Argëtim, reality show, humor, lojëra dhe aktualitet, kjo është gjuha me të cilën ka nisur të flasë programacioni i televizioneve kryesore në vend. Prodhime shqiptare, por edhe patenta të blera e të testuara si të suksesshme, shkëlqim, por me hijen e krizës që ndjek dhe që kjo industri po e vuan. Rënia e volumit të reklamave është një prej treguesve, që parashikohet të përkeqësohet në vitin e ardhshëm
Merkatoja televizive ka përfunduar (si çdo herë nuk kanë munguar rotacionet e figurave qendrore), ndërsa gara sapo ka nisur edhe për këtë sezon vjeshtë-dimër. Programe “deja vu”, por edhe fringo të reja, që do të shoqërojnë shikuesin e ekranit të vogël. Secili prej televizioneve kryesore në vend, me një bagazh prodhimtarie, ka nisur të zbulojë pak nga pak detajet e surprizave të këtij sezoni. Promot shoqëruese kanë treguar se do të mbizotërojë argëtimi, aktualiteti, por edhe humori.
Gara e fortë nis që në orët e para të mëngjesit, ku çdo kanal televiziv fton shikuesin, në mos t’i qëndrojë tepër besnik, të paktën të bëj një zapping, vazhdon më tej me orët e pasdites për të arritur kulmin në atë që njihet si “prime time”, koha kryesore ku audienca shënon rritje të ndjeshme.
Të tria televizionet kryesore “Top Channel”, “Tv Klan” dhe “Vizion Plus” po prezantohen me strategji të ndryshme për të thithur edhe target grupet kryesore të shikueshmërisë (standardi ndërkombëtar) nga mosha 14-49 vjeç.
Investimet, edhe pse nuk mungojnë, nuk kanë më atë bumin e dikurshëm, pasi kriza ka bërë punën e vet. Megjithatë, secili prej televizioneve, mundohet që në mos të nxjerrë fitime nga prodhimet, të paktën të mbulojë kostot, një sfidë që duket se do të jetë shumë më e ashpër vitin e ardhshëm, pasi ekspertët e marketingut nuk tregohen edhe aq optimistë në parashikimet e tyre. Ata thonë se likuiditeti në rënie është një arsye e mjaftueshme që televizionet të mos ndërmarrin investime të palogjikshme, qoftë kjo edhe në emër të audiencës.
Një lëvizje e diktuar nga vështirësia ekonomike në të cilën gjendet biznesi është reflektuar edhe te zëri kryesor i mbijetesës së këtij mediumi (jo vetëm), reklamat. Sipas të dhënave të agjencisë së monitorimit “MC Monitoring”, volumi në total i reklamave ka ardhur në rënie për janar-gusht
2012, krahasuar me të njëjtën periudhë të vitit të kaluar, për sa u takon reklamave të monitoruara. Kjo tendencë (që në fillim të vitit u parashikua nga ekspertët se do të kishte përmirësim) ka bërë që televizionet të mos zbatojnë (sikundër ndodh në çdo sezon) rritje drastike të çmimeve për spotet publicitare.
Ajo që në vazhdim parashikojnë ekspertët e marketingut (tetor-dhjetor) përkufizohet në një fjalë të vetme, “rrudhje”. Sipas tyre, ka nisur të ndihet në ajër një “trembje reale” e biznesit për të promovuar aktivitetin dhe markën e tyre.
Brenda “kutisë”
Shqiptarët sapo ka filluar të njihen me atë që do të jetë miku i tyre në ditët e freskëta e më pas të ftohta të dimrit, programin e ekranit të vogël. Natyrisht ka edhe “As” që mbahen nën mëngë, për t’u treguar atëherë kur kurioziteti do të vijë duke u rritur, por edhe kur konkurrenca të ketë bërë një hap. Edhe në këtë industri, asgjë nuk i lihet rastësisë, pasi është një “lojë” ku nuk kurohen vetëm shijet e masës, por matet edhe “pulsi” i konkurrentit.
Drejtuesit e departamenteve të programacionit thonë se media televizive në Shqipëri, tashmë është konsoliduar. Profilet janë krijuar, ndërsa nuk mungojnë as shfaqjet e tendencave të tregjeve fqinje apo europiane. Natyrisht ka më pak shije anglo-saksone dhe më tepër “latin feeling”. Ka programe që janë testuar të kenë pasur sukses në Europë apo edhe në Shtetet e Bashkuara të Amerikës, por pa humbur përshtatjen me terrenin e vendit.
