Fiskalizimi/ Problematika edhe me pagesat nga llogaritë bankare; Kontabilistët: Rriten vështirësitë për transaksionet e përditshme të biznesit

08/07/2021 11:00 PM 0 komente

Me zbatimin e fazës së dytë të fiskalizmit për lëshimin e faturave elektronike mes bizneseve që kryejnë transaksione pa para në dorë, sipas kontabilistëve janë të shumta pengesat që po hasin bizneset për faturimin e ri.

Përveç bllokimit të aktivitetit nga mosfunksionimi i portalit SelfCare (në ditët e parë pati bllokim të platformës), mosnjohjes së TVSH-së dhe shpenzimeve të zbritshme për subjektet që ndërveprojnë me fatura tatimore dhe fatura të fiskalizuara, mosdhënia e blloqeve të TVSH-së nga tatimet, moslëshimit të faturave për import dhe eksport, fiskalizimit nëpërmjet kasave kur një fatura përmban shumë artikuj etj. Kontabilistët janë të shqetësuar edhe për procedurat e ndërlikuara për pagesat si nëpërmjet llogarive bankare dhe cash.

Sipas kontabilistit Armand Mala një tjetër shqetësim është edhe mënyra e pagesës. Kontabilisti Mala shpjegon se kur përgatitet fatura, sistemi të lejon të zgjedhësh mënyrën e pagesës cash/bankë, etj. Nëse të nesërmen subjekti të kërkon të paguash cash, faturën të cilën e ke bërë për pagesë me banke, nuk mund ta arkëtosh. Në këtë situatë duhet të anulosh faturën dhe të bësh një tjetër faturën.

“Kur financiari bën faturën dhe vendos pagesën me bankë, pasi ashtu i është kërkuar nga subjekti që përfaqëson, pavarësisht se është poshtë limitit maksimal që lejohet për transaksione cash, nëse të nesërmen biznesi kërkon që këtë faturë ta paguajë cash, kjo është e pamundur. Në këtë rast duhet të anulohet fatura e parë dhe të bëhet një faturë e dytë ku mënyra e pagesës të tjetër cash. Kjo procedurë shton transaksionet artificiale të bizneset, për shkak të anulimit të tyre nga procedurat që përcakton fiskalizmi. Kur biznesit t’i kryhen kontrolle do t’i gjenden pa fund transaksione të anuluara”.

Kontabilisti Armand Mala thotë se me sistemin e ri të faturimit problematike janë edhe pagesat nëpërmjet llogarive bankare për transaksione të përditshme të biznesit. “Nëse zgjedh pagese me bankë, duhet të përcaktosh se në cilën bankë do të bëhet arkëtimi. Nëse subjekti për arsye të ndryshme dëshiron të paguajë në një tjetër llogari bankare, fatura duhet të anulohet e të bëhet një faturë e re me metodë pagese në bankën me llogarinë që biznesi do të paguajë. Të gjitha këto janë në kundërshtim të masave për të lehtësuar aktivitetin e biznesit. Aktiviteti i sipërmarrjes nuk duhet të pengohet nga procedurat e ndërlikuara për transaksionet rutinë. Pagesa me bankë është pagesë me bankë dhe çdo biznes zgjedh vetë se në cilën bankë do të kryejë”, nënvizon Mala.

Si nisi faza e dytë e fiskalizmit

Faza e dytë e fiskalizmit që në ditët e para të zbatimit u shqërua me shumë problematikë. Përveç vonesave në tërheqjen e certifikatës elektronike të bizneseve që kishin aplikuar, edhe atë që ishin të pajisur me dokument e kishin të vështirë ta ngarkonin në platformën SelfCare, pasi u bllokua që në orët e para të mëngjesit. Sipas numrit të rishikuar të administratës tatimore (në janar u parashikua që në fazën e parë do të përfshiheshin 51 mijë biznese) në total në fazën e dytë do të fiskalizohen 34 mijë biznese. Certifikata tatimore është tërhequr nga 22 mijë biznese. Edhe miratimi i aktit normativ për faljen e gjobave dei në 31 dhjetor 2021 krijoi perceptimin te biznesi se kush nuk lëshon fatura të fiskalizuara nuk penalizohet. Ekspertët paralajmëruan se në dukje kjo masë është qetësuese për bizneset, por në thelb nxit evazionin.

Lexo edhe:

Ditët e para të fiskalizimit/ Bllokohet platforma SelfCare; Dhamo: Aktiviteti i subjekteve është penguar 

Fiskalizimi/ Bizneset nuk po lëshojnë fatura të fiskalizuara për import-eksport; Tatimet nuk japin më blloqe, rrezikohet bllokimi aktiviteteve 

Kontabilistët: Është i paqartë fiskalizimi nga kasa për faturat me shumë artikuj; Faza e tretë të nisë me grupe biznesesh pilot

Heqja e gjobave të fiskalizimit do të nxisë evazion fiskal

Komente

avatar
  Subscribe  
Notify of