Italia tërheq një rekord prej 110 miliardë euro në shitjen e parë të bonove të epokës së Draghi 

16/02/2021 4:38 PM 0 komente

Investitorët shfaqën interes të lartë për blerjen e bonove 10-vjeçare të Italisë, pasi Mario Draghi u betua si kryeministër, duke ofruar 110 miliardë euro, në tejkalim të ndjeshëm të sasinë së ofruar deri tani.

Kërkesa e lartë nënvizon se si perspektivat ekonomike nën drejtimin e ish-shefit të Bankës Qendrore Europiane janë në linjë me nxitimin e investitorëve për të pasur kthime pozitive, të cilat është e vështirë t’i gjesh në tregun e borxhit në zonën e euros.

Oferta e investitorëve ishte 110 miliardë euro, sipas Financial Times. Kjo shumë tejkaloi 108 miliardë euro të ofruara në ankandin e fundit 10-vjeçar, të organizuar nga bankat e investimeve në qershor 2020, e cila mbante rekordin për shitjen më të madhe të bonove italiane deri tani.

Kërkesa më e lartë ka ardhur ndërsa investitorët presin që Draghi, i cili është kredituar gjerësisht për lehtësimin e krizës së borxhit të bllokut një dekadë më parë, t’i japë një nxitje të fortë ekonomisë italiane, pas një recesioni historik vitin e kaluar.

Draghi do t’u adresohet ligjbërësve për herë të parë të mërkurën, ku pritet të paraqesë planet e tij ekonomike. Ai ka një shumicë të konsiderueshme parlamentare, që do ta ndihmojë të ecë përpara me nismat e tij.

Analistët janë optimistë se Draghi, i cili u betua si Kryeministër tre ditë më parë, do të jetë në gjendje të përdorë me efikasitet fondin e madh të rimëkëmbjes të nënshkruar nga vendet anëtare të BE dhe të miratojë një seri reformash politike dhe ekonomike për të mbështetur ekonominë e goditur nga kriza.

“Ne presim që z. Draghi të jetë i suksesshëm në finalizimin e fondit të Rimëkëmbjes dhe Qëndrueshmërisë dhe në fillimin e një procesi të reformave strukturore, që do të ndikojë në një pasiguri më të ulët të brendshme politike në vitin 2021,” tha Luca Cazzulani, analist në UniCredit Milano.

Komente

avatar
  Subscribe  
Notify of