Pandemia e Covid-19, që mbylli shqiptarët brenda shtëpive për një afat ende të pacaktuar, nxori disa biznese nga zona e tyre e komfortit, duke ju përshtatur kërkesës së tregut. Rrjetet e supermarketeve, që tradicionalisht operojnë në vend, vetëm me njësi shërbimi, kanë hedhur hapin e parë drejt e-commerce me porosi që jepen përmes telefonit, përgatiten në njësi të dedikuara dhe dorëzohen te klienti nga shërbimi postar. Operatorët e tregut pranojnë se kjo i gjeti të papërgatitur, porse dita-ditës ka përmirësim.
Ata nënvizojnë se e ardhmja është padyshim e shitjeve online, si një mundësi më shumë për konsumatorin. Shërbimi postar, nga ana tjetër, vlerëson se situata me koronavirusin e ka bërë aktivitetin e tyre dinamik me një rritje të shpërndarjeve. Kompani që operonin prej disa kohësh online vlerësojnë se COVID-19 ka ndryshuar sjelljen e konsumatorëve dhe ka ndikuar në kategorinë e blerjeve që ata kryejnë.
Nga Nertila Maho
A ju kishte shkuar mendja dy javë më parë se do të vinte një ditë si kjo dhe vajin, miellin, vezët e të gjithë ushqimet do t’i porosisnit me telefon pasi t’i kishit parë online? Zakonisht ju ishit mësuar që online të blinit fustanin apo xhaketën tuaj të preferuar, atë orën me ulje, kufjet, karikuesin e gjithfarë produktesh që ofrohen përmes platformave online, por jo ushqimet.
Situata e krijuar në vend, për shkak të COVID-19, që nisi me një gjysmë izolim, me zbulimin e rasteve të para nga autoritetet, përfundoi në një izolim thuajse të plotë të popullatës dhe transformoi brenda ditësh, shërbimin që ofronin njësitë më të rëndësishme në kohë pandemie, ato të rrjetit ushqimor. Shqiptarët nuk po shpenzonim më si zakonisht, jo vetëm prej mbylljes së shumicës së aktiviteteve tregtare, por edhe prej panikut, pasi tashmë shpenzimet sinjalizuan sjellje më kursimtare, duke kërkuar të blihen ato më të domosdoshme si ushqimet dhe masat mbrojtëse e higjienizuese.
Në pak ditë, lindi një sistem i ri shërbimi i supermarketeve, për të çuar edhe ushqimet në dyert e klientëve, një sistem që sigurisht nuk është i përsosur, sikurse shprehen operatorët e tregut, por është zgjidhja më e mirë që mund të ofrohej në një situatë që nuk pritej.
Prova e parë e supermarketeve në e-commerce
Robert Hoxha, përfaqësues i rrjetit të supermarketeve “Big Market” në vend, tha për “Monitor” se situata e krijuar me COVID-19 e gjeti tregun të papërgatitur, por kjo po përmirësohet dita-ditës. “Kjo ishte një situatë e papritur dhe për hir të së vërtetës, i ka gjetur pak të papërgatitur të gjithë, pasi nuk kemi platforma online. Ditët e para filluam të ofronim mundësinë e porosive përmes përzgjedhjes së produkteve nga katalogët online që ofronim.
Klienti mund të zgjedhë artikujt në këtë listë, por nuk ka kufizime nëse ka një nevojë specifike, mund të porosisë edhe ekstra” – nënvizon ai. Sigurisht, të gjithë e pranojnë që ashtu sikurse ndodh në ekonomi më të avancuara, edhe ky sektor do të duhet t’u përshtatet shitjeve përmes platformave online, si një normalitet dhe jo si një detyrim i një situate të jashtëzakonshme. Elona Hametaj, Drejtore Ekzekutive e “Spar Albania”, sqaron se përgjigjja e parë ishte përmes paketave standarde, por ditë pas dite është përmirësuar.
“Qëllimi në ofrimin fillimisht të paketave ishte për ta bërë sa më të thjeshtë zgjedhjen e blerësve dhe sa më të shpejtë shpërndarjen e porosive. Kështu krijuam paketa ushqimore, të cilat përmbajnë produktet më të shitura në kategoritë kryesore të ushqimit dhe higjienës sipas vlerave 5,000 Lek, 7,000 Lek dhe 10,000 Lek” sqaron ajo. Shtirja e karantinimit në të gjithë vendin duket se do të sjellë nevojën e ofrimit të shërbimit përmes porosive online kudo nëpër qytete dhe duket se sfida e radhës do të jetë pikërisht kjo për rrjetet e supermarketeve.
