Të punësuarit sipas sektorëve
INSTAT ka publikuar shifrat më të fundit të anketës së forcave të punës, me të dhënat deri në fund të 2012-s. Sipas këtyre informacioneve rezulton se sektori i ndërtimit është ai që ka humbur më shumë vende pune, duke reflktuar krizën e thellë që po kalon ky sektor.
Sipas INSTAT, të punësuarit në këtë sektor kanë rënë në 29 mijë në fund të vitit 2012, nga 35 mijë në vitin e mëparshëm dhe 56 mijë që ishin të punësuarit në ndërtim në vitin 2003.
Të njëjtën tendencë kanë dhe të punësuarit në industrinë përpunuese, të cilët nga rekordi i lartë prej 63 mijë që kishin arritur në 2011 zbritën në 50 mijë në 2012.
Ulja e të punësuarve në këto dy sektorë është kompensuar me hapjen e vendeve të reja në tregti, nga 65 mijë persona në 2011 në 83 mijë vetë në 2012, duke përbërë gati 20% të të punësuarve në sektorin jo bujqësor.
Në rritje ka qenë dhe numri i të punësuarve në sektorë të tjerë, kryesisht ato të shërbimeve, që kanë arritur në 132 mijë në fund të vitit 2012, nga 91 mijë që ishin në vitin 2005.
Në sektorët e tjerë numri i të punësuarve nuk ka shënuar ndryshime të dukshme nga viti në vit.
Interesante paraqitet gjithsesi, tendenca e punësimit në bujqësi. Pas një uljeje të vazhdueshme të personave që llogariten si të vetëpunësuar në këtë sektor, – nga 767 mijë në vitin 2000, në 496 mijë në 2010 – numri i tyre ka ardhur sërish në rritje në dy vitet e mëpasshme, për t’u rritur në 522 mijë në fund të vitit 2012.
Burimi: INSTAT