Le ta pranojmë, komunikimi me kolegët ka qenë gjithmonë rraskapitës, por tani që komunikimi ka kaluar në një plan tjetër, në atë virtual, nëpërmjet platformave si Zoom, duket sikur po luhet një lojë krejtësisht e re.
Nëse nuk mund t’i duroni shprehitë e kolegëve tuaj, si mund ta zhvilloni pa stres komunikimin virtualisht?
Është e kuptueshme. Komunikimi përmes kompjuterëve mund të keqinterpretohet. Ju lexoni postën elektronike ose lexoni me shpejtësi mesazhet në moment dhe mund të merrni idenë e gabuar.
E gjitha kjo është rraskapitëse, prandaj ja se si mund ta përmirësoni komunikimin tuaj me bashkëpunëtorët tuaj.
1. Flisni ballë për ballë me kolegët tuaj, jo nëpërmjet email-eve
Ju dërgoni email-in tuaj dhe nuk keni pse të komunikoni fare. A mund të shkojë më mirë se kaq? Po mundet, sepse email-i nuk është aspak efektiv dhe mbi të gjitha ai dëmton komunikimin me kolegët tuaj. Pa e parë tjetrin ballë për ballë është e lehtë që të lindin keqkuptime. Sa më shumë që të mundeni, mundohuni që bisedat t’i bëni ballë për ballë, dhe në realitetin ri të të punuarit online, mundohuni edhe aty të “komunikoni ballë për ballë nëpërmjet ekranit”.
2. Kushtojini vëmendje shenjave tuaja joverbale
Kur flisni me kolegët personalisht (ose në ekran), tregoni kujdes për shenjat tuaja joverbale. Fjalët tuaja mund të thonë se jeni dakord me diçka ose ju pëlqen ajo që po thotë bashkëpunëtori juaj, por gjuha e trupit dhe fytyra juaj mund të thotë diçka tjetër.
Në vend të kësaj, kur jeni duke biseduar me kolegët tuaj, sigurohuni që fjalët dhe shprehjet e fytyrës të përputhen. Ndonjëherë njerëzit kuptojnë më shumë nga shenjat tuaja joverbale sesa fjalët që ju thoni, kështu që tregohuni të kujdesshëm me sjelljen tuaj.
3. Përsëritni ato që tha kolegu juaj
Kur jeni duke komunikuar me kolegët tuaj, përsëritni ato që ata thanë për të konfirmuar se i kuptoni. Kjo është veçanërisht e rëndësishme nëse jeni duke punuar së bashku në një projekt ose kur merrni vendime.Mos kini frikë të bëni edhe ju pyetje. Nëse nuk e keni kuptuar mirë ose nuk ju kujtohet, pyesni! Më mirë të pyesni, sesa ta keni kuptuar gabim diçka.
4. Anashkalojeni politikën dhe fenë
Ka disa gjëra për të cilat thjesht nuk bisedohet në punë, si për shembull për politikën dhe fenë. Në ditët e sotme mund të anashkaloni edhe bisedat për lajmet aktuale. Këto janë tema ku mund të përfshihesh shumë lehtë emocionalisht. Prandaj mundohuni t’i shmangni tema të tilla në ambientet e punës. Është rraskapitëse të përpiqesh të provosh pikëpamjen tënde ose të debatosh me të tjerët. Mos e rrezikoni marrëdhënien tuaj me kolegët tuaj duke folur për tema që nuk i përkasin punës.
5. Përqendrohuni tek aspektet pozitive
Pas vitit që kemi lënë pas, është e lehtë të përqendrohesh tek aspektet negative, por për çfarë shërben? Në vend të kësaj, përqendrohuni tek aspektet pozitive, veçanërisht kur bëhet fjalë për punë me kolegët tuaj.
Në vend që të flisni për ato që kanë bërë gabim, pse të mos komentoni diçka pozitive? Edhe nëse është diçka si shprehje të tilla “Më pëlqen këmisha juaj” ose “Faleminderit për punën tuaj të palodhur në atë projekt”, përdorini sa më shumë, sepse ato do t’ju ndihmojnë për të krijuar një ambient sa më pozitiv dhe në harmoni.
Ju mund të mos keni nevojë të ndryshoni shumë rreth mënyrës se si komunikoni. Vetëm shumë pak, por që do të thotë shumë në lidhje më marrëdhënien me bashkëpunëtorët tuaj. Kjo madje mund ta çojë punën tuaj në një nivel krejtësisht të ri. / The Ladders