Si funksionon sistemi, nga porosia te dorëzimi pranë klientit
Pothuajse të gjithë rrjetet e supermarketeve kanë operuar në mënyrë të ngjashme për të shitur online këto ditë. Kanë vënë në dispozicion numrat e telefonit, duke krijuar secili nga një mini “Call Center” që menaxhohet nga 3-5 veta. Pasi merren porositë, ato ju dërgohen njësive të përgatitjes dhe vendi ku përgatitet varet nga afërsia që ka konsumatori me njësinë respektive të shitjes.
Pas kësaj, është radha e shërbimit postar, me të cilin kompania ka lidhur marrëveshje, që dorëzon porosinë te klienti dhe merr pagesën cash të produkteve. Geri Piranjani, administrator i “United Transport” (“Albanian Courier”) që aktualisht është e angazhuar në këtë proces për një sërë kompanish, sqaron se nuk po hasen probleme në mënyrën sesi funksionon kjo praktikë.
“Problemet në këtë periudhë janë të minimizuara, për shkak të mungesës së trafikut në qarkullimin e automjeteve dhe gatishmërisë së qytetarëve, të cilët, të mbyllur në shtëpi, marrin në dorëzim porositë që kanë bërë nëpërmjet internetit. Gjithashtu, kemi vënë re se numri i pakove të porositura po vazhdon të rritet ndjeshëm gjatë kësaj periudhe. Ne ju garantojmë se do të vazhdojmë t’ju shërbejmë me përkushtim dhe t’i dorëzojmë me përparësi pakot me produktet e nevojshme gjatë kësaj periudhe” sqaron ai.
E-commerce do të jetë e ardhmja për bizneset
Të gjithë operatorët e rrjeteve të supermarketeve pranojnë se, edhe pse ky është një fillim i sforcuar i porosive online, për shkak të situatës, evolucioni drejt këtij shërbimi është i padiskutueshëm. Alexander Kosenas, Drejtor Ekzekutiv i “Neptun”, që ofron edhe mundësinë e blerjeve online të pajisjeve elektroshtëpiake, e sheh këtë moment si një pikënisje për normalitetin e ri të shqiptarëve.
“Njerëzit po kalojnë më shumë kohë në shtëpi me familjet e tyre dhe po e përshtasin sjelljen e tyre të të blerit, për rrjedhojë është vënë re një rritje e madhe në blerjet online dhe në përdorimin e shërbimeve të dërgesave në shtëpi. Ka një mundësi të madhe që këto ndryshime të kthehen në një normalitet të ri. Sidomos përdorimi i e-commerce dhe i shërbimit të dërgesave në shtëpi pritet që të bëhet pjesë e jetës së konsumatorit shqiptar në përfundim të masave” – thekson ai.
Pothuajse të gjithë përfaqësuesit e rrjeteve të supermarketeve në vend konfirmojnë se shërbimi përmes platformave online dhe dorëzimi në shtëpi i porosive do të vijojë edhe përtej situatës së COVID, duke shërbyer si një mundësi më shumë për konsumatorët.
Elona Hametaj, Drejtore Ekzekutive e “Spar Albania”
“Shitjet online do të mbeten edhe pas situatës aktuale, po investohet në platforma”
Supermarketet në vend u angazhuan njëkohësisht për të ofruar shërbimet e tyre gjatë këtyre dy javëve të vështira të karantinimit, përmes porosive online dhe shpërndarjen e tyre te konsumatori.
Elona Hametaj, Drejtore Ekzekutive e “Spar Albania”, shprehet se aktualisht kompania që ajo drejton po përgatitet për një platformë të plotë të shitjeve online, porse situata aktuale e bëri të nevojshëm daljen me një opsion më të shpejtë. Ajo nënvizon se shitjet online apo e-commerce do të jenë pjesë e aktivitetit të rrjeteve të supermarketit si një mundësi më shumë për konsumatorët dhe nuk do të marrë fund me kalimin e situatës së krijuar nga koronavirus.
Si ju përshtat rrjeti i supermarketeve “Spar” situatës së re të koronavirus ku popullata është në karantinim dhe ka kufizim të lëvizjes?
