Kakao, pritet më pak prodhim

28/03/2012 1:10 PM 0 komente

Çokollatat dhe ëmbëlsirat me kakao rrezikojnë të na kushtojnë më shtrenjtë, për shkak të një tkurrje të mundshme të prodhimit.

Organizata Ndërkombëtare e Kakaos (ICCO) parashikon që prodhimi global i këtij produkti të bjerë me 8% gjatë sezonit të prodhimit 2011-2012.

Sasia e prodhuar këtë sezon pritet të jetë 3.96 milionë tonë.

Vendet më të varfra si Gana janë “pronarët” e kakaos, produktit shumë të pëlqyer në botën e zhvilluar. I gjithë prodhimi i kakaos është i përqendruar në disa vende të Afrikës,

Amerikës Latine dhe në Lindjen e Largët. Në dhjetë vitet e fundit, tregu global ka shënuar një normë mesatare rritje prej 2% në vit, një nivel më i ulët krahasuar me normën e rritjes së konsumit (3-5%).

Prodhimi i siguruar nga Afrika ka rënë këto vitet e fundit, duke zbehur peshën që zë kontinenti afrikan në produktin bazë për një rrjet të tërë industrish ushqimore.

Gjithsesi, Afrika do të mbetet prodhuesi kryesor i kakaos në botë edhe në të ardhmen. Sipas të dhënave të FAO-s, vitin e kaluar, rreth 65% e kakaos së prodhuar në total erdhi nga Afrika.

Në këtë treg po ruan një peshë të qëndrueshme Lindja e Largët (19%).

Me rënien e prodhimit, këtë vit, pritet të bien edhe rezervat e këtij tregu. Niveli i stokut pritet të bjerë me 5%, pra në 42.7% të totalit të prodhimit, vlerëson ICCO.

Vendet e zhvilluara do të vazhdojnë të jenë konsumatorët më të mëdhenj të kakaos. Pesha e konsumit të këtyre vendeve ka arritur në 64% të totalit të konsumit.

Sipas të dhënave të ICCO-s, sasia e konsumit në vendet e zhvilluara ka arritur në 2.3 milionë tonë në vit.

Fakti që Europa nuk prodhon kakao, nuk e ka penguar këtë treg të zhvillohet në përpunimin dhe shtimin e vlerës së kokrrave që vijnë në vendet e varfra.

Tregu europian vlerësohet të përpunojë rreth gjysmën e sasisë së kakaos, pra aq sa përpunohet në të gjithë pjesën tjetër të botës. Nga tregjet prodhuese, përpunimi ndalet vetëm në bluarje.

Gati 40% e sasisë së prodhuar tregtohet jashtë kufijve në gjendje pluhuri.

Ndërsa nuk parashikohet të ketë ndonjë ulje të dukshme të konsumit në tregjet e zhvilluara, rënia e prodhimit pritet të faturohet në çmim.

Të dhënat e tregut ndërkombëtar tregojnë se në fillim të vitit, çmimi i lëndës së parë për çokollatat e ëmbëlsirat e tjera me bazë kakao nisi të rritej. Krahasuar me muajin dhjetor, çmimi i kakaos u rrit gati 5%.

 

 

Ndryshimi i prodhimit dhe rezervave të kakaos

 

2010-2011       2011-2012

Prodhimi (mln tonë)    4.3                               3.96

 

Stoku (%)                     47.7                             42.7

 

Burimi: ICCO

 

 

Komente

avatar
  Subscribe  
Notify of