Shkalla e pjesëmarrjes në forcat e punës sipas gjinisë dhe grupmoshës
Të punësuar gjithsej në vitin 2012 janë 1.117 mijë persona ku femrat përbëjnë 43,9 përqind të të punësuarve ndërsa meshkujt 56,1 për qind.
Sipas rezultateve të AFP 2012, shkalla e punësimit për femrat në moshë 15-64 vjeç është 49,5 për qind ndërsa për meshkujt ky tregues është 63,2 për qind.
Duke e analizuar punësimin gjithsej sipas sektorëve të ekonomisë, është e dukshme që në sektorin privat jo-bujqësor, dominojnë meshkujt ku të punësuarit meshkuj përbëjnë 69,2 për qind të të gjithë të punësuarve në këtë sektor.
Në sektorin privat bujqësor janë femrat ato që zënë përqindjen më të lartë të të punësuarve në këtë sektor (54,5 për qind) ndërsa në sektorin shtetëror, femrat përbëjnë 43,9 për qind të punësimit total në këtë sektor.
Sipas rezultateve të Anketës së Forcave të Punës në vitin 2012 rezultojnë si të papunë 173.420 persona ku femrat përbëjnë 38,8 për qind të të papunëve.
Të papunët afatgjatë përbëjnë 77,3 për qind të të gjithë të papunëve.
Referuar Anketës së Forcave të Punës 2012, shkalla e papunësisë është 13,4 për qind, ku për femrat ky tregues është 12,1 për qind ndërsa për meshkujt është 14,5 për qind.
Shkalla e papunësisë për femrat e grupmoshës 15-29 vjeç është 21,4 për qind ndërsa kjo shifër rezulton më e ulët për femrat e grupmoshës 30–64 vjeç me 9,7 për qind.
Shkalla e papunësisë për meshkujt e grupmoshës 15-29 vjeç është 27,4 për qind ndërsa për meshkujt e grupmoshës 30-64 vjeç është 10,2 për qind.
Burimi: INSTAT