Pjesa më e madhe e Investimeve të Huaja Direkte në tremujorin e tretë të vitit erdhën nga Italia.
Të dhënat e Bankës së Shqipërisë tregojnë se investimet italiane arritën vlerën e 42 milionë eurove, 7.8% më shumë krahasuar me të njëjtën periudhë të një viti më parë. Për të gjithë 9-mujorin, investimet italiane arritën në 103 milionë euro, me rritje vjetore prej 9.6%.
Italia ka marrë vendin e dytë mes investitorëve të huaj në Shqipëri gjatë këtij viti. Vendin e parë, megjithatë, vazhdon ta mbajë me diferencë të konsiderueshme Holanda. Për të gjithë 9-mujorin e parë të vitit, investimet holandeze kishin vlerën e 139 milionë euro, 21% më pak krahasuar me të njëjtën periudhë të vitit të kaluar.
Megjithëse kanë pësuar rënie krahasuar me vitin 2020, investimet holandeze përbëjnë pothuajse 20% të Investimeve të Huaja Direkte për këtë vit. Vetëm për tremujorin e tretë, investimet nga kompani me aksionerë të regjistruar në Holandë arritën vlerën e 35 milionë eurove, 15% më pak krahasuar me të njëjtën periudhë të vitit të kaluar.
Arsyeja kryesore e kryesimit të Holandës në renditjen e investitorëve të huaj gjatë viteve të fundit është fakti se Holanda është një nga juridiksionet europiane ku regjistrohen më shumë kompani offshore. Ekspertët e çështjeve ligjore e shpjegojnë me dy arsye kryesore faktin pse Holanda është një juridiksion i preferuar për regjistrimin e shoqërive holding, përmes të cilave ushtrohet kontrolli mbi investimet e kryera në vende të ndryshme të botës. Arsyeja e parë është se Holanda ka një rrjet të gjerë të marrëveshjeve me vende të tjera të botës për shmangien e tatimit të dyfishtë. Kjo i ndihmon kompanitë për të shmangur ndërlikimet tatimore në momentin e shpërndarjes dhe transferimit të dividendëve të fituara nga investimet e kryera në vende të tjera.
Arsyeja e dytë pse Holanda është një vend i preferuar për regjistrimin e kompanive është sepse legjislacioni i atjeshëm garanton një shkallë të lartë konfidencialiteti lidhur me pronësinë e aksioneve mbi një kompani. Në këtë pikë, Holanda ka karakteristika të ngjashme me vende të tjera që njihen si juridiksione offshore. Pikërisht kjo është arsyeja kryesore pse disa prej kompanive që kanë fituar kontrata koncesionare në Shqipëri rezultojnë të regjistruara në Holandë.
Pas Holandës dhe Italisë, investitori i tretë më i madh këtë vit është Turqia, me 63 milionë euro gjithsej, të shpërndara pothuajse në mënyrë uniforme gjatë dy tremujorëve të parë. Megjithatë, investimet turke kanë pësuar rënie me 18% krahasuar me një vit më parë. Sipërmarrja turke në Shqipëri është sidomos e përqendruar në kompani të mëdha të sektorëve strategjikë, si Banka Kombëtare Tregtare, Kurum, Limak apo Ayen Energji: ndërkohë, kompania e telekomunikacioneve, Albtelecom, është drejt shitjes te hungarezët e 4iG dhe arritja e marrëveshjes u zyrtarizua në muajin dhjetor.
Në rritje edhe për këtë vit po rezultojnë investimet e kompanive franceze, që në nëntë muaj arritën vlerën e 58 milionë eurove, rreth dy herë më shumë krahasuar me një vit më parë. Në Shqipëri veprojnë disa kompani të rëndësishme me kapital francez, si ALEAT, Selenice Bitumi, por edhe disa sipërmarrje të investimit në energjinë e rinovueshme.
Në rritje për këtë vit janë investimet austriake, që për nëntë muaj kanë arritur në 45 milionë euro, 41% më shumë krahasuar me një vit më parë.
Në rënie edhe për këtë vit janë investimet zvicerane, që zbritën në 39 milionë euro, 88% më pak krahasuar me 9-mujorin 2020. Investimet zvicerane në vitet e fundit kanë qenë të lidhura kryesisht me gazsjellësin TAP dhe përfundimi i punimeve ka sjellë rënie graduale të tyre. Sidoqoftë, për nga vlera totale e investimeve të matura si stok në fund të periudhës, në fundin të muajit shtator Zvicra vazhdon të kryesojë, me rreth 1.74 miliardë euro, e ndjekur nga Holanda me 1.45 miliardë euro dhe Kanadaja, me 1.18 miliardë euro.

Ky është artikull ekskluziv i Revistës Monitor, që gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”.
Artikulli mund të ripublikohet nga mediat e tjera vetëm duke cituar “Revista Monitor” shoqëruar me linkun e artikullit origjinal.