“SPAR Albania” është duke punuar për të ofruar së shpejti një platformë të mirëfilltë të blerjeve online, referuar dhe praktikave më të mira në të gjithë botën. E ndërkohë që po punojmë në këtë drejtim, nuk mund të qëndronim pa bërë asgjë në një moment kaq të vështirë. Për t’ju përgjigjur shpejt nevojës së konsumatorëve në kushtet e izolimit, ne prezantuam që më datë 14 mars mundësinë e blerjes me telefon, duke ofruar shpërndarjen falas në qytetin e Tiranës dhe Durrësit. Deri më tani, themi se kemi mundur t’u përgjigjemi nevojave të komunitetit, duke dhënë në mënyrë modeste ndihmë në qëndrimin e qytetarëve brenda në shtëpi.
Si u hartuan paketat që i ofrohen konsumatorit, mbi çfarë bazash? (Kam parasysh që keni ofruar gjërat bazike) A do t’i zgjeroni më tej?
Qëllimi në ofrimin fillimisht të paketave ishte për ta bërë sa më të thjeshtë zgjedhjen e blerësve dhe sa më të shpejtë shpërndarjen e porosive. Kështu, krijuam paketa ushqimore, të cilat përmbajnë produktet më të shitura në kategoritë kryesore të ushqimit dhe higjienës sipas vlerave 5,000 Lek, 7,000 Lek dhe 10,000 Lek.
Ne e kemi zhvilluar më tej ofertën e blerjeve online apo me telefon.
Tani mund të zgjedhësh e të blesh edhe produktet e freskëta, bulmet, frutat dhe perimet. Transporti i tyre do të realizohet në çanta termike. Shumë shpejt, ne do të përfshijmë edhe produkte jashtë ushqimeve, si lodra për fëmijët, libra, etj.
Kjo është një sfidë e madhe për të gjithë, por në këto momente duhet sa më shumë solidaritet. Stafi i shërbimit për blerjet online, ashtu sikurse edhe ata që shërbejnë në dyqane, duhet falënderuar, pasi janë heronjtë e momentit duke treguar guxim dhe përkushtim si kurrë më parë.
Si është kërkesa për blerje me telefon, apo porosi nga konsumatoret, a po përshtaten me këtë model?
Që nga fillimi është mirëpritur si shërbim nga blerësit. Shërbimi i klientit është në kontakt me blerësit. Kryhen afërsisht 45 porosi në ditë, por numri i tyre është në rritje. Duke parë situatën e vështirë edhe në qytetet e tjera ne po përpiqemi që të njëjtin shërbim ta ofrojmë në çdo qytet të Shqipërisë. Për më tepër, duam që të shmangim sa më shumë pagesat me para në dorë dhe po shikohet mundësia që të realizojmë pagesën me karta krediti.
Sa për qind e shitjeve po bëhen në këtë mënyrë, pra raporti me shitje në dyqan dhe shitje online dhe telefon?
Është ende herët për të pasur disa të dhëna të qëndrueshme për Shqipërinë pasi jemi në kushte jo të zakonshme dhe duhet parë edhe situata pas emergjencës. Por nëse do t’u referohemi vendeve të ngjashme europiane, prirja është që të rritet gjithnjë e më shumë sektori i shitjeve online. Besoj se kështu do të vijojë edhe pas izolimit, duke ndjekur ecurinë e vendeve të tjera ku SPAR operon ku shitjet online zënë 5-10% të totalit të shitjeve.
Për sa u përket shitjeve në dyqan, ecuria është përsëri e mirë.
Cilat janë 10 produktet më të shitura në këto dy javë në rrjetin e supermarketeve tuaj?
Në këto momente, ashtu si edhe mund ta merrni me mend, në krye të shitjeve qëndrojnë produktet e shportës, frutat dhe perimet. Vend të rëndësishëm zënë edhe produktet e higjienës. E bërë më të prekshme kemi: vezë, vaj luledielli, miell, ujë, sheqer, oriz, qumësht, pije energjike, sardele në konservë dhe pastrues duarsh xhel.
A do ta ndryshojë situata e tanishme mënyrën e të berit pazar në Shqipëri? A mendoni se biznesi do ta mbajë këtë formë shërbimi, edhe pasi të këtë kaluar COVID-19?
