Eksportet janar-shtator 2014
Eksportet mallrave shqiptare drejt tregjeve të huaja arritën në fund të periudhës nëntëmujore në 192.7 miliardë lekë ose 1.9 miliardë dollarë. Në krahasim me një vit më parë eksportet u rriten përafërsisht me 5 për qind duke reflektuar kështu një frenim të rritjes në krahasim me vitet e mëparshme.
Në vitin paraardhës eksportet në vlerë shënuan për periudhën janar-shtator rreth 181.6 miliardë lekë.
Veçanërisht në muajin shtator 2014 eksportet e mallrave arritën vlerën 21 mld lekë, duke u ulur me 0,4 % në krahasim me shtator 2013 dhe duke u rritur me 14,5 % në krahasim me Gusht2014.
Rënie më të madhe vjetore ka pasur në eksportet e grupeve: “Minerale, lëndë djegëse, energji elektrike” me 34,5 % dhe “Lëkurët dhe artikujt prej tyre” me 7,7 %.
Rritje më të madhe vjetore patën eksportet e grupeve “Tekstile dhe këpucë” me 27,5 % dhe “Makineri, pajisje dhe pjesë këmbimi” me 25,3 %.
Në kushtet kur të ardhurat e emigrantëve po vijnë në rënie dhe investimet e huaja nuk janë më aq të sigurta, eksportet shndërrohen burimi kryesor i hyrjes së valutës në ekonominë shqiptare. Madje dy vitet e fundit, prurjet nga eksportet e kanë marrë këtë rol.
Nisur nga këto zhvillime, të gjitha institucionet financiare ndërkombëtare por edhe ekspertët vendas rekomandojnë si një zgjidhje afatgjatë të rritjes ekonomike, rritjen e prodhimit vendas dhe për rrjedhojë edhe eksportit.
Për të arritur këtë synim qeveria po tenton të rrisë investimet në prodhimin e energjisë elektrike nëpërmjet ndërtimit të veprave të reja të prodhimit dhe privatizimit të disa HEC-ve ekzistuese. Kjo për shkak se eksporti i energjisë vitet e fundit ka qenë promotori themelor për rritjen e ekonomisë shqiptare.
Gjithashtu, rritja e prodhimit bujqësor nëpërmjet nismave të subvencionit në bujqësi është një mjet tjetër që në periudha afatmesme Shqipëria të konkurrojë, sidomos në rajon, me eksportin e hershëm të prodhimeve bujqësore. Hyrja e një sasie të konsiderueshme valute nga eksportet do të ndikojë pozitivisht në forcimin e vlerës së lekut dhe në përmirësimin e tregtisë së mallrave.
Burimi: INSTAT