Ky është mesazhi i teknologjisë së Bashkimit Evropian, të cilin Margrethe Vestager synon të përcjellë të Mërkurën kur ajo pritet të zbulojë planet për të ndihmuar bllokun të konkurrojë me SHBA dhe fuqinë teknologjike të Kinës me kushtet e veta, në përputhje me të drejtat themelore të BE-së, përfshirë rregullat e rrepta të privatësisë dhe mosdiskriminimit.
Vestager, nënkryetari ekzekutiv i Komisionit Evropian për punët dixhitale, po përpiqet të sigurojë evropianët se ajo mund të trajtojë shqetësimet se Evropa po bëhet e parëndësishme ndërsa kompanitë aziatike dhe amerikane mbizotërojnë tregjet e teknologjisë së lartë.
Strategjia “do të prodhojë dhe vendosë shumë më tepër inteligjencë artificiale” në Evropë, por “nuk do të jetë njësoj” si në ShBA dhe në Kinë, tha Vestager në një konferencë shtypi për gazetarët përpara njoftimit. Bazuar në ato që ajo di për praktikat e tyre, UA kineze mund të mos i plotësojë standardet evropiane, tha ajo.
Inteligjenca artificiale ka filluar të depërtojë në çdo pjesë të shoqërisë, që nga sugjerimet për blerje dhe asistentët e zërit deri te vendimet rreth punësimit, sigurimit dhe zbatimit të ligjit, duke provokuar shqetësime për intimitetin, saktësinë, sigurinë dhe drejtësinë.
Në situata kur përdorimi i UA mund të paraqesë rreziqe për sigurinë e njerëzve ose statusin e tyre ligjor ose të punësimit, siç janë ato që përfshijnë vetura që drejtojnë vetveten ose identifikimin biometrik, kërkesat e BE-së mund të përfshijnë zbatimin e kontrolleve të konformitetit nga autoritetet publike, tha Vestager.