Besoj se ka një prirje botërore drejt blerjeve online dhe shqiptarët, kryesisht brezi më i ri, e kanë përqafuar tashmë. Nga ana tjetër, ky moment që po jetojmë e po vuajmë të gjithë bashkë mund të jetë një çast i rëndësishëm për blerjet online në vend. Thuajse të gjitha shoqëritë e tregtimit me pakicë po bëjnë një punë të mirë në edukimin e blerësve për dobitë që ka blerja online. Duke i bashkuar këta dy faktorë, mendoj se shitjet online do të rriten edhe pas periudhës së izolimit. Ashtu si edhe përmenda në fillim të intervistës, ne po punojmë për të ofruar këtë shërbim sa më të plotë jo vetëm për periudhën e emergjencës, por edhe për më tej.
Robert Hoxha, përfaqësues i rrjetit të supermarketeve “Big Market”
“Shitjet online kanë avantazh shpejtësinë, si po operojmë sot me porositë”
Rrjetet e supermarketeve që zgjedhin të dërgojnë porosi online pranë konsumatorëve mund të përjetojnë një rritje të kostove që varion nga 8-10%, por që si alternativë ofron eficencë dhe shpejtësi.
Robert Hoxha, përfaqësues i rrjetit të supermarketeve “Big Market”, shprehet se situata e krijuar në vend i gjeti të papërgatitura kompanitë shqiptare, por tashmë hapi rrugën për më shumë fokus drejt platformave online që mund të shërbejnë si mundësi e mirë për të qenë afër konsumatorit.
Edhe ju si rrjet supermarketesh filluat të aplikonit shitjet përmes porosive online apo me telefon. Si lindi procesi dhe si funksionon kjo praktikë tek ju?
E gjitha kjo, si mënyrë operimi nisi në momentin kur patëm bllokimin e lëvizjes së mjeteve të transportit dhe na u duk si alternativa e vetme për të qenë afër konsumatorëve. Në kushtet e kufizimeve që ka sjellë situata e sotme kjo është zgjidhje për ata që e kanë të pamundur të shkojnë në supermarket.
Është një zgjidhje më e kushtueshme, pasi rrit kostot tona me 8-10%, por kemi vendosur ta zbatojmë për të shmangur edhe ato radhët e gjata që mund të krijohen në dyqanin fizik. Mënyra si operohet për porositë është e thjeshtë. Kemi të vendosur një call center që merr porositë dhe më pas ato ekzekutohen nga pika e shitjes që ka më afër klienti. Dërgesa bëhet përmes shërbimit postar me të cilin kemi marrëveshje.
Si keni vepruar për t’ju ofruar konsumatorëve alternativa produktesh, a janë paketa fikse apo mund të përzgjidhet gjithçka?
Kjo ishte një situatë e papritur dhe për hir të së vërtetës, i ka gjetur pak të papërgatitur të gjithë, pasi nuk kemi platforma online. Ditët e para filluam që të ofronim mundësinë e porosive përmes përzgjedhjes së produkteve nga katalogët online që ofronim. Klienti mund të zgjedhë artikujt në këtë listë, por nuk është se ka kufizime nëse ka një nevojë specifike mund të porosisë edhe ekstra. Aktualisht janë online 200 artikuj, por që lista shtohet nga dita në ditë dhe do të vijojë të shtohet si numër artikujsh në mënyrë që klientët të kenë më shumë variante për të zgjedhur.
Mendoni që ky testi që po kaloni tani drejt e-commerce do të mbijetojë edhe pas situatës aktuale?
Po, mendoj se do të mbetet si praktikë dhe do të ketë një fokus për të rritur shumëllojshmërinë e artikujve. Kjo si alternativë ka si avantazh shpejtësinë e shpërndarjes ndaj mendoj se në vijim do të ketë një orientim drejt platformave të sistemeve online.
Cilat kanë qenë produktet kryesore që kanë porositur klientët në këto dy javët e fundit dhe si është volume i blerjeve? Po importet a vijojnë normalisht?
Po përveç atyre ditëve të para, që e dimë që pati një fluks dhe blerje nën panik, këto ditë duket se ka disi një normalizim të situatës. Ka një normalitet si në porositë online, ashtu edhe nëpër markete. Produktet më të shitura, përveç atyre bazike të konsumit, kanë qenë produkte specifike dezinfektimi. Edhe importet vazhdojnë normalisht dhe deri më tani nuk ka rritje të çmimeve në hallkat ku qarkullojnë produktet.
Ne si rrjet supermarketesh kemi magazinën qëndrore dhe në situatën ku ndodhemi kemi bllokuar furnizime për 3 mujorin e ardhshëm. Dua të shtoj se importet vazhdojnë normalisht pa asnjë problematikë. Puna vazhdon normalisht dhe pa rritje çmimesh në hallkat ku qarkullojnë produktet.
