Falimenti i Albanian Airlines, miratohet shpërndarja përfundimtare për kreditorët
Gjykata e Tiranës ka vendosur që të miratojë shpërndarjen përfundimtare të masës së falimentit sipas shumave dhe radhës së vendosur për kreditorët e Albanian Airlines. Në një vendim të bërë publik vetëm pak ditë më parë saktësohet se masa e falimentit e dakordësuar është 10.2 milionë lekë. Kjo shpërndarje do të bëhet nga administratorja e Falimentit por kjo do të jetë e mundur vetëm pasi të jetë zhvilluar takimi përfundimtar me kreditorët ku këta të fundit do të mund të japin edhe vërejtjet e tyre.
Referuar pikës 3 të vendimit bëhet me dije se kjo mbledhje do të mbahet në 29 mars 2018 dhe do të ketë në fokus tre çështje si diskutimin e llogarive te paraqitura nga administratori i falimentimit, paraqitjen e vërejtjeve ndaj listës përfundimtare të shpërndarjes dhe diskutimin mbi vijimësinë e procedurës.
“Anëtaret e Komitetit te Kreditoreve kanë të drejtë të paraqesin në Gjykatën e Rrethit Gjyqësor Tiranë, koment vërejtjet në lidhje me llogaritë përfundimtare të paraqitura nga administratorja, brenda 7 ditëve nga dita e njoftimit të këtij vendimi. Mos përmbushja e këtyre kritereve formale bën vërejtjet të papranueshme për shqyrtim.
Kreditoret e falimentimit kanë të drejtë të paraqesin me shkrim në Gjykatën e Rrethit Gjyqësor Tiranë, deri ne 7 ditë para datës së caktuar, sipas pikës 3 të këtij vendimi, vërejtjet ndaj listës përfundimtare të shpërndarjes, nëse ata kanë. Nëse kreditori i falimentimit është person juridik, kërkesës me shkrim duhet t’i bashkëlidhet një ekstrakt lëshuar nga QKB (në origjinal) dhe një autorizim të posaçëm lëshuar nga administratori për përfaqësuesin. Mospërmbushja e këtyre kritereve formale bën kërkesën e papranueshme për shqyrtim” thuhet në vendimin e Gjykatës.
Historia e Albanian Airlines
Shoqëria “Albanian Airlines” sh.p.k u regjistrua në Qendrën Kombëtare te Regjistrimit Tirane në datë 16.05.1995 duke pasur në objekt të aktivitetit të saj transportin ajror të mallrave e të pasagjereve me mjetet e transportit ajror. Por pas shumë viteve në treg kompania do të kalonte në një gjendje të vështirë financiare që e detyroi të mbyllte aktivitetin por që shpalljen e falimentit do ta bënte shumë kohë më pas. Konkretisht në Gjykatën e Tiranës shoqëria “HAVAS -HAVAALANLARI YER HIZMETLERI A. S” Sh.p.k si aksioneri i kompanisë paraqiti padinë për shpalljen e falimentit në 5 mars 2014.
Hapja e procedurës dhe pranimi i kërkesës është bërë vetëm në prill të vitit 2016. Nga raporti që u paraqit në shkurt të vitit 2017 vlerësuesit e aseteve të Albanian Airlines konstatuan se të paktën 90 për qind e pasurive të luajtshme të kompanisë ishin jashtë funksioni.
Pavarësisht tentativave për të shitur disa herë katër prej avionëve komercialë të kompanisë ankandet kanë rezultuar të passuksesshëm.
Si pasuri e paluajtshme ka ekzistuar vetëm një ndërtesë në territorin e Aeroportit të Rinasit, me sipërfaqe 450 metra/2 si dhe zyrë dhe magazinë brenda objektit me sipërfaqe 225 metra të vlerësuara me një çmim 27 mijë euro. Kjo sipas raportit të vitit 2017 rezulton të jetë shitur.
Komente