Ndërsa njerëzit shpenzojnë më shumë kohë në mediat sociale, reklamuesit i ‘gjurmojnë’
Në fillim të këtij viti, BMW reklamoi në WeChat, një aplikacion popullor për mesazhe në Kinë me rreth 550 milionë përdorues në muaj. Por reklamat e saj ishin në dispozicion vetëm për profilet e të cilëve ishin blerës potencialë të makinave të shtrenjta. Të tjerëve iu reklamuan artikuj më të përballueshëm financiarisht, të tillë si smartphone-s. Fushata lëndoi disa ego. Disa prej atyre të cilëve nuk iu mundësua reklama e BMW u ankuan, duke iu referuar vetes si ‘dështak’.
Përvoja e prodhuesve të automobilave tregon kompleksitetin e reklamimit të ditëve të sotme, ndërsa është tepër e lehtë të dëgjohet zëri i konsumatorëve të pakënaqur. Por kjo shërben edhe si një shembull se si shefat e marketingut po përpiqen të gjejnë rrugën e duhur për të arritur konsumatorët në platforma të reja dixhitale, ku ata po shpenzojnë edhe më shumë nga koha e tyre.
Jo shumë kohë më parë, marketingu i medias sociale ishte diçka të cilën menaxherët ua kërkonin praktikantëve tyre veror. Sot ajo është kthyer në një shtyllë të industrisë së reklamave. Rrjetet sociale si Facebook, Twitter dhe LinkedIn kanë një numër të madh përdoruesish: 2 miliardë njerëz në mbarë botën i përdorin ato, thotë eMarketer, një firmë kërkimore. Reklamat online të të gjitha llojeve vazhdojnë të rriten dhe brenda kësaj kategorie, shpenzimet për reklamat në mediat sociale kanë arritur shifra nga pothuajse ‘0’ disa vite më parë në ndoshta 20 miliardë dollarë në vit.
Reklamuesit i pëlqejnë platformat e medias sociale, sepse ato mbledhin të gjitha llojet e të dhënave mbi moshën e çdo përdoruesi, modeleve të konsumit, interesave dhe kështu me radhë. Kjo nënkupton se reklamat mund t’u adresohen atyre me një saktësi të pamenduar me mediat analoge. Për shembull, Chevrolet, një markë amerikane për makina, ka dërguar reklama në faqet e Facebook dhe Twitter.
Të tilla shënjestra të përshtatura nënkuptojnë se dallimi mes reklamimit dhe tregtisë përmes internetit po bëhet i paqartë. Facebook, Twitter, Instagram dhe platforma të tjera po shesin reklama që përmbajnë butonat “bli tani”, të cilët u mundësojnë përdoruesve të kryejnë një shitje në vend. Është shumë herët për të treguar se sa konsumatorë e dëshirojnë një lehtësi të tillë, por platformat sociale parashikojnë një të ardhme në të cilën ata paguhen nga reklamuesit për të ofruar shërbime të pazarit në moment që i bëjnë platformat më të dobishme për anëtarët e tyre dhe i nxisin të shpenzojnë më shumë kohë për to.
Për të siguruar maksimumin nga aftësia për të ‘shënjestruar’ konsumatorët pikërisht në mediat sociale, agjencitë e reklamave po bëjnë ndryshime të mëdha në fushatat e tyre. Në vend të krijimit të një të mesazhi të vetëm që do të shfaqet nëpër televizion, radio, shtyp dhe në natyrë, ata po prodhojnë shumë variacione mbi një temë, që i përshtatet çdo seti konsumatorësh që ata e gjykojnë më të mundshëm t’i përgjigjet. Muajin e kaluar, Lowe’s, një shitës amerikan me pakicë në arredimin e shtëpive, zhvilloi një fushatë në Facebook ku përdoruesve iu dërgua një prej dhjetëra versioneve të reklamës së tij, në varësi të pjesës së shtëpisë që kishin përmendur në median sociale.
Natyra përsëritëse e marketingut dixhital ka gjeneruar shumë punë për agjencitë e reklamave dhe firmat e marrëdhënieve publike. Megjithatë, markat që punësojnë ata duhet të vlerësojnë “bilancin e kostos së prodhimit” që shoqërohet me personalizimin në mediat sociale, thotë Pete Blackshaw i Nestle, prodhues ushqimor. Shefat e marketingut duhet të bëjnë përpjekje për t’u dhënë markave të tyre “identitete online”.
Twitter ka qenë vendi kryesor ku markat janë përpjekur të shfaqen autentike dhe të zgjuara. Kur Apple njoftoi iPhone e tij të artë në vitin 2013, Denny’s, një zinxhir restorantesh, lançoi një mesazh ngacmues që tregonte një foto të “pancakes” të tij, “që serviret gjithmonë në dispozicion në ar”. Dukej se përshtatej mirë me konsumatorët.
