Grupet luksoze po gjejnë mënyra për të “hequr qafe” inventarin e tyre të pashitur. Më shumë sesa çmimet e ulëta
Çdo veshje e shitur nga “Gucci” apo “Givenchy” konsiderohet si e domosdoshme për atë sezon. Por, ka rezultuar se disa janë më të domosdoshme se disa të tjera, shkruan The Economist. Megjithatë, pavarësisht famës që ato kanë, edhe për disa prej markave më të famshme po bëhet gjithnjë e më e vështirë për të shitur gjysmën e produkteve të tyre më çmim të plotë.
Bota luksoze po kërkon dëshpërimisht mënyra të reja për të shitur këto stoqe mallrash të padëshiruara. Përballja me mallrat e “fund-sezonit”, është një prej problematikave më të rëndësishme të markave luksoze. Ofrimi i zbritjeve për të shitur mallrat e sezoneve të kaluara është një mashtrim që ka rezultuar të jetë i suksesshëm te disa prej shitësve më të rëndësishëm.
Por ulja e çmimeve për të pastruar raftet shoqërohet me një imazh jo fort të mirë për këto marka. Dikur, disa prej markave më luksoze, vendosnin t’i hidhnin veshjet e sezoneve të kaluara dhe nuk pranonin t’i shisnin ato me çmime më të ulëta. Kjo ndryshoi pas korrikut të vitit 2018, kur “Burberry” u përball me një skandal pasi zbuloi se kishte shkatërruar rreth 38 milionë dollarë mallra të sezonit të kaluar. Franca do ta ndalojë plotësisht një praktikë të tillë deri në vitin 2023.
Grupet luksoze nuk bien dakord me reduktimin e prodhimit të tyre, duke pasur parasysh që mallrat mund të shiten për dhjetë herë më shumë se sa kostoja e tyre. Por vendosja e shenjave të tilla si “Ulje” krijon konfuzion. “Për më tepër, ju duhet të vendosni në baraspeshë shitjet e gjeneruara nga periudhat kur ka ulje dhe dëmin që i bëhet vlerës së markës nga këto ulje”, shprehet Luca Solca nga “Bernstein”.
“Prada”, një markë e famshme italiane, tha vitin e kaluar se do të nxirrte me ulje të gjitha mallrat që i mbeteshin stok. Ofertat e disa markave janë të përjetshme, kështu për shembull mund të themi se një çantë dore “Hermes” u mbijeton sezoneve të ndryshme të modës. Marka të tjera arrijnë të shpëtojnë nga mallrat e sezoneve të kaluara, duke ia shitur me çmime më të ulëta stafit të tyre dhe miqve që ata mund të kenë.
Shumë nga mallrat e sezoneve të kaluara përfundojnë të shiten me çmime më të ulëta në internet, në faqe të tilla si Yoox dhe Saksoff5th.com. Por asnjë nga metodat e mësipërme nuk do të mjaftonte për të zbrazur magazinat me modele të sezoneve të kaluara. Për t’i zbrazur vërtet ato magazina dhe raftet, marka të ndryshme tani po shikojnë si zgjidhje të vetme të tyren “outletet e mëdha” jashtë qyteteve.
Një prej tyre është edhe “Bicester Village”, një orë larg qendrës së Londrës dhe që sipas përshkrimit të një turisti kinez i ngjan një fshati të çuditshëm europian. Dyqanet këtu janë plot me produkte që markat e famshme nuk arritën t’i shisnin dot me çmimin e vendosur në fillim. Uljet këtu shkojnë edhe deri në 70 për qind të vlerës fillestare të një produkti të caktuar. Ky koncept po lulëzon gjithnjë e më shumë.
Nga rreth 281 miliardë euro në shitjet e markave të luksit vitin e kaluar, 37 miliardë euro u gjeneruan në dyqane të tilla me çmime të ulëta, sipas firmës së konsulencës “Bain”. Shifra është rritur me 85% në pesë vjet. Dy gjëra mund t’u vijnë në ndihmë likuiduesve të dëshpëruar për të hequr qafe inventarët e tyre.
E para është rritja e shitjeve online të rrobave të dorës së dytë: gjithkush do të mësohej me faktin që të lexonte në etiketa “mall i përdorur”, më mirë sesa mall i ri, por me çmime të ulëta. E dyta është rimodelimi i një veshjeje të caktuar duke e risjellë atë në sezonin e ri. Por, për markat luksoze, asnjëra prej dy zgjidhjeve të mësipërme nuk është e pranueshme.