Tregtia sipas shteteve, 9 mujori- 2013
Italia mbetet partneri kryesor i Shqipërisë, si përsa i përket eksporteve ashtu dhe importeve, duke zënë 38% të totalit të volumit tregtar me Shqipërinë, me një rritje prej dy pikë përqindjeje në krahasim me të njëjtën periudhë të vitit të kaluar.
Pavarësisht rënies së interesit për të bërë biznes me Greqinë gjatë viteve të fundit, si rrjedhojë e krizës së borxheve që po kalon shteti Helen, fqinji kufitar vazhdon të mbetet partneri i dytë i vendit, përsa i përket volumit tregtar, kryesisht si rrjedhojë e eimporteve ende të larta, ndërsa eksportet drejt këtij vendi kanë rënë ndjeshëm. Megjithatë, pesha e Greqisë në totalin e tregtisë (import-eksport), që Shqipëria ka me shtetet e tjera, ka rënë nga 8% në 9 -mujorin 2012 në 7% në të njëjtën periudhë të 2013-s.
Pas Greqisë, renditen Gjermania dhe Turqia, me nga 6% të volumit tregtar secila.
Për importet, Italia është destinacioni kryesor nga blejmë mallra apo produkte të ndryshme, me 31% të totalit.
Greqia është partneri i dytë për importet, me 9%, me një rënie të lehtë të peshës në raport me 9- mujorin e një viti më parë.
Kina ka kaluar në vitin 2013, si partneri i tretë më i madh i importeve, duke lënë pas Gjermaninë dhe Turqinë.
Gjeografia e eksporteve është zgjeruar ndjeshëm vitet e fundit, megjithatë Italia vazhdon që të mbetet pritësi kryesor i produkteve të prodhuara, apo të përpunuara në Shqipëri. Drejt këtij shteti shkuan 46% e eksporteve për periudhën janar-shtator 2013, pjesa më e madhe e të cilave janë tekstile e këpucë, me material porositësi. Megjithatë, rëndësia e Italisë ka rënë, teksa ky vend zinte 50% të shitjeve tona jashtë në të njëjtën periudhë të një viti më parë.
Spanja ka kaluar me shpejtësi në partnerin e dytë tregtar të eksporteve, si rrjedhojë e shitjeve të naftës nga kompania Bankers Petroleum drejt këtij shteti. Pesha e Spanjës është rritur në 11% për 9 mujorin 2013, në raport me 9% në të njëjtën periudhë të një viti më parë.
Pas një periudhe të mbarë që pas vitit 2009, kur rruga mes Shqipërisë dhe Kosovës afroi distancat mes dy vendeve, pesha e eksporteve drejt Kosovës ra me 1 pikë përqindjeje në 7%, teksa dy shtetet kanë ngritur barriera jo tregtare mes njëri tjetrit, duke penguar tregtinë e disa produkteve, si tullat, apo prodhimet ushqimore.
Greqia, që ishte disa vite më parë, pritësi i dytë i eksporteve tona, tashmë renditet si partneri i gjashtë, duke zënë vetëm 3% të totalit të eksporteve për 9 mujorin 2013.
Burimi: INSTAT