Ky sezon turistik veror do të jetë ndoshta më i vështiri për Shqipërinë në garën për të rrëmbyer nga torta e turistëve ndërkombëtarë dhe atyre vendas, të ardhura sa më të mëdha. Në fakt, çdo sezon veror, ka qenë gjithnjë një luftë e përhershme dhe e stërmundimshme për Shqipërinë, e cila, edhe pse është përmirësuar, sidomos në infrastrukturë, ka ende mangësi tipike në cilësinë e shërbimit turistik. Por ky sezon është edhe më i vështirë, jo për shkaqe të lidhura drejtpërsëdrejti me të. Përveç arsyeve të tjera që kanë penalizuar turizmin shqiptar në vite, rrethana të reja kanë rritur rrezikun. Vendi duhet të trembet nga “braktisja” që shqiptarët do t’u bëjnë plazheve të tyre. Sinjalet tashmë duken, madje janë të forta. Liberalizimi i vizave këtë vit ka rritur numrin e individëve që preferojnë destinacione të reja turistike, që më parë kanë qenë të ndaluara, për shkak të mungesës së një vize. Në hartën e lëvizjes së turistëve shqiptarë janë shtuar shumë vendet europiane. Janë rritur preferencat për Spanjën, Italinë, kanë edhe për Francën. Ikin për pushime deri në Indonezinë e largët. Ndërkohë fqinjët si Mali i Zi dhe Turqia mbeten udhëtimet më komode në raportin çmim/shërbim. Por në horizont është shfaqur tashmë dukshëm edhe Greqia. Ofertat nga ky vend në krizën më të thellë ekonomike, por dhe afërsia gjeografike, dhe me plazh, ushqim dhe sjellje të njëjtë me Jugun e vendit, janë bërë kërcënim për turizmin e brendshëm shqiptar.
Vitin e kaluar, Shqipërinë e vizituan mbi 3 milionë vetë. Ky është rezultati më i lartë, që vendi ka arritur ndonjëherë në historinë e tij, me ndikim jo pak të ndjeshëm për të ardhurat nga turizmi. Këtë vit, numri i vizitorëve ndoshta mund të jetë edhe më i lartë. Si rrallëherë Shqipëria këtë vit ka qenë pjesë e guidave ndërkombëtare të turizmit nga agjencitë më të njohura. Në to, Shqipëria nuk u përshkrua si vend kalimtar, por si një destinacion final, ku çdo turist i huaj ka çfarë të marrë dhe të pëlqejë, duke qëndruar. Edhe nuhatja qeveritare me përqendrimin e investimeve rrugore që të çojnë drejt bregdetit, apo nuhatja e agjencive turistike, të cilat rritën numrin e aktiviteteve turistike, duke futur në paketat e argëtimit jo vetëm turizmin e detit dhe të rërës, por dhe turizmin aventuror, të sporteve të ujit, turizmin malor etj., do të ndikojnë në rritjen e numrit të turistëve. Por numri i turistëve që hyjnë në një vend, është një tregues, por jo më i rëndësishmi dhe i vetmi. Ashtu sikundër mund të vijnë turistë, edhe vendasit mund të largohen. Shqipëria këtë vit duhet të mendojë jo vetëm për të tërhequr më shumë turistë përtej kufijve të saj, por edhe për të mbajtur qytetarët e vet për të mos u larguar. Nga ky fluks hyrje-daljesh të ardhurat neto të Shqipërisë janë rritur, por jo me të njëjtin ritëm siç është rritur numri i turistëve që kanë vizituar Shqipërinë. Ndaj për të parë të vërtetën mbi turizmin shqiptar do të duhet të llogaritet treguesi i shpenzimeve për çdo turist, të kryera në një ditë qëndrimi ose ndryshe “treguesi i turistit të kënaqur”. Ky tregues ndihmon për të kuptuar sesa të fortë jemi në garën për turizmin. Kur ky tregues rritet, do të thotë se aq më shumë një turist është i gatshëm të përfitojë nga shërbimet e këtij vendi, duke harxhuar më shumë para krahasuar me një tjetër me të njëjtat çmime. Sa më i lartë ky tregues, aq më e lartë është cilësia e produktit turistik. Sa më i ulët ky tregues, aq më të shumta janë shanset që ky turist të mos kthehet më, pasi nga vendi që viziton ofron pak shërbime dhe me cilësi të ulët. Sot Shqipëria nuk mundet ta bëjë këtë llogari për disa rrethana.
Megjithatë gara për mjedis të pastër higjienikisht, për cilësi shërbimi apo akomodimi, gara me çmimet dhe ofertat është një garë e përjetshme, sepse dhe kur mendon se janë arritur standardet, veçanërisht në turizëm, standarde të reja shfaqen edhe më të larta. Shqipëria, edhe pse ka probleme shumë më të mëdha se vendet konkurruese, ajo ka çfarë të ofrojë. Përmirësimi i vazhdueshëm dhe i dukshëm dhe infrastrukturës jo vetëm rrugore në tërësi, rritja e edukatës turistike, qetësia dhe stabiliteti janë ogur mirë, por Shqipëria ende nuk di të thotë se e fortë qëndron në këtë garë.