Bode: Në 2013 rritja 4%; PS:Ekonomia nuk përballon borxhin e lartë

23/11/2012 3:06 PM 0 komente

Qeveria shqiptare është optimiste për ritmin e rritje së ekonomisë së vendit. Buxheti i vitit 2013 parashikon rritje.  Opozita vlerëson se janë shkelur afatet kushtetuese, ndërsa shprehet se ekonomia nuk është në gjendje të përballojë një nivel të lartë borxhi

Ministri i Financave, Ridvan Bode prezantoi në Komisionin e Ekonomisë projektbuxhetin e vitit 2013.  Sipas numrit një të financave, në buxhetin e vitit të ardhshëm fokusi do të jetë rritja ekonomike e cila parashikohet të jetë në nivelin 4%, më e larë se në vendet e rajonit.

Sipas Ministrit të Financave, ekonomia shqiptare ka reaguar mirë ndaj krizës, ka demonstruar rritje të mirëqenies shoqërore. “ Buxheti i vitit 2013 do të jetë proaktiv, për të synuar rritjen ekonomike, do të programojë mbajtjen e investimeve publike në nivele të larta kundrejt rajonit” tha Bode.

Gjatë fjalës së tij në komisioni ai është ndalur edhe në vlerësimin e ekonomisë gjatë vitit 2012, vit në të cilin është ndier presioni i krizës botërore, duke e cilësuar si një problem kyç.

“Gjatë këtij viti tkurrja e rritjes ekonomike erdhi edhe për shkak të motit. Mund të them se ky vit ka qenë ndër më të vështirët për ekonominë. Inflacioni u mbajt në nivelin 2%, papunësia u llogarit në 13.3% me rënie në masën 0.2%” tha ministri.

Kreu i Financave, foli edhe për gjendjen e sistemit bankar në Shqipëri, që sipas tij kanë fitim të mjaftueshëm për të mbuluar  moskthimin e kredive. Ai e vlerësoi gjendjen e këtij sistemi të shëndetshme.  “Në vitin 2012, depozitat u rritën me 10%, ndërsa kredia me 5.8%. Edhe pse ka rritje të kredive me probleme, kjo nuk përbën rrezik për sistemin” tha ministri.

Ndërsa për deputeten  e Partisë Socialiste Mimi Kodheli ky buxhet ka shkelur detyrimet ligjore dhe kushtetuese. “ Buxheti duhet të ishte paraqitur në datë 1 nëntor, një gjë e tillë tregon se ka pasiguri për të dhënat dhe frikë për mosrealizimin e objektivave” tha Kodheli.

Sipas saj rreth 850 miliardë lekë do të cekë borxhi vitin e ardhshëm, ndërsa 16% e Prodhimit të Brendshëm Bruto do të jenë pagesat e borxhit. “Ekonomia nuk e përballon dot këtë borxh i cili është më i larti në rajon” tha Kodheli.

 

Komente

avatar
  Subscribe  
Notify of