Alessandro Rosa Administrator, Conad Albania
“Furnzimi nga Italia vijon normalisht, shpërndarjen po e bëjmë edhe me motora”
Rrjeti i supermarketeve, që të paktën 85-90 për qind të produkteve të tij i merr nga Italia, Conad Albania, pohon se importi nga vendi fqinj vijon normalisht. Alessandro Rosa administrator i Conad Albania sjell në vëmendje se praktika e porosive online që po zbatohet tani nuk është e re për këtë rrjet supermarketesh por sigurisht ka njohur rritje të dukshme gjatë këtyre ditëve.
Ai nënvizon se me kalimin e situatës sërish do të ketë një tkurrje të porosive që bëhen përmes telefonit por ama do t’i nxisë kompanitë të bëjnë investime edhe në këtë aspekt. Lidhur me shpërndarjen si nënvizon se Conad ka futur në këtë rrjet edhe motorat si një mënyrë më e shpejtë.
Si po e menaxhon Conad situatën e krijuar nga koronavirus, a po vijojnë ende importet nga Italia?
Conad vazhdon të punojë duke ndjekur të njëjtat procedura të përdorura përpara se të fillonte kjo situatë. Edhe pse jemi gjendur përballë një rritjeje të konsiderueshme të shitjeve, nuk kemi hasur problematika me fluksin logjistik dhe deri me tani kemi garantuar furnizime të plota për dyqanet tona.
Dihet që Shqipëria nuk është një vend me prodhimtari të lartë të produkteve ushqimore, prodhon vetëm në disa kategori shumë specifike, për pasojë shumica e produkteve ushqimore vjen nga importi.
Asortimenti i dyqaneve Conad përbëhet në 85-90% të tij nga produkte që vijne nga Italia, nga korporata Conad Italia.
Falë partneritetit, nuk kemi pasur probleme logjistike për furnizimin e mallrave nga Italia, përkundrazi, pikërisht për të përmbushur kërkesat më të mëdha kryesisht për produktet bazë, kemi vazhduar të rrisim stokun e dyqaneve dhe atë të magazinës qendrore. Kjo e fundit ka një siperfaqe prej 5000 metër katror, ku magazinohen produkte të konfeksionuara., të ngrira dhe të freskëta dhe vepron si mushkëri për të gjithë rrjetin tonë duke shërbyer në raste të vështirësive të diktuara për shembull nga kushtet e motit të pafavorshëm siç mund të ndodhin në dimër.
Në 2 javët e kaluara, ne nuk kemi hasur ndonjë problem apo shqetësim në lidhje me furnizimin e mallrave nga Italia.
Duke pasur parasysh rëndësinë strategjike të ushqimit në secilin vend të zhvilluar, në Itali mallrat ushqimore mund të transportohen në të gjithë territorin kombëtar dhe gjithashtu në Shqipëri. Conad Italia po garanton një furnizim të vazhdueshëm dhe madje edhe më të lartë se para fillimit të pandemisë.
Ju tashmë këni një sistem që funksionon për porosi përmes telefonit dhe shpërndarje në shtëpi tek konsumatorët. Si funksionon ky si proces?
Si rezultat i kufizimeve të vendosura nga qeveria për lëvizjen e popullatës, është rritur shumë kërkesa nga ana e konsumatoreve për dërgimin e porosive në shtëpitë e tyre. Ne jemi përpjekur t’i përgjigjemi kësaj nevoje përmes zbatimit të një modeli tashmë në përdorim, megjithëse në një masë më të kufizuar, në disa pika të shitjes së zinxhirit tonë të supermarketeve, d.m.th., për të marrë porosi me telefon dhe pastaj t’i dorëzojmë ato me mjete të shpejta transporti siç janë motorët.
Për të zhvilluar këtë sistem kemi vënë në dispozicion një numër telefoni, i cili nuk mund të marrë telefonata, i cili shërben vetëm për të marrë mesazhe me tekst ose në ËhatsApp.
Konsumatori i cili dëshiron t’i dorëzohet porosia në shtëpi duhet të shkruajë një mesazh, në numrin e telefonit të treguar, duke dhënë vetëm 3 informacione: emrin dhe mbiemrin, adresën ku dëshiron t’i dorëzohet porosia, dhe numrin e tij të telefonit.
