Covid-19, Manastirliu: Dyfishojmë ekipet e lëvizshme të urgjencës për shërbimin në banesë

27/07/2020 2:20 PM 0 komente

Në kuadër të forcimit të masave për përballimin e situatës së shkaktuar nga pandemia, ekipet e terrenit për shërbimin në banesë për qytetarët e prekur nga Covid-19 do të dyfishohen përgjatë vjeshtë-dimrit.

“Tirana mbetet vatër e nxehtë, por ndërkohë jemi duke u përgatitur për përgjigjen ndaj situatës në të gjithë vendin. Në këtë moment jemi duke ndërtuar edhe më shumë skuadra mobile për pacientët me Covid-19, pra skuadra të lëvizshme të cilat do të ofrojnë ndihmën në banesë sipas protokolleve, sipas gradës së sëmundshmërisë, për ata të cilët do të kenë nevojë për asistencë në shtëpi, apo për transferimin në spital, sipas protokolleve. Përgjatë vjeshtë-dimrit, do të dyfishojmë ekipet tona të terrenit”, deklaroi ministrja e Shëndetësisë Ogerta Manastirliu nga Urgjenca Kombëtare.

Manastirliu tha nga Njësia e Koordinimit dhe ekipet e urgjencës kombëtare po përballohet një fluks i konsiderueshëm i qytetarëve të prekur nga SARS COV2.

“Janë mbi 500 thirrje në ditë janë vetëm për Covid-19 në numrin unik të Urgjencës Kombëtare 127. Nga ana tjetër Urgjenca Kombëtare vijon që të japë shërbime edhe për gjithë patologjitë e tjera. Edhe kjo falë një pune dhe një organizimi shumë të mirë, të bërë nga ana juaj, me gjithë spitalet”, tha Manastirliu.

Aktualisht në Urgjencën Kombëtare priten 540 thirrje në ditë vetëm për Covid-19, ndërsa kryhen rreth 50 shërbime/ ditë në banesë. Që prej fillimi të epidemisë janë mbi 1 mijë qytetarë që janë dërguar për trajtim spitalor, ndërsa në total janë 2411 qytetarë të prekur nga SARS COV2 që kanë marrë trajtim nga urgjenca kombëtare në banesë dhe janë transferuar në spital dha janë mbi 100 mijë thirrje për Covid-19 të pritura gjatë kësaj periudhe të epidemisë.

Komente

avatar
  Subscribe  
Notify of