Eksportet, tetor 2013
Për periudhën janar-tetor 2013, kompanitë shqiptare kanë shitur jashtë vendit rreth 204 miliardë lekë, me një rritje prej 16% në krahasim me të njëjtën periudhë, duke ruajtur të njëjtat ritme rritje si për 9 mujorin, sipas të dhënave të tregtisë së jashtme, të publikuara nga INSTAT.sions f
Materialet e ndërtimit, kanë vijuar tendencën e tyre rënëse, ndërkohë që grupmallrat “minerale, lëndë djegëse e energji” si dhe “tekstilet e këpucët” kanë vijuar me ecurinë e tyre pozitive, ndonëse eksportet e mineraleve,lëndëve djegëse e energjisë kanë ngadalësuar ritmet e rritjes.
Eksportet e “minerale, Lëndë djegëse e energji” u rritën me 34.5% për janar-tetor 2013 (nga rreth 36% që ishte rritja për 9 mujorin), duke arritur në 83 miliardë lekë dhe duke përbërë zërin kryesor të eksporteve vendase, me rreth 40% të totalit. Prej dy vitesh ky grup-mall po rritet me shpejtësi, si rrjedhojë e eksporteve të larta të naftës nga kompania Bankers Petroleum. Megjithatë, ritmet e rritjes së këtij grupmalli u ngadalësuan për dhjetëmujorin, si rrjedhojë e energjisë, që nuk u eksportua më për shkak të kushteve të pafavorshme të motit.
Eksportet e tekstileve e këpucëve kanë vijuar me tendencën pozitive të këtij viti, pas rënies prej rreth 4% me bazë vjetore vitin e kaluar. Për periudhën janar-tetor 2013, ato u rritën me 11.2% në rreth 58 miliardë lekë, duke përbërë 29% të totalit të eksporteve dhe duke përmirësuar vazhdimisht ritmet e rritjes përgjatë muajve të fundit. Shtimi i porosive nga partnerët italianë, që po largohen nga Kina dhe Lindja e Mesme, në përpjekje për të qenë më eficientë, ka ndikuar në përmirësimin e sektorit të fasonit, ku rritjen më të madhe po e shënojnë eksportuesit e këpucëve.
Eksportet e materialeve të ndërtimit e metaleve ranë me 14% me bazë vjetore në 28.5 miliardë lekë për periudhën janar-tetor. Që nga maji, ky grupmall ka njohur vetëm rënie, kryesisht si rrjedhojë e performancës negative të tullave drejt Kosovës dhe çelikut. Megjithatë, tetori ka shënuar një ecuri më positive, teksa rënia e eksporteve të këtij grupmalli, në raport me të njëjtën periudhë të një viti më parë ka qenë minimale.
Ecuri pozitive kanë shënuar dhe eksportet e prodhimeve të drurit dhe letrës, të cilat janë rritur me rreth 50% me bazë vjetore (apo rreth 2 miliardë lekë) për 10 mujorin, megjithëse pesha e tyre ndaj totalit të eksporteve mbetet e ulët.
Me rritje kanë qenë dhe eksportet e ushqimeve, pijeve e duhanit, të cilat janë zgjeruar me 15% (1.5 miliardë lekë) me bazë vjetore.
Burimi: INSTAT