Për barrikadat tregtare mes Kosovës dhe Serbisë do të bëhet një debat publik, ku e pranishme do të jetë edhe ministrja e Industrisë, Ndërmarrësisë dhe Tregtisë, Rozeta Hajdari. Ditë më parë, Kosovë ka masa mbrojtëse antidamping ndaj produkteve të caktuara të importuara nga Serbia
Komisioni parlamentar për Ekonomi ka vendosur që debati publik lidhur me barrierat tregtare Kosovë-Serbi të mbahet pas zgjedhjeve, ku e pranishme kërkohet të jetë edhe ministrja e Industrisë, Ndërmarrësisë dhe Tregtisë, Rozeta Hajdari.
Në këtë Komision, deputetët e opozitës kanë ngritur edhe çështjen e krizës energjetike dhe vendimin e fundit të Gjykatës Themelore për kompensimin e rrymës së shpenzuar në veri të vendit.
Kryetari i Komisionit, Ferat Shala, sa i përket debatit për reciprocitet me Serbinë, tha se ai ndihmon proceset ekonomike dhe tregtare me Serbinë.
“Jemi tashmë të njohur me situatën ekonomike të vendit, barrierat dhe të gjitha sfidat që ballafaqohet ekonomia e vendit. Parimisht jam për të organizuar një debat të tillë, për të parë sfidat, mundësitë, dhe bashkëpunimin ndërinstitucional, por edhe ekzekutivin se deri në çfarë niveli ka ardhur për këtë situatë. Pse jo, edhe të shkëmbejmë përvojat në praktikë me ndihmën dhe mbështetjen e KDI-së.
Konsideroj që përveç aktorëve ekonomikë, odave ekonomike, do të duhej që në këtