Statistika/ Indeksi i shifrës së afarizmit në volum, T IV 2012
Indeksi i shifrës së afarizmit në volumi në tremujorin e katërt 2012 arriti 212.4%, kundrejt tremujorit mesatar (2005=100), duke shënuar një rritje prej 1.7% krahasuar me tremujorin e katërt 2011 dhe 0.8% krahasuar me tremujorin e mëparshëm.
Në Industri, shifra e afarizmit e deflatuar krahasuar me tremujorin e katërt të vitit të mëparshëm, ka një rritje prej 4.5%, ndërsa me tremujorin e mëparshëm ka një rënie prej 9.1%.
Krahasuar me të njëjtën periudhë të vitit të mëparshëm, Industria Nxjerrëse dhe Energjia elektrike si dhe furnizimi me ujë paraqiten respektivisht me rritje 32.8% e 23.5%.
Industria Përpunuese për të njëjtën periudhë ka një rënie prej 5.7%.
Industria Nxjerrëse dhe Industria Përpunuese në tremujorin e katërt krahasuar me tremujorin e mëparshëm paraqiten me rënie përkatësisht 0.3% dhe 16.8%, ndërsa Sektori i Energjisë paraqitet me rritje 10.1%.
Në Ndërtim, volumi i shifrës së afarizmit paraqitet me rënie 13.3% krahasuar me tremujorin e katërt 2011, ndërsa krahasuar me tremujorin e mëparshëm, ky aktivitet paraqitet me rritje 13.4%.
Në Sektorin e Shërbimeve, ku përfshihen aktivitetet ekonomike Tregti, Hotele, Transport, Shërbime Informatike dhe Arkitekturore, në tremujorin e katërt 2012 krahasuar me të njëjtën periudhë të vitit të kaluar ka një rritje prej 4.1%, si dhe me tremujorin e mëparshëm, në të cilin rritja është 1.9%.
Në Tregti, indeksi paraqitet me rritje 1.5% krahasuar me të njëjtën periudhë të vitit të kaluar, si dhe me tremujorin e mëparshëm, në të cilin rritja është 0.8%.
Në Transport dhe Komunikacion, në tremujorin e katërt 2012 ky tregues paraqet rritje me 18.1% krahasuar me tremujorin e njëjtë të vitit të mëparshëm, dhe 6.3% krahasuar me tremujorin e mëparshëm.
Burimi: INSTAT