Statistika/Indekset e volumit në tregtinë me pakicë dhe tregtinë dhe riparimin e automjeteve
Tremujori i dytë ka dhënë sinjale pozitive se konsumi i individëve ka filluar të gjallërohet. Këtë tendencë e konfirmoi dhe guvernatori i Bankës së Shqipërisë në daljen e fundit publike ku konstatoi se konsumi ka shënuar rritje, ndonëse të plogësht, ndërkohë që investimet vazhdojnë të tkurren.
Sipas INSTAT, indeksi i volumit të shitjeve në tregtinë me pakicë në tremujorin e dytë 2013 arriti 180.9%, kundrejt vitit bazë (2005=100).
Krahasuar me të njëjtën periudhë të vitit paraardhës, indeksi i volumit të shitjeve në tregtinë me pakicë është rritur 11.3%, ndërsa krahasuar me tremujorin paraardhës është rritur 7.5%.
Në grupin “Ushqime, pije, duhan në njësi tregtare jo të specializuara” indeksi i volumit të shitjeve është rritur 8.5% në këtë tremujor krahasuar me tremujorin paraardhës.
Në grupin “Tregtia, mirëmbajtja dhe riparimi i automjeteve dhe motoçikletave”, indeksi i volumit të shitjeve për tremujorin e dytë 2013 është rritur 13.2% krahasuar me tremujorin e njëjtë të vitit paraardhës.
Krahasuar me tremujorin paraardhës, indeksi i volumit të shitjeve në grupin “Tregtia, mirëmbajtja dhe riparimi i automjeteve dhe motoçikletave” është rritur 9.7%.