“Tirana Bank”, e cila ka lançuar së fundmi spotin publicitar në media për kredinë për shtëpi, ka vendosur që ta përçojë mesazhin dhe të “joshë” konsumatorin përmes shakasë. Në një periudhë të mbushur me tensione, drejtuesit e bankës e gjykuan si mënyrën më të mirë për të marrë vëmendje, duke përcjellë pozitivitet.
Reklamat humoristike duket se janë efikase, sepse të gjithë e pëlqejnë humorin, ndërkohë që janë përgjithësisht të suksesshme për t’i shtuar efekt komunikimit.
“Humori e bën komunikimin të paharrueshëm. Kur njerëzit zbulojnë diçka zbavitëse, ka më shumë gjasa ta ndajnë atë me të tjerët. Kjo bën që ata të shndërrohen në median tënde, kur diskutojnë mbi spotin me miqtë e tyre apo kur thjesht spoti ka nxitur një debat, misioni i komunikimit është arritur”, thotë drejtorja e marketingut të “Tirana Bank”, Frida Krifca.
Në qendër të spotit është një djalë i madh në moshë, i pamartuar, apo siç etiketohet në gjuhën e përditshme “beqar i stazhionuar”, i cili jeton ende në shtëpinë e prindërve, nën një kujdes gati “irritues” të mamasë së tij. Në një situatë të tillë, zgjidhja më e mirë është jetesa më vete dhe këtu “hyn në lojë”, “Tirana Bank”, përmes kredisë për shtëpi.
Nga impaktet që banka ka pasur, spoti ka arritur të “godasë” te konsumatorët, duke përjashtuar riskun e shkëputjes së vëmendjes nga mesazhi që kërkohet të përçohet.
“Nëse loja, ambienti i paraqitur, ngjyrat, toni i zërit arrijnë ta vendosin audiencën në humor të mirë, ata kanë më shumë gjasa ta ndjekin komunikimin me vëmendje”, thotë znj. Krifca.
Intervista/ Flet Frida Krifca, drejtore e marketingut në “Tirana Bank”
Sfida kryesore, një komunikim ndryshe
Si ju lindi ideja për spotin e ri, cili është synimi kryesor dhe qëllimi i tij?
Produkti i drejtohet të gjithë individëve që kanë nevojë dhe dëshirë të blejnë një apartament apo shtëpi, por kanë mungesë likuiditeti financiar. Kishim një produkt shumë të mirë, të cilit i shtuam edhe disa veçori dhe bonuse për ta bërë edhe më tërheqës për grupin tonë të synuar dhe më tej u “zhytëm” në procesin e rëndësishëm të rrahjes së ideve dhe opsioneve.
Çështja ishte si të komunikonim një ofertë kaq të volitshme, në një mënyrë që të tërhiqte vëmendjen e merituar?
Sfida kryesore dhe objektivi ishte krijimi i një komunikimi ndryshe, i cili të mos ishte thjesht një tjetër reklamë banke, dhe në të njëjtën kohë të transmetonim sa më qartë mesazhin që dëshironim të ofronim.
Morëm shkas nga një realitet tipik në Shqipëri; situatën e një “djaloshi” në të 40-at, i cili ende jeton në shtëpinë e prindërve të tij. Ka njerëz në situatë të ngjashme, të cilët janë të kënaqur, por një numër i madh nuk pajtohen me të dhe kanë nevojë të kenë shtëpinë e tyre dhe për këtë, ju duhen mjete financiare. Me anë të këtij spoti synuam të evidentojmë acarimin e “ëmbël” të një gjendje të tillë, në mënyrë që të nxisim vendimmarrje brenda grupit tonë të synuar duke i thënë: Është koha të keni shtëpinë tuaj!
Pasi kemi identifikuar nevojën dhe nxitur audiencën drejt veprimit, “Tirana Bank” i bëhet partner në sigurimin e një financimi të shpejtë, me norma të mira interesi, me bonuse të ndryshme, në mënyrë që klientët të gëzojnë jetë cilësore.
Ideja na ndihmoi të përçojmë drejtpërsëdrejti mesazhin.
Kush e krijoi spotin? Është prodhuar në Shqipëri apo Greqi?
“Kreativi” është zhvilluar nga “Ogilvy Albania” dhe reklama është prodhuar në vend, pra në Shqipëri, nga shtëpia prodhuese “Big Pencils”.
