Ecuria e të ardhurave buxhetore, janar-mars 2014
Tatimet dhe doganat kanë përmirësuar ndjeshëm ritmin e mbledhjes së të ardhurave në buxhet për tremujorin e parë të vitit, duke marrë veten nga fillimi i dobët i dy muajve të parë, ku me rezultat pozitiv paraqitet veçanërisht TVSH-ja, ndërkohë që financat janë ndihmuar dhe nga të ardhurat më të larta sesa pritej nga ndihmat (2.3 miliardë lekë më të larta se plani, duke ndikuar në 25% të shtimit të të ardhurave totale në buxhet (në vlerë absolute të ardhurat në buxhet u rritën me 6.2 miliardë lekë me bazë vjetore për tre mujorin e parë 2014).
Sipas statistikave fiskale të publikuara nga Ministria e Financave, për tre mujorin e parë të vitit u mblodhën në buxhet 82 miliardë lekë, me një rritje prej 8.2% me bazë vjetore. Për herë të parë vitet e fundit janë arritur që të mblidhen rreth 1.2 miliardë lekë më shumë se plani i fillim vitit.
Të ardhurat nga tatimet e doganat u zgjeruan me 9.3% (apo me rreth 4.8 miliardë lekë) me bazë vjetore në 56.3 miliardë lekë për periudhën janar-mars 2014.
Zëri kryesor që ndikoi në ecurinë e mirë të të ardhurave nga tatimete doganat ishte TVSH-ja, që u zgjerua me 4.7 miliardë lekë, apo rreth 20%, në 28.7 miliardë lekë. Ecuria e TVSH-sëështë krejt e kundërt nga ajo e vitit të kaluar, ky tkurrja e këtij zëri reflektonte një ulje të qarkullimit në ekonomi.
Të ardhurat nga akciza u tkurrën me 13% me bazë vjetore, në rreth 6 miliardë lekë (2 miliardëlekë më pak se plani) duke vazhduar të reflektojnë shtrembërimin e tregut, pas importeve të larta të dhjetorit, në pritje të hyrjes në fuqi të akcizave të reja nga 1 janari 2014.
Fundi i tremujorit të parë pritej të tregonte të saktë tendencën e të hyrave nga tatim fitimi, me financat që shpresonin që të mblidhnin 50% më shumë të ardhura se janar-mars i vitit të kaluar, si rrjedhojë e rritjes së tatim fitimit nga 10 në 15% nga 1 janari (në bazë të skemës së re, tatim fitimi paguhet një herë në tre muaj, jo çdo muaj si më parë). Ndonëse ritmi i mbledhjes së këtij zëri u përmirësua në shkurt-mars, pas një janari të dobët, sërish të hyrat nga ky zë u shtuan vetëm me rreth 18% me bazë vjetore për tremujorin 2014, duke treguar se rritja e tatim fitimit për bizneset nuk po sjell rezultatet e planifikuara në buxhet.
Të ardhurat nga sigurimet shoqërore ranë me 5.7%, ndërsa të hyrat nga sigurimet shëndetësore u dyfishuan në 2.3 miliardë lekë, duke qenë faktori i tretë pas TVSH-së dhe ndihmave që ndikuan në rritjen e të ardhurave në buxhet.
Të ardhurat tatimore ranë me 6.5%, ku bie në sy rënia e transferimit të fitimit nga Banka e Shqipërisë që u reduktua me 57.4%.
Burimi: Ministria e Financave