisht për taksën e ndërtesës, synohet që efekti të jetë pozitiv, përjashtimi nga taksa e infrastrukturës për hotelet me 4 dhe 5 yje me status special efekt negativ dhe për taksën e tabelës pa një vlerësim paraprak.
Ky është artikull ekskluziv i Revistës Monitor, që gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”.
Artikulli mund të ripublikohet nga mediat e tjera vetëm duke cituar “Revista Monitor” shoqëruar me linkun e artikullit origjinal.