Bullgari/ Tregtia me Kanadanë është rritur që nga nënshkrimi i CETA

04/01/2020 10:02 PM 0 komente

Zv. Ministrja e Ekonomisë, Liliya Ivanova u takua me Kevin Hamilton, Ambasadorin e Kanadasë të akredituar në Bullgari, i cili është duke qëndruar në Bukuresht të Rumanisë.

Të dy diskutuan mbi bashkëpunimin tregtar dhe ekonomik midis Bullgarisë dhe Kanadasë, një marrëveshje gjithëpërfshirëse ekonomike dhe tregtare midis BE-së dhe Kanadasë (CETA), dhe përkrahjen e Kanadasë për anëtarësimin e shtetit bullgar në Organizatën për Bashkëpunim dhe Zhvillim Ekonomik (OECD).

Znj. Ivanova theksoi se të dhënat për tregtinë midis Bullgarisë dhe Kanadasë janë rritur ndjeshëm vitet e fundit, me 29 për qind vetëm në vitin 2018, me eksportet bullgare në rritje me 60 për qind.

Ekziston një tendencë rritëse relativisht e qëndrueshme në vlerën e eksporteve në Kanada të një sërë mallrash, ku mund të veçojmë farmaceutikët, farat e lulediellit, fibrat optike, qarqet e integruara, makineritë bujqësore, mjetet e përpunimit të metaleve, pjesë të ndryshme të motorëve të makinave, produkte kozmetike, etj.

Sipas znj.Ivanova, CETA arrin një nivel jashtëzakonisht të lartë të liberalizimit të tregtisë. Pritet që efekti i saj pozitiv në ekonominë bullgare të shprehet jo vetëm përmes tregtisë së drejtpërdrejtë midis Bullgarisë dhe Kanadasë, por edhe falë zinxhirëve të vlerës globale, të cilat padyshim që do të kenë ndikim në marrëveshje.

Ambasadori Hamilton vuri në dukje se 14 vende europiane kanë ratifikuar tashmë CETA-n dhe se Kanadaja po mbështet Bullgarinë në procesin e pranimit në OECD. Zëvendësministrja e Ekonomisë deklaroi se Bullgaria e vlerëson këtë mbështetje. “Unë do të doja të shpreh mirënjohjen për mbështetjen e Kanadasë në kërkimin e një konsensusi mbi zgjerimin e OECD-së për të përfshirë Bullgarinë dhe Rumaninë si anëtare të plota të kësaj Organizate”, tha ajo më tej.

Ne presim që brenda vitit të ardhshëm, Bullgaria ta ketë marrë ftesën dhe datën e saj specifike për fillimin e negociatave të pranimit në OECD, përfundoi znj. Ivanova. Gjatë takimit, ata diskutuan gjithashtu edhe mundësitë e mbajtjes së një forumi të përbashkët biznesi në Bullgari në sektorët me potencial të lartë investimesh.

Komente

avatar
  Subscribe  
Notify of