Google, gati për Nexus 7 me 32GB dhe Samsung Nexus II
Tableti i ri i Google, Nexus 7, momentalisht ofrohet në dy versione, njëri me 8GB dhe tjetri me 16GB, ndërsa duket se Google dhe Asus tani janë duke u përgatitur që të lançojnë edhe modelin e ri të kësaj linje, versionin me më shumë memorie të brendshme.
Sipas DroidLife thuhet se Google Nexus 7 Tablet do të fillojë të ofrohet edhe në versionin 32GB dhe për ta konfirmuar një gjë të tillë, shitësi britanik me pakicë Carphone Warehouse ka publikuar një fotografi të këtij modeli, të cilin thotë se e ka në stokun e tij.
Në foton e publikuar nga zinxhiri i dyqaneve shihet edhe emri i telefonit të mençur, Samsung Nexus 2, i cili nuk është prezantuar ende zyrtarisht.
Nëse kjo fotografi është e vërtetë, atëherë kjo do të thotë se Samsung do të ketë edhe një model tjetër të avancuar të telefonit, i cili do të prodhohet enkas për partnerin e saj Google.