Banka Europiane e Investimeve (BEI), banka e Bashkimit Europian, do të sigurojë një hua prej 200 milionë eurosh për Fondin e Zhvillimit të Republikës së Serbisë për rimëkëmbjen më të shpejtë të Ndërmarrjeve të Vogla dhe të Mesme (NVM) nga COVID-19.
Ky është operacioni i gjashtë në vend i zbatuar nga BEI, nën paketën financiare Team Europe për Ballkanin Perëndimor, duke e çuar mbështetjen financiare totale të BEI për përshpejtimin e rimëkëmbjes së Serbisë nga COVID-19, në 380 milionë euro. Kredia do të përshpejtojë rimëkëmbjen e sektorit privat, do të rrisë aktivitetin ekonomik dhe do të ndihmojë në ruajtjen e mbi 47 000 vendeve të punës, si dhe do të krijojë 5 500 vende të reja pune në Serbi.
Fondet e BEI do të jenë në dispozicion të bizneseve të vogla serbe për nevoja të kapitalit qarkullues dhe financimit të investimeve afatgjata në kushte më fleksibël dhe të favorshme. Ato janë krijuar për të maksimizuar ndikimin dhe për të ofruar mundësi të ndryshme disbursimi, duke bërë të mundur që NVM-të, të cilat kanë nevojë urgjente për likuiditet, të kenë qasje më të shpejtë në fonde.
Nënkryetarja e BEI-t, Lilyana Pavlova, e cila është përgjegjëse për operacionet e huazimit në Serbi tha: “Si një partner i vjetër i Serbisë dhe një anëtar i Team Europe, BEI vazhdon të mbështesë vendin në kapërcimin e pasojave më të menjëhershme të lidhura me COVID-19, forcimin e ekonomisë së vendit dhe përparimin e integrimit në BE.
Mbështetja për sektorin privat është pjesë e rëndësishme e këtij procesi dhe përparësia jonë në këtë moment është të ndihmojmë në rigjallërimin e sektorit të prodhimit, duke mbrojtur zinxhirët e furnizimit dhe vendet e punës. Operacioni ynë sot kanalizon 200 milionë euro drejt NVM-ve më të prekura në Serbi. Kjo ndihmë shumë e nevojshme financiare mundëson vazhdimësinë e biznesit dhe rrit qëndrueshmërinë e ekonomisë serbe, duke hapur rrugën për një rimëkëmbje më të shpejtë pas COVID-19 dhe një konkurrencë më të madhe”.
Sinisa Mali, ministrja e Financave, tha: “Që nga fillimi i pandemisë, qeveria e Republikës së Serbisë ka vazhduar të ofrojë mbështetje të vazhdueshme për ekonominë dhe qytetarët serbë, duke lehtësuar pasojat negative të koronavirusit. Ne kemi miratuar dhe zbatuar dy paketa financiare thelbësore për ekonominë dhe qytetarët tanë, dhe programi i tretë aktualisht është duke u zbatuar. Të gjitha këto paketa arrijnë në 8 miliardë euro në total, duke zënë 17.4% të Prodhimit të Brendshëm Bruto. Falë këtyre masave ndihmëse, ne kemi arritur të mbrojmë ekonominë, të ndihmojmë ndërmarrjet të vazhdojnë operacionet e tyre dhe të ruajnë vendet e punës.
Të tre programet përfshijnë edhe mbështetje për Ndërmarrjet e Vogla dhe të Mesme, në formën e ndihmës financiare me pagimin e pagës minimale, autorizimin për punëdhënësit për të shtyrë pagesat e taksave, dhe sigurimin e financimit të favorshëm me dy skema garancie. Rëndësia e Ndërmarrjeve të Vogla dhe të Mesme për të gjithë ekonominë është e paçmueshme dhe ne jemi të lumtur që mund të vazhdojmë forcimin e këtij sektori së bashku”.
Andjelka Atanaskovic, ministrja e Ekonomisë, tha: “Ashtu si ekonomia globale, Serbia po përballet me rreziqe dhe pasiguri për shkak të epidemisë së shkaktuar nga COVID-19. Viti i kaluar ishte shumë sfidues dhe për të zbutur pasojat negative në sektorin e NVM-ve dhe për të ruajtur stabilitetin e sistemit financiar dhe ekonomik, qeveria e Serbisë arriti të mbështesë ndërmarrjet në ruajtjen e biznesit të tyre.
Synimi i qeverisë së Serbisë është që të vazhdojë këtë trend dhe të sigurojë mbështetje shtesë për subjektet ekonomike në prokurimin e kapitalit qarkullues dhe ruajtjen e likuiditetit aktual, në mënyrë që ata të mund të përmbushin detyrimet ndaj partnerëve të tyre të biznesit, punonjësve dhe shtetit. Duke pasur parasysh interesin e madh midis bizneseve për këtë mbështetje të qeverisë, na duheshin fonde shtesë, dhe ato erdhën në formën e mbështetjes së kredisë nga BEI.
Falë kësaj linje kredie, qeveria e Republikës së Serbisë, do të ndihmojë subjektet e biznesit për të investuar në këtë moment sfidues. Programi i investimeve “Rimëkëmbja dhe Zhvillimi” krijon një linjë të re krediti duke alokuar fonde kredie për subjektet e biznesit me kushte të favorshme për zbatimin e investimeve të reja, gjë që do të përshpejtojë rimëkëmbjen dhe rritjen e aktivitetit ekonomik në Republikën e Serbisë, pavarësisht kushteve të vështira ekonomike pas pandemisë.
Synimi i këtij projekti, me ndihmën e BEI-t, është të kontribuojë në rimëkëmbjen dhe zhvillimin e NVM-ve, duke mbështetur investime të reja, duke ruajtur punësimin, duke inkurajuar zhvillimin ekonomik, sipas parimeve të zhvillimit të qëndrueshëm dhe duke përmirësuar aftësinë konkurruese në dixhitalizimin dhe aplikimin e teknologjive të reja”.
Mateja Norčič Štamcar, përgjegjës në delegacionin e BE-së në Serbi, tha: “Bashkimi Europian e ka mbështetur Serbinë që nga fillimi i pandemisë, në fazën e menjëhershme të urgjencës dhe në mbështetjen e fushatës së vaksinimit. Është një zgjedhje e natyrshme që Bashkimi Europian të vazhdojë të mbështesë edhe ekonominë. Ne kemi drejtuar disa nga grantet tona drejt këtij qëllimi. Asetet financiare të ofruara nga BEI janë një pjesë integrale e strategjisë sonë për t’i bërë NVM-të më të forta. Ato janë shtylla e ekonomisë”.
Video / Monitor Ekonomi