Brenda pak minutash klienti kontaktohet nga një bashkëpunëtor i Conad i cili do ta udhëzojë atë në realizimin e blerjeve, duke i shpjeguar detaje për çdo produkt, për çdo kategori dhe gjithashtu per te gjitha çmimet, të cilat janë të pandryshueshme. Pasi të jetë përgatitur porosia, ajo i dorëzohet një korrieri, i cili ofron shërbimin e transportit te porosive. Transportuesi ka një marrëveshje me ne që të kryejë shpërndarjen në përputhje me udhëzimet për respektimin e të gjitha masave higjeno-sanitare, duke përdorur në çdo moment maskë mbrojtëse dhe doreza.
Për shkak të numrit të madh të kërkesave, na është dashur të standardizojmë dhe ta bëjmë procesin e shpërndarjes së porosive sa më industrial, dhe për këtë qëllim kemi siguruar një numër të vetëm telefonik që mund të marrë vetëm mesazhe, nga ora 09:00 deri në 17:00. Të gjitha porosite që vijnë përpara ores 13:00, u dorëzohen klienteve gjate harkut kohor 14:00 deri në 20:00, ndërsa të gjitha porositë qe vijne pas orës 14:00 i dorezohen të nesërmen në mëngjes. Në mënyrë që të standardizojmë sa më shumë që të jetë e mundur veprimtarinë e mbledhjes së porosive, jemi të detyruar të vendosim dhe të zbatojmë rregullat e mirepërcaktuara.
Cilat janë problemet që hasni në këtë formë të re operimi me shitjet?
Problemet më të mëdha janë kur klienti që telefonon nuk është një klient që viziton zakonisht dyqanet tona dhe për këtë arsye ka një njohuri të paqartë për produktet tona. Në këtë rast, përfaqësuesi ynë që telefonon klientin do të duhet t’i kushtojë më shumë vëmendje shpjegimit të karakteristikave të artikujve dhe të sugjerojë çdo mundësi që mund të plotësojë nevojat e tij.
Një fakt shumë i rëndësishëm që dua të theksoj është që klienti mund përzgjedhë për të blerë në të gjithë gamën e produkteve tona, pra mbi 6,000 artikuj, pa pasur asnjë pengesë.
Ka ndodhur, megjithëse rrallë, që disa klientë u ankuan se nuk morën menjëherë porosinë, por kjo, siç u përmend më lart, është e nevojshme për t’iu përgjigjur standardizimit dhe optimizimit të procesit logjistik në dobi të shumicës së klientëve.
Cilët janë disa nga produktet që preferohen më shumë në supermarket gjatë këtyre ditëve?
Në këtë periudhë, klientet po i kushtojnë shumë vëmendje produkteve të pastrimit, detergjentë për shtëpinë. Konsumatorët ndjehen më të sigurt nga fakti se mund të përdorin disa pastrues antibakterialë për pastrimin e ambienteve, si dhe perdorimin e xhelit antibakterial për higjenën e tyre personale. Sa i përket departamentit të produkteve ushqimore, po i japim prioritet furnizimit me produkte baze siç janë orizi, mielli, uji dhe vaji, pasi klientët kërkojnë të kenë stok në shtëpitë e tyre të artikujve që kanë skadenca të largëta.
A mendoni se pas situatës me koronavirus porositë përmes telefonit apo online do të mbeten si një opsion i ri për konsumatorët?
Sistemi i porositjes përmes telefonit, që kemi adoptuar, ishte funksional edhe më parë në rrjetin tonë, megjithëse ishte pak i përdorur. Në parim është e qartë se kur të përfundojë kjo periudhë e krizës, numri i porosive përmes telefonit do të bjerë përsëri, por besoj që disa klientë të rinj që e kanë testuar këtë shërbim pozitivisht, me siguri do të vazhdojnë të përfitojnë nga kjo mundësi.
Në çdo rast, në të ardhmen ne do të vazhdojmë të përcaktojmë disa sisteme alternative të blerjeve on-line (e-commerce) që do të na lejojnë të kombinojmë më mirë aspektin e efikasitetit për të dhënë një shërbim sa më të plotë për klientet tanë, nevojat e të cilëve ndryshojnë në bazë të evolucionit të përgjithshem të shoqërisë.
Ky është artikull ekskluziv i Revistës Monitor, që gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”.
Artikulli mund të ripublikohet nga mediat e tjera vetëm duke cituar “Revista Monitor” shoqëruar me linkun e artikullit origjinal.