I kuqi i buzëve zbehet

30/07/2012 4:21 PM 0 komente

Duke filluar me kolapsin e gjigantit bankar “Lehman Brothers” në shtator 2008, ekonomitë globale kanë qenë në një udhëtim “rrëshqitës”. Nuk ka treg të konsumit që nuk është dëmtuar, edhe pse i ashtuquajturi “faktori i kuq buzësh” mund të ketë ndihmuar të zbusë efektin në industrinë e bukurisë. Thënë më saktë, industria e bukurisë dhe shitja e produkteve të bukurisë nuk vuan aq ashpër sa industritë apo produktet e tjera.

 

Që në Depresionin e Madh të viteve ‘30, ndërkohë që Produkti i Brendshëm Bruto i SHBA-së preku nivelin më të ulët, rritja e shitjeve për produktet kozmetike tregoi që konsumatorët nuk kanë dashur dhe nuk duan të jenë të gatshëm të heqin dorë nga pak luks, pavarësisht se sa keq mund të jenë gjërat. Më tej, Leonard Lauder-i i dedikohet “faktorit i kuq buzësh”, pasi ai mbështeti idenë se, “gjatë kohëve të vështira ekonomike, shitjet e kozmetikës me ngjyra të forta rriten, ndërsa konsumatorët frenojnë shpenzimet për fatura të mëdha si makina apo mallra elektrike.

Ndaj, a “piu ujë” kjo teori gjatë rënies më të fundit ekonomike? Mund të themi – po edhe jo. Në fund të vitit 2008, “Euromonitor International” vuri në dukje se Amerika e Veriut dhe Azia (veçanërisht Japonia) kanë vuajtur më shumë dhe markat e mira u prekën shumë. “Në nivel global, industria pësoi goditje, por kemi vënë re se konsumatorët janë të gatshëm të provojnë markat (ndonëse më pak të shtrenjta), ndërsa në të kaluarën ka pasur një tabu lidhur me buxhetin e bukurisë”, thotë analistja e “Euromonitor”, Irina Barbalova. Ajo vë në dukje suksesin e produkteve në një rang më të ulët çmimesh nga “Primark”, “TK Max”, “Supderdrug” dhe “Aldi”. Gjithsesi, çmimi i lirë nuk është i mjaftueshëm. “Markat që mund të transmetojnë ndjesinë e luksit do të jenë të suksesshme”, vlerëson ajo. Sipas Barbalova, konsumatorët duan vlerë të shtuar me çmim më të ulët dhe po kërkojnë cilësi.

Një tjetër trend që po shihet kohëve të fundit është që markat e mëdha kanë bërë përpjekje për të hedhur në treg linja më pak të shtrenjta, që ofrojnë disa nga përbërësit e njëjtë të R&D, si linja me kosto më të lartë. “L’Oréal’s Youth Code” (16 dollarë), për shembull, mbështetet në pjesën më të madhe të përbërësve e teknikave të prodhimit te “Lancôme Génifique”, pronë e “L’Oréal” (60 dollarë). “Segmenti i luksit të ‘L’Oréal’ po vuan dhe kuptohet që ai duhet balancuar me kombinim ofertash”, thotë Barbalova.

Kujdesi për lëkurën duket se është një nga kategoritë më elastike, pjesërisht sepse kompanitë kanë vazhduar të investojnë në teknologji të reja, e veçanërisht në efektet kundër moshës. “Kujdesi për lëkurën është ende motori që gjendet pas industrisë dhe është një prej performuesve më të mirë e të qëndrueshëm në treg”, thotë Carrie Mellage, drejtore e produkteve të konsumit te “Kline & Company”.

E kundërta ka ndodhur me aromat, të cilat kanë ruajtur me vështirësi ritmin. “Fragrancat vuajnë vazhdimisht, pasi suksesi apo jo i tyre varet nga dyqanet”, thotë Mellage. Sipas studimeve, dobësimi i ekonomisë ka rritur peshën e dyqaneve të specializuara në produktet kozmetike ndaj totalit të tregut, me 2 pikë krahasuar me nivelet e vitit 2003. Mellage beson se rënia ka nxitur si prodhuesit, edhe tregtarët të jenë më aktivë në stimulimin e blerjeve. Marka si “Lancôme”, “Estée Lauder” e “Clarins” kanë rritur marketingun për shitjet direkte, duke përfshirë dhurata apo ulje.

Sot ka shenja që ekonomia po rimëkëmbet dhe më e keqja ka kaluar. “Lancôme”, për shembull, siguroi rritje shitjesh prej 18% në tregun aziatik.

 

“Faktori i kuq buzësh”, strategjia e marketingut në një periudhë rënie:

Markat që ruajnë një kuptim luksi do të jenë të suksesshme

Kujdesi për lëkurën, kategoria më elastike ndaj krizës, pasi kompanitë kanë vazhduar të investojnë në teknologjitë e reja

Shitjet direkte kanë treguar rritje të papritur

Markat “e zgjuara” po punojnë me disa kanale plotësuese furnizimi

Shitësit me pakicë mund të kenë zënë një qoshe të ngrohtë, por ka një nevojë domethënëse për të pasur diçka të re dhe interesante

 

 

Komente

avatar
  Subscribe  
Notify of