Por në përpjekje për të ndjekur tendencat e medias sociale, kompanitë mund të gabojnë lehtësisht.
DiGiorno, prodhues i picave të ngrira, vuri re se një numër personash po përdorte hashtag ‘#WhyIStayed’ (pse unë qëndrova) në Twitter dhe dërgoi një mesazh gazmor që at kishin qëndruar për pica. Rezultoi se komenti ishte rreth dhunës në familje edhe pse gratë qëndronin në marrëdhënie abuzive. DiGiorno iu drejtua sërish medias sociale, por këtë herë për të kërkuar falje.
Nën dritën e këtyre grackave, platformat sociale ka të ngjarë të marrin një pjesë gjithmonë e më të madhe të buxheteve të marketingut. Por biznesi i medias dixhitale është ende i ri dhe i paqëndrueshëm, dhe është vështirë të parashikohet se cili nga rrjetet sociale është i destinuar të bëhet ekuivalenti i ri i medias së katër rrjeteve të mëdha të transmetimit-televiziv të Amerikës. Për një periudhë kohe, Twitter dukej se ishte “fusha” e duhur për reklamuesit. Por kohët e fundit në të ka ndodhur një ndryshim në menaxhim dhe kjo ka ndikuar në rritjen e ngadaltë të përdoruesve.
Tani Facebook është i preferuari në mesin e njerëzve të marketingut: ai pretendon gati pesë herë më shumë përdorues dhe nëntë herë më shumë të ardhura se Twitter. Facebook ka blerë disa shërbime të sapolindura të medias sociale që mund të jenë rritur për t’u bërë sfidues, të tilla si Instagram, aplikacion për shpërndarjen e fotove, dhe WhatsApp, aplikacion për mesazhe. Ai ka prezantuar me kujdes reklama në Instagram, për të parë se si reagojnë përdoruesit, por ende nuk ka filluar të bëjë të njëjtën gjë në WhatsApp.
Disa nga mediat e vjetra nuk e kanë ndier ende gjithë dhimbjen e humbjes së të ardhurave të reklamave nga rivalët dixhitalë. Reklamat televizive vijojnë ende në rritje. Por me kalimin e kohës, dhe ndërsa audienca televizive po bie dhe zhvendoset drejt shërbimeve që nuk kanë reklama, të tilla si Netflix, konkurrenca do të ndihet më fort. Megjithatë, rrjetet sociale dhe reklamuesit e TV të interesuar të kalojnë tek to, duhet ende të kuptojnë se cili është formati optimal për reklamat në video.
Në vitin 2012, Twitter bleu Vine, i cili lejon që njerëzit të postojnë video; disa muaj më parë Periscope, një aplikacion për video direkte gjithashtu në pronësi të Twitter, ishte shumë popullor. Reklamuesit kanë eksperimentuar me të dy shërbimet, por ende asnjëri nuk ka rezultuar si një medium marketingu. Markat që janë në fillim të përdorimit të platformave të reja përfitojnë në mënyrë disproporcionale, shpjegon Linda Boff, shef marketingu në General Electric, sepse përdoruesit e tyre nuk janë ngopur ende me mesazhe të marketingut.
Platformat e fundit sociale që kanë tërhequr vëmendjen e llojeve të marketingut janë një bandë aplikacionesh për mesazhe, të tilla si Snapchat, WeChat dhe Kik, ku të rinjtë i dërgojnë mesazhe, foto dhe video direkt miqve. Markat gjithashtu po fillojnë të aplikojnë më shumë Pinterest, ku përdoruesit mund të ‘atashojnë’ imazhe të gjërave që i ngacmojnë. Duket e drejtë që përdoruesit mund të duan të blejnë gjërat që i ngacmojnë, edhe pse platforma, e cila numëron 70 milionë përdorues, nuk mund të arrijë kurrë shkallën e Twitter (300 mln), për të mos përmendur Facebook (1.5 mld).
Edhe në qoftë se tregtuesit zotërojnë mediat sociale pa u shfaqur si të ngathët, të bezdisshëm ose ndërhyrës, me siguri do të ekzistojë një kufi se sa do të zhvendosen reklamat drejt platformave. Reklamat televizive janë ende fantastike për të arritur audienca të mëdha me mesazhe të thjeshta. Reklamat e shtypura mund t’u sigurojnë markave një frymë besueshmërie (mund të themi, apo jo?).
Ashtu si menaxherët e fondeve, reklamuesit gjithmonë do të synojnë një portofol të balancuar.