Nëpërmjet kësaj fushate, ne gjithashtu kemi prezantuar dhe stilin e ri të komunikimit vizual të krijuar nga “Ogilvy”, i cili rrit imazhin e brandit. Freskia që propozohet në organizimin e komunikimit është në linjë me filozofinë e re të komunikimit të “Tirana Bank”.
Si mendoni se ndikojnë në publik reklamat “zbavitëse”, si reklama juaj e fundit?
Të gjithë e pëlqejnë humorin, është natyra njerëzore e tillë! Ndërkohë që është mënyrë përgjithësisht e suksesshme për t’i shtuar efekt komunikimit. Njëkohësisht humori e bën komunikimin të paharrueshëm. Kur njerëzit zbulojnë diçka zbavitëse, ka më shumë gjasa ta ndajnë atë me të tjerët. Kjo bën që ata të shndërrohen në median tënde kur diskutojnë mbi spotin me miqtë e tyre, apo kur thjesht spoti ka nxitur një debat, misioni i komunikimit është arritur.
A ekziston rreziku që për shkak të humorit, të shkëputet vëmendja e konsumatorëve nga mesazhi që kërkohet të tejçohet?
Ashtu si në jetën e përditshme, kjo varet nga mënyra e përdorimit të humorit. Mund të jemi elegantë dhe me stil me të, duke dhënë vetëm një ngacmim, në mënyrë që të befasojmë nëpërmjet komunikimit ose mund të jemi agresivë, banalë, apo thjesht të vakët. Këtu qëndron vështirësia, pasi vija ndarëse është shumë e hollë dhe ngatërrohet lehtë. Humori i vakët mund të minojë besueshmërinë e audiencës apo dhe mund të largojë vëmendjen nga mesazhi i reklamës. Në raste të tilla, buxheti marketing shpenzohet kryesisht për të paguar kohë shumë të mirë televizive për të transmetuar spote të suksesshme që gjenerojnë interes apo një buzëqeshje te konsumatorët, përndryshe një spot me humor të dobët, i cili shfaqet shpesh, me siguri do të ndikonin në një efekt të padëshiruar për klientët e mundshëm, të vjetër dhe të rinj.
Mendoj që suksesi të shpërblen, atëherë kur së bashku me një produkt të mirë ke transmetuar qartë objektivin e komunikimit, pavarësisht mënyrës që ke zgjedhur.
Ne zgjodhëm të befasojmë audiencën tonë, duke marrë shkas pikërisht nga bota e brendshme dhe mjedisi që na rrethon, pa gjykuar dhe pa vënë në lojë askënd. E kemi sjellë këtë realitet ashtu siç është, me njerëzit dhe tipologjinë që e përbëjnë atë, prandaj dhe është zbavitës. Sigurisht që e kemi testuar përpara se ta shfaqim në një komunikim me shkallë të gjerë.
Unë besoj se në këtë mënyrë, mesazhi që komunikohet, bëhet më i paharrueshëm. Nëse loja, ambienti i paraqitur, ngjyrat, toni i zërit arrijnë ta vendosin audiencën në humor të mirë, ata kanë më shumë gjasa ta ndjekin komunikimin me vëmendje.
Ju në fakt përdorni shpesh reklama me humor. Pse?
Ka shumë mënyra për të reklamuar një shërbim apo një produkt; komunikimi me tone humori është veç një prej tyre. Çdo herë që na lind nevoja për të komunikuar diçka, zgjedhim rrugën që na mundëson ta përcjellim siç duhet mesazhin tonë drejtuar publikut, gjithmonë duke marrë parasysh dhe ambientin që na rrethon dhe realitetin aktual. Në një periudhë të mbushur me tensione dhe mesazhe, që s’kanë përputhje me realitetin, e gjykuam si mënyrën më të mirë për të marrë vëmendje dhe për të përcjellë pozitivitet.
Cilat kanë qenë përshtypjet e para që e keni marrë?
Kemi marrë reagime fantastike. Publiku arrin të dallojë spotin e “Tirana Bank”, ndërmjet morisë së reklamave të tjera televizive nëpër blloqet e spoteve dhe duket se mesazhi i produktit është dhënë siç duhet, pasi kemi vënë re rritje të interesimit në degët tona. Njerëzit kanë dalë nga shtëpia dhe kanë vizituar degët për të kërkuar informacion për kreditë hipotekore të ofruara nga “Tirana Bank”.