Sipas ekspertëve, hedhja në tregun shqiptar e formateve të testuar jashtë, shihet edhe si një garanci më shumë për reklamuesit, në mungesë edhe të matjes shkencore të audiencës. Të gjithë drejtuesit e televizioneve kryesore, në këtë pikë nxitojnë të theksojnë se programi që ata kanë blerë nuk ka asgjë të ngjashme me atë të konkurrentit.
Programacioni është i vetmi produkt që rrjetet televizive u “shesin” konsumatorëve (audiencës televizive) dhe klientëve (reklamuesve) gjithashtu. Këtu dallohet prirja për t’u orientuar më tepër drejt formateve të tipit realit show, si dhe formateve të tjera që kanë mundësi të gjenerojnë në shkallë të konsiderueshme ndërveprimin e audiencës me televizionin.
Megjithatë, ajo që mund të thuhet pa drojë është se do të vazhdojnë të mbizotërojnë në pjesën më të madhe të programacionit (ditor/javor) të televizioneve, formatet e telenovelave, që përgjithësisht kanë kosto relativisht më të ulët se programet e tjera, me kërkesa më të larta për burime financiare, teknike e njerëzore, por edhe ato të tipit “info talk-show” apo “hard talk”.
Kushtet aktuale të tregut televiziv dhe zhvillimet e mëtejshme të shijeve të audiencës do të ndikojnë përherë e më tepër në konsolidimin e disa televizioneve, të tipit gjeneralist, ndërkohë që shumica e rrjeteve/kanaleve të tjera do të duhet që të orientohen drejt formateve “niche” të programacionit, pasi nuk do të jenë në gjendje të konkurrojnë me rrjetet kryesore.
Në vetvete, kjo nuk është dukuri negative, duke gjykuar se ka mjaft grupe të caktuara demografike (dhe shije/sjellje të caktuara të audiencës) që nuk mund të plotësohen domosdoshmërisht nga kanalet kryesore të formatit gjeneralist.
Po çfarë kanë programuar tri televizionet që ndajnë audiencën kryesore? Padyshim që pritet një garë e fortë për “Top Channel”, “TV Klan” dhe “Vizion Plus” dhe në tetor ajo do të shfaqet më e plotë.
“Top Channel”, formatet e reja iu besohen “të shtëpisë”, por në terma afatgjatë, “lamtumirë” telenovela
Argëtim, humor dhe lojëra. “Top Channel” vjen në këtë sezon me programe të reja, të shtuara në orët e transmetimit e që do të drejtohen nga emrat e moderatorëve prej vitesh të konsoliduar të këtij televizioni, që mbi të gjitha, synon t’i qëndrojë besnikë markës së krijuar. Risi e këtij ekrani është padyshim formatimi krejt i ndryshëm nga sezoni i kaluar i “E Diell”. Pasditja e së dielës do të ftojë shikuesit shqiptarë të ndjekin dy formate krejt të reja, ku në qendër do të jetë argëtimi, show, loja, por edhe quiz-et.
“Minute to win” është një prej tyre. Nga drejtuesit e “Top Channel” mësohet se emisioni, i formatit “game show”, i cili i është besuar Gent Hazisit, do të transmetohet ditën e diel, rreth orës 16:30 dhe do të ketë në qendër lojëra, në fund fituesi i tij do të marrë edhe një shpërblim prej 1 milion lekësh. Pas këtij programi, vazhdimi i besohet Xhemi Shehut, me “I love my country”, një spektakël ku nuk do të mungojë argëtimi, muzika, lojërat. Çdo të diel, në këtë spektakël do të “përballen” dy qytete. Edhe publiku është menduar që të jetë nga rrethet, një strategji, që siç thonë drejtuesit e këtij televizioni, përpiqet të sjellë pranë shikuesit argëtimin, por edhe aspektin e gëzueshëm, “funny”, për të cilën, sipas tyre, publiku është gjithmonë në kërkim.
“I love my country” është konceptuar si një panel loje me shumë humor dhe shpirtin e garës. Tetë personazhe do të sfidojnë njëri-tjetrin, duke matur dijet e tyre për Shqipërinë, ndërsa do të përfshihet edhe publiku në lojë.
Me pak fjalë, ky show, javë pas jave, është konceptuar si një udhëtim në memorien dhe njohjen e Shqipërisë.
Një tjetër emision, ku në qendër do të jetë formati i quiz-it është edhe ai që do të pasojë “Pasdite në Top Channel” e që do të drejtohet nga Edi Manushi, “Next” ose “Tjetri”.
Sezoni i radhës do të jetë edhe për “The Voice”, regjistrimet për të cilin kanë filluar, ndërsa për publikun do të nisë më datë 5 tetor, po në drejtimin e Ledion Liços dhe me të njëjtën skuadër trajnerësh, ajo që ndryshon është se ndihmësit e tyre këtë herë do të jenë ish-nxënësit e edicionit të parë.
Arbana Osmani, edhe këtë sezon, do të vazhdojë të drejtojë spektaklin me fëmijë “1001 pse”, ndërsa Alban Dudushi, po sërish me emisionin e mbrëmjes “Top Show”. “Top Story” nga Sokol Balla, “Shqip” nga Rudina Xhunga, apo edhe “100 milionë” nga Eno Popi tashmë kanë ditë që kanë nisur rrugëtimin në këtë sezon të ri. Tashmë nuk është e re edhe fytyra e pasdites, orari i transmetimit të së cilës është zgjatur në rreth 1 orë e 30 minuta, kjo jo pa qëllim, pasi në terma afatgjatë, drejtuesit e ekranit kombëtar kanë të tjera plane. Të çojnë drejt “zhdukjes” telenovelat, edhe pse ishin ata të parët që me blerjet e tyre mbajtën të gozhduar para ekraneve shqiptarët, me “Paloma” apo “Zhade”. Duket se tashmë, pak nga pak, këtij fenomeni po i mbyllet cikli dhe oraret e tyre do të zëvendësohen me emisione që trajtojnë tema të aktualitetit, të aspekteve të ndryshme sociale. Për drejtuesit e këtij televizioni, ky plan që do të zbatohet në një periudhë afatgjatë, nuk rrezikon të shoqërohet me humbje të audiencës (të asaj pjese të tortës që ka peshë), por do të vijë si një sjellje e diktuar edhe nga koha dhe orientimi më tepër perëndimor i shijeve të publikut.
“Një gërshetim shijesh dhe mënyrash konceptuale në të gjitha drejtimet”, thonë drejtuesit e këtij televizioni, që më së shumti i besojnë sigurisë që jep marka, tashmë e konsoliduar. “Sfida, thonë ata, është të jesh gjithmonë inovativë, por pa lënë mënjanë atë që jep si garanci produkti i testuar si i suksesshëm”.
Janë disa arsyet se përse ky televizion ka zgjedhur që të luajë me shumë “ngjyra”, ajo që diktohet deri-diku nga publiku, nga jashtë, si një tendencë që nuk mund të anashkalohet, por edhe për të mbushur kërkesën e “pangopur” për gjëra të reja, formate inovative, që jo vetëm argëtojnë, por sjellin edhe ndërveprim.
Skeleti ku ky televizion do të vazhdojë të mbështetet edhe në të ardhmen është informacioni, si baza e një ekrani që kërkon të ruajë markën, lajmet investiguese në hapësirat e emisioneve, siç është edhe ai i mëngjesit, formatet e diskutimeve të tipit “hard talk”, por edhe argëtim, që më së shumti do të ketë shije mesdhetare.
“TV Klan”, kryefjala është muzika
Televizioni tjetër kombëtar, këtë sezon ka vendosur që t’i dorëzohet “muzikës”, duke qenë se ka disa formate ku ajo është baza. “X Factor” ka nisur rrugëtimin dhe spektakli nuk do të mungojë të vijë me garancinë që japin emrat si Vera Grabocka apo Alketa Vejsiu. Për 100-vjetorin e Pavarësisë është menduar një spektakël tërësisht me ngjyra kuqezi, me titull “100 vjet muzikë”. Do të drejtohet nga Pandi Laço dhe do t’i kushtohet muzikës shqiptare në 100 vjet. Një formulë spektakli, që siç shprehen drejtuesit e programacionit të këtij televizioni do të prezantohen këngët më të famshme shqiptare, muzika e një shekulli, përfshirë kolonat zanore të filmave, krijimet serioze të autorëve më të famshëm shqiptarë. Gjithçka do të nisë në fund të muajit shtator, çdo të shtunë në mbrëmje.
Një tjetër emër i rëndësishëm i këtij ekrani e ka nisur tashmë rrugëtimin. Ardit Gjebrea, këtë sezon konkurron i vetëm, ndërsa pranë tij ka thirrur si bashkëskenariste Dalina Buzin,
ish-kryeredaktoren e “Pasdite në Top Channel”. Blendi Fevziu, me 15 vjet “Opinion”, ka hapur siparin e emisioneve të tij e po kështu, edhe Arian Çani, me “Zonë e Lirë” dhe Rudina Magjistari me “Takimi i Pasdites”. Duket se “motorët” e “TV Klan” janë kthyer veçanërisht te muzika, pasi është zhanri që do të mbizotërojë në këtë sezon. Natyrisht, po vazhdohet me “pushtimin e butë” turk, pasi emra të tjerë serialesh kanë nisur të shfaqen në ekran. Kjo tendencë, sipas drejtuesve, do të vijojë të jetë e pranishme në këtë ekran. Për drejtuesit e departamentit të programacionit, formatet që prezantohen në këtë sezon sigurojnë një aspekt të rëndësishëm për televizionin që është interaktiviteti apo ndërveprimi i drejtpërdrejtë i audiencës. Sipas tyre, sa më i lartë të jetë ndërveprimi, aq më e lartë është shkalla e suksesit në këndvështrimin e produktit që i afrohet konsumatorëve (audiencës) dhe sidomos, klientëve të medias (reklamuesve). Kjo rrit mundësinë për të qenë të suksesshëm.
Mëngjesi vazhdon nën shoqërinë e “Aldo Morning Show”, po kështu edhe “Promo Zone”, emisioni që i dedikohet të rinjve.
“Vizion Plus”, në qendër familjen, por edhe humorin
Sezoni ka nisur tashmë edhe për “Vizion Plus”. Prodhime të reja, por edhe programe që vazhdojnë udhëtimin nga sezonet e kaluara.
Mbi të gjitha, në këtë ekran, duket se është i mbarë prodhimi i “humorit”. Agron Llakaj me “Al Pazar” është një nga risitë kryesore që ofron ky televizion.
“Jemi të ndërgjegjshëm për faktin se konkurrenca po bëhet edhe më e fortë dhe tregu mediatik edhe më kompleks, ndaj jemi duke u përpjekur për të forcuar pozitat tona në treg”, thonë drejtuesit e programacionit të këtij televizioni. Sipas tyre, ky sezon ka në brendësi formate të konceptuara dhe të ndërtuara për grupmosha dhe nivele të ndryshme audience, me një shpërndarje ditore konform kërkesave dhe nevojave të publikut.
Në këtë sezon të ri, një element i veçantë janë moderatorët, figura si Adi Krasta, Agron Llakaj, Agim Bajko, Alfred Peza apo edhe aktorët e “Apartamentit 2XL”.
Vend të rëndësishëm në programacionin e këtij televizioni zënë edhe eventet sportive, si “Formula 1”, “UEFA Europa League”.
Valbona Selimllari me “Nga e Para” do të vazhdojë të jetë pjesë e ekranit të “Vizion Plus” për tre sezonet e ardhshme.
Pasioni i shqiptarëve për sportin dhe për formatet reality përkthehet në një audiencë plus dhe kjo është një strategji e zbatuar me kujdes nga ky televizion. Drejtuesit e programacionit thonë se synojnë që të prodhohen dhe të transmetohen programe që tërheqin segmentin e duhur demografik, të rrisin të ardhurat nga reklamat, por edhe mundësitë përmes përfitimeve selektive dhe marrëveshjeve bashkëpunuese.
Në kreun e listës së formateve të reja të këtij sezoni mbetet padyshim “Al Pazar”, një show humori, i cili vjen nën idenë e Agron Llakaj. Transmetimi do të nisë më 6 tetor, për të vijuar çdo të shtunë në mbrëmje.
Një tjetër risi e këtij sezoni janë edhe serialet turke, që tashmë po shndërrohen në fenomen.
“Apartamenti 2XL” do të fillojë transmetimin më 7 tetor, me personazhe të famshëm. Edhe Adi Krasta me show-n e tij, nis përvojën e dytë për të folur “troç”.
Alfred Peza vjen sërish me dy formatet e tij “Intervista” dhe “Debat”. Në këtë sezon nuk do të mungojnë as formatet traditë si “Zip”, “By Pass”, “Zonë e Ndaluar”, “Chic Plus”, “Ora 5 Pm”, “Dita Ime”, “Next”, “Mos e Beso po Deshe”.
Drejtuesit e programacionit të televizionit thonë se është rritur koha e transmetimit me bazë produkti.
“Në bazën e ndërtimit dhe zbatimit të një produkti televiziv, qëndron gjithnjë raporti kosto-përfitim, por këtu gjithnjë kemi parasysh edhe faktin që investimet në produktin televiziv kanë kthime afatgjata dhe në raste të caktuara, jo gjithnjë mund të përkthehen në vlera monetare. Jo gjithnjë të shpenzosh shumë do të thotë që të kesh sukses, e rëndësishme është sesi arrihet t’u jepet vlera e duhur për të krijuar një produkt fitimprurës”, thonë ata.
Më pak reklama
Nga agjencitë publicitare nuk vijnë aspak lajme të mira. Buxhetet për fushatat publicitare nga biznesi janë reduktuar ndjeshëm, pjesa e dytë e vitit parashikohet të jetë edhe më e vështirë e po kështu, edhe viti 2013.
Ekspertët thonë se po kalohet një periudhë e zymtë recesioni ekonomik, ku shumica e reklamuesve strategjikë dhe jo vetëm kanë ulur ndjeshëm investimet e tyre publicitare. Përjashtimet janë të rralla. Sektori që vijon të reklamojë më shumë mbetet telekomunikacioni, por edhe ai ka shënuar rënie në vëllim, krahasuar me të njëjtën periudhë të vitit të kaluar. Një tjetër sjellje që ekspertët vënë re është se bizneset që kërkojnë të reklamojnë, synojnë të bëjnë sa më shumë “pazar” ekonomik, që nënkupton reklamim me çmime sa më të ulëta. Pra, të blerit lirë i çon ata në një frekuencë më të lartë spotesh, pa rritje buxheti, por për ekspertët kjo strategji në finale ka një kosto më të lartë.
Sipas të dhënave të “MCM Monitoring”, numrin më të madh të spoteve të transmetuara e mban televizioni “Klan”, për periudhën janar-gusht 2012, i cili ka ardhur në rënie në krahasim me një vit më parë.
Nëse do t’i hedhin një sy edhe numrit të spoteve të transmetuara sipas muajve (janar-gusht), do të shohim se periudha maj-qershor-korrik ka numrin më të lartë. Për vitin e kaluar, kjo i dedikohet zgjedhjeve për pushtetin vendor, por edhe Kampionatit Europian të Futbollit që u mbajt në Poloni dhe Ukrainë këtë vit.
Padyshim, janari dhe gushti janë dy muajt më të varfër. I pari përkon me mbarimin e festave (kur ka edhe bum transmetimesh), ndërsa i dyti, me pushimet.
Edhe për muajt në vazhdim (tetor-dhjetor), ekspertët parashikojnë ecuri në rënie, për shkak se biznesi ndihet i trembur nga presioni që po ushtron kriza.
Megjithatë, ata sugjerojnë se koha më e mirë e reklamimit në një program me audiencë të lartë është relative, pasi gjithçka vendoset në bazë të formatit, ditës së transmetimit dhe periudhës.
Konsumatori, shprehen ata, ka një stil të ndryshëm jete, në bazë të stinëve, pra në Shqipëri funksionon më shumë ky stil.
Për shembull: nëse do të flisnim për “Portokalli” e “Apartamentin 2XL”, pozicionimi i reklamave është i efektshëm në të tria momentet, në fillim, në mes e në fund, duke qenë se transmetohet ditën e diel, kur pjesa më e madhe e njerëzve janë në shtëpi, por edhe për faktin se në çdo kohë, ka batutë.
Është e ndryshme situata në një zhanër tjetër. Ekspertët thonë se në finale, duhet të konsiderohet se kush dhe kur ulet para ekranit dhe për cilin emision. Sipas tyre, reklamuesi kryesor që përbën të paktën 80% të buxheteve, në televizion kërkon audiencë me standard jetese të lartë. Target grupi që ata synojnë është mosha nga 14 deri në 50 vjeç.
Shqiptarët, thonë ekspertët, janë shumë të lidhur pas televizionit dhe e konsiderojnë si mjetin parësor të informimit. Ndaj mund të themi padyshim se, televizioni do të jetë kryefjala dhe për 10-vjeçarin e ardhshëm.
Avantazhet konkurrues të televizionit janë disa: zhanri argëtues dhe social në programacion dhe intelekti njerëzor. Rrallëherë të ndodh të shohësh njerëz kaq të talentuar dhe besnikë ndaj një kompanie.
Ekspertët thonë se televizioni ka edhe një avantazh tjetër, atë të çmimeve jo shumë të larta të reklamimit. Ata pohojnë se nëse krahasohemi me rajonin (Mali i Zi, Maqedoni, Kosovë) është fakt se televizioni në Shqipëri është shumë i zhvilluar se në këto vende, e ndërkaq çmimi zyrtar i reklamës është më i lirë në këtë rajon.
Kriza mban çmimet të pandryshuara
Çmimet nuk kanë shënuar rritje të fortë, siç jemi mësuar të konstatojmë rëndom në çdo fillim sezoni. Maksimalisht kjo rritje llogaritet deri në 2%, shifër pothuajse e pandjeshme.
“The Voice” është programi që shënon për këtë sezon çmimin më të lartë të reklamimit për 30 sekonda, 230,000 lekë, duke u renditur i pari e duke lënë pas “Portokalli”, që kryesonte prej disa vitesh. Për spektaklin e humorit, çmimi i reklamimit (gjithmonë marrim si referim 30 sekonda) ka mbetur i pandryshuar 204,000 lekë në mes të transmetimit, ndryshe nga një vit më parë, kur rritja ishte rreth 8.8%.
Të pandryshuara kanë mbetur çmimet e reklamimit edhe për emisione si: “100 milionë” (165,000 lekë), “Top Story”, “Shqip”, “Pasdite” etj.
Në programet e reja, si “One minute to win”, një spot 30 sekonda kushton 85,000 lekë dhe po kaq edhe tek “I love my country” (Unë e dua vendin tim).
Ndër emisionet me çmime të larta reklamimi, renditet edhe “1001 pse”, ku një spot 30 sekonda kushton 160,000 lekë. Pak më shtrenjtë (165,000 lekë) janë tarifat te quiz-show “100 milionë”.
Ndërsa reklamimi në eventin sportiv “Moto GP”, që ka zëvendësuar që prej sezonit të kaluar “Formula 1”, kushton 150,000 lekë.
“Klan” është i vetmi televizion, i cili operon me çmime në monedhën euro dhe jo në atë vendase. Çmimet e reklamimit në këtë ekran kanë diferenca të ndjeshme nga ato në “Top Channel”.
Në televizionin “Klan”, çmimin më të lartë për 30 sekonda spot publicitar e mban “X-Factor” me 1,500 euro, me rritje nga sezoni i kaluar, kur ishte 1,050 euro.
Më pas, vjen emisioni “Opinion”, nga Blendi Fevziu, ku çmimi në këtë sezon ka arritur në 1,350 euro nga 1,200 euro në sezonin e kaluar. Këtë shifër reklamimi, tani e mban “Zonë e Lirë” e Arian Çanit, që ka ardhur në rritje në krahasim me sezonin e një viti më parë, ku llogaritej në 1,050 euro.
Rritje ka shënuar reklamimi edhe në spektaklin e së dielës
“E diela shqiptare”, që ka arritur në 750 euro nga 600 euro një vit më parë.
Në “Vizion Plus”, programi me çmimin më të lartë për këtë sezon është eventi sportiv “Formula 1”, ku një spot 30 sekonda llogaritet në 255,000 lekë.
Spektaklet e humorit si “Apartamenti 2XL” dhe “Al Pazar” ndajnë të njëjtin çmim reklamimi për 30 sekonda, në 198,000 lekë.
Një spot publicitar 30 sekonda, te “Krasta show”, kushton 195,000 lekë, ndërsa te “Nga e para”, 156,000 lekë. Çmimet nuk kanë ndryshime të ndjeshme krahasuar me një vit më parë, të paktën për ato programe që vijojnë transmetimin.
Në Televizionin Publik Shqiptar, çmimet e reklamimit janë disa herë më të ulëta. Emisioni me tarifën më të lartë për 30 sekonda kohë transmetimi është “Njerëz të humbur”, me 50,000 lekë, ndërsa “Shih programin”, nga Enkel Demi, llogarit për të njëjtin spot, vlerën 36,000 lekë. Emisioni debat i Artur Kopanit, “Log”, zbaton një çmim për 30 sekonda transmetim, 30,000 lekë.
Audienca, përpjekje për matje shkencore
Kohët e fundit ka disa përpjekje në tregun e marketingut për të ofruar shërbim në matjen e audiencës nga aktorë profesionistë, të pavarur. Gjithsesi, qoftë reklamuesit e mëdhenj, agjencitë publicitare apo dhe vetë mediat, kryejnë studime të herëpashershme për sjelljen dhe preferencat e audiencës. Ekspertët thonë se në mungesë të një sistemi të matjes së vazhdueshme e shkencore të audiencës është pothuajse e pamundur të bëhet një planifikim dhe një shpërndarje e informuar e shpenzimeve publicitare. Mungesa e këtyre të dhënave e bën të pamundur përllogaritjen e ROI-t (kthimit të investimit) apo efektit të investimit marketing/publicitar për produktet dhe shërbimet e ndryshme që reklamohen në media.
Sipas ekspertëve, matja e audiencës do të ndihmonte në gjetjen e kanaleve më të mira, për përshtatshmërinë e një marke dhe për komunikimin e mesazheve të shumta e specifike. Rreziqet financiare janë shumë të larta, ndaj kompanitë dhe agjencitë kanë nevojë që të ndërmarrin veprime të menjëhershme për të shpenzuar sa më mirë paratë e investuara në fushën e publicitetit. Për këtë arsye, thonë ata, matja sa më objektive dhe e pavarur e audiencës është domosdoshmëri emergjente.
Kompanitë dhe agjencitë e ndryshme kanë nevojë të monitorojnë efikasitetin e parave të shpenzuara për transmetimin e një mesazhi të caktuar, për një markë të caktuar, bazuar në targetin përkatës dhe të ndërmarrin veprime për t’i përshtatur këto shpenzime në bazë të efektivitetit që ato kanë dhe shikueshmërisë së audiencës së synuar. Kjo do të shmangte shpenzimet e panevojshme për mesazhe që nuk shkojnë atje ku duhet. Si mund të arrihet kjo?
Nëpërmjet identifikimit të menjëhershëm të mundësive, – thonë ekspertët, – por edhe duke monitoruar programet apo kanalet e tjera ditën e ardhshme. Me anë të monitorimit të shikueshmërisë së programeve, kanaleve, duke bërë matjen e konkurrencës reale ndërmjet programeve dhe kanaleve të ndryshme në të njëjtin orar, në fasha orare të ndryshme, në grupmosha, etj. Për shkak të mungesës së matjes së audiencës, përcaktimi i çmimeve për blerjen e hapësirave publicitare (koha televizive), bëhet bazuar vetëm në hamendësime, në planifikimin e target audiencës së bërë nga televizionet apo duke iu referuar përvojave dhe të dhënave të emisioneve të ngjashme në vende të tjera. Gjithsesi, matja e vazhdueshme e audiencës (ose monedha e përbashkët e shkëmbimit të kohës televizive) mbetet çështje e pazgjidhur e tregut të televizioneve në Shqipëri, e cila do të shërbente si një rregullator për transaksionet në këtë treg.
Ekspertët nuk sugjerojnë domosdoshmërisht uljen e numrit të transmetimeve për njësi (frekuencës), apo kohës së përgjithshme të transmetimit të fushatave të tyre. Këshilla e tyre do të ishte: një plan i mirëstudiuar, që duhet të bazohet fillimisht në nivelin e performancës mediatike të synuar (apo në gjuhën teknike, arritja e GRP-ve të kërkuara), dhe më tej në analizën financiare të fushatave të tyre. Pra, me një fjalë, ajo çka ne përpiqemi të arrijmë për partnerët tanë, është një performancë më e mirë mediatike me buxhetet më optimale të mundshme. Për sa u përket klientëve, një pjesë e madhe e tyre janë ndërgjegjësuar tashmë për projektime të tilla të shpenzimeve të tyre publicitare. Të dhënat e brendshme të agjencive tregojnë se televizioni mbetet në masë dërrmuese kanali kryesor për të përçuar mesazhet publicitare në tregun shqiptar dhe sigurisht që të dhëna të tilla pasqyrohen edhe në analizat paraprake për klientët dhe planet e komunikimit.
Lëvizjet e reja
Nga “AS” te “Vizion Plus”
Prezantuesi i programit të mëngjesit në “Albanian Screen”, Erion Zeqiraj, pas largimit nga ky ekran shfaqet në ekranin e “Vizion Plus”, bashkë me partneren e tij në programin që bënte në “AS”. Kjo dyshe do të zëvendësojë dy vajzat e njohura në ekranin e “Vizion Plus”, pikërisht Stelën dhe Brunën. Le të shohim se si do të shfaqet Zeqiraj në këtë program, pas një përvoje gati trevjeçare në “AS”.
Me emisionet e tyre
Edi Manushi, përveç “Procesi Sportiv”, do të drejtojë formatin e ri në “Top Channel”, “Quiz”. Pandi Laço do të drejtojë spektaklin e ri në “Tv Klan” me titull “100 vjet këngë për pavarësinë”. Anjeza Maja, pas largimit nga “Tv Klan”, drejton këtë sezon emisionin “Rreze Dielli”, në “A1 Report”.
Mustafa Nano, te “Ora News”
Publicisti dhe gazetari i njohur Nano do ta rikthejë këtë emision, pas tri vitesh, tashmë jo më në “Top Channel”. Në formatin e tij, ai ka pasur personazhe të njohura dhe interesante nga të gjitha fushat. Le të shohim nëse do të ketë rikonceptim në këtë format, ndërkohë që Nano ka nisur botimin e analizave të tij në median e shkruar të këtij grupi.
Enkel Demi: Në TVSH me “Shih programin”
Pas largimit nga “ABC News”, Enkel Demi tashmë është në ekranin e TVSH-së, për të sjellë para publikut një projekt të ri. “Shih programin” titullohet programi i tij për këtë sezon. Është një talk-show, i ngjashëm me formate të tjera në ekrane, si: “A Show”, “Top Show” etj.
Besnikët e programeve të tyre
Ardit Gjebrea, më 16 shtator, prezantoi të dielën e parë të programit të tij për këtë sezon, ndërsa përgatitet për “Kënga Magjike”. Me këtë program, Ardit Gjebrea vendosi të sfidojë kohën, duke marrë përsipër që në valët e “TV Klan” të drejtojë këtë maratonë për të kapur audiencën në një kohëzgjatje gjashtë orë transmetim të drejtpërdrejtë me “talk show”, këngëtarë të ftuar, balet, lojëra, quiz-e dhe të papritura të tjera.
Adi Krasta do të shfaqet sërish këtë sezon me “A show”, në “Vizion plus” dhe Alfred Peza me formatin e tij në këtë ekran. Po ashtu, Arbana Osmani sjell në ekran “1001 pse” në mes të tetorit, ku për 12 javë, çdo të shtunë, fëmijët me pyetjet e tyre ngacmuese do të jenë përballë të rriturve. “Këtë vit, interesimi për pjesëmarrjen e fëmijëve në program ka qenë i jashtëzakonshëm, pasi me mijëra fëmijë kanë aplikuar, ndërsa do të ketë shumë risi në përmbajtje, me situata të reja veç pyetjeve ndaj VIP-ave në studio”, është shprehur Arbana. Do të vazhdojnë të jenë besnikë të programeve të tyre moderatorët e programeve të njohura politike dhe po ashtu disa drejtues të programeve argëtuese në televizionet shqiptare. Ami Toska dhe Ermal Mamaqi mund të jenë sërish prezantues të “Dancing with the stars”, Ilva Tare rivjen me “Tonight” në “Ora News”, Edi Manushi dhe Marina Vjollca me “Procesi Sportiv”. Po ashtu, Aida Shtino me “Njerëz të Humbur” në TVSH dhe Hygerta Sako me emisionin e saj do të vazhdojë në këtë ekran. Do të vazhdojnë me “Wake Up” Eno Popi dhe Ledion Liço, me “Fiks Fare” Saimir Kodra dhe Gent Pjetri, dhe Aldon Lipe me programin e tij të njohur të mëngjeseve në “TV Klan”. Ndërkohë Alketa Vejsiu do të shfaqet me spektaklin e saj “X Factor 2” në “TV Klan” në vjeshtë, ndryshe nga sezoni i kaluar.
Ky është artikull ekskluziv i Revistës Monitor, që gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”.
Artikulli mund të ripublikohet nga mediat e tjera vetëm duke cituar “Revista Monitor” shoqëruar me linkun e artikullit origjinal.