Bullgari, Koreja e Jugut importon verë, vajrat esencialë dhe produktet e qumështit

04/10/2019 10:02 PM 0 komente
TEMA TE NGJASHME:

Produktet bullgare, përfshirë verërat, vajrat esencialë dhe produktet e qumështit kanë një potencial të madh për t’u eksportuar në tregun e Koresë së Jugut. Kjo u bë e qartë në një takim të zhvilluar në Seul midis ministrit të Ekonomisë, Emil Karanikolov, dhe kryetarit të Shoqatës së Importuesve të Koresë (KOIMA), z. Kwang-hee Hong.

Shoqata e Importuesve të Koresë, KOIMA, është një organizatë me mbi 8,000 anëtare, e cila është themeluar në vitin 1970. Kjo është e vetmja organizatë biznesi në Republikën e Koresë që synon të mbështesë importet nga jashtë duke luajtur një rol të rëndësishëm në promovimin e tregtisë së vendit.
Në takimin e zhvilluar në Seul, kjo organizatë tregoi interes për produkte të ndryshme bullgare të cilësisë së lartë, të cilat shpreson se do të importohen në Korenë e Jugut. Në 2018, eksportet bullgare në Korenë e Jugut kapërcyen vlerën 106 milionë dollarë amerikanë. “Ne i mbështesim forume dhe aktivitete të tilla biznesi, duke qenë se ato janë një formë e mirë për të vendosur bazat për projekte të tjera të përbashkëta”, tha ministri Karanikolov.

Në takimet me përfaqësuesit koreanë të biznesit, ministri bullgar i Ekonomisë theksoi avantazhet e Bullgarisë si një destinacion tërheqës investimesh. Sipas tij, qeveria është në dialog të vazhdueshëm dhe partneritet me biznesin për zbatimin e politikës ekonomike të jashtme të qëndrueshme që synon zgjerimin e pranisë së tregut, përmirësimin e kushteve për qasje në tregjet e huaja dhe tërheqjen e investimeve të huaja. “Ne mbështesim sektorët me vlerë të lartë të shtuar të orientuar nga eksporti dhe me potencial të lartë për zbatimin e inovacionit në prodhim”, shtoi ai.

Në vizitën zyrtare, z. Karanikolov u takua me zëvendësministrin e Tregtisë, Industrisë dhe Energjisë së Republikës së Koresë. Gjatë bisedimeve, ministri i Ekonomisë theksoi se Republika e Koresë është një prej partnerëve strategjikë në sektorin e ekonomisë në Azi. Përpjekjet e Bullgarisë janë përqendruar në promovimin e bashkëpunimit dypalësh dhe forcimin e lidhjeve ekonomike midis këtyre dy vendeve.

Nga ana e tij, zëvendësministri i Tregtisë së Koresë theksoi se sektori i Kërkimit dhe Zhvillimit dhe ai i Teknologjisë janë ndër më të zhvilluarit në Bullgari dhe ata që kanë bërë që ne ta shohim këtë shtet si një prej partnerëve tanë më të rëndësishëm.

Komente

avatar
  Subscribe  
Notify of