Statistika/ Kredia e re sipas sektorëve janar-maj 2013
Dy janë sektorët , që kanë arritur që të marrin më shumë hua në vlerë absolute gjatë pesë muajve të parë të këtij viti, “tregtia, riparimi i automjeteve” dhe “ prodhimi, shpërndarja e energjisë elektrike, gazit e ujit”. Kredia e re për sektorin e fundit, ka qenë e vetmja që ka shënuar rritje me bazë vjetore për periudhën janar-maj 2013.
Të dhënat bëhen të ditura nga statistikat mujore të Bankës së Shqipërisë për kredinë e re sipas aktivitetit ekonomik.
Sipas statistikave, sektori i tregtisë ka marrë 35% të totalit të kredisë së re të dhënë për periudhën janar-maj të këtij viti, rreth 23 miliardë lekë, ndërkohë që “ prodhimi, shpërndarja e energjisë elektrike, gazit e ujit”, ka marrë rreth 10 miliardë lekë, apo rreth 15% të totalit, kryesisht si rrjedhojë e një kredie të marrë nga KESH në janar të këtij viti.
Ndërkohë, investimet në ekonomi duket se janë frenuar thuajse tërësisht, me kredinë e re për industrinë nxjerrëse e përpunuese, që kanë rënë përkatësisht me 74% dhe 11% për periudhën janar-maj 2013, në raport me të njëjtën periudhë të vitit të kaluar.
Edhe huaja për ndërtimin ka rënë me 20% me bazë vjetore për periudhën në fjalë, duke e bërë këtë sektor të papreferuar për bankat, ndryshe nga disa vjet më parë.
Në total, kredia e re për bizneset ka rënë me 27% me bazë vjetore për pesë muajt e parë të vitit. Ndonëse në vlerë absolute, huaja për tregti zë peshën më të madhe, ajo ka rënë ndjeshëm, me rreth 45% në raport me të njëjtën periudhë të vitit të kaluar.
Në rritje ka qenë vetëm huaja për kompanitë shtetërore ( prodhimi, shpërndarja e energjisë elektrike, gazit e ujit), që u zgjerua me rreth 60% me bazë vjetore për periudhën janar-maj 2013.
Burimi: Banka e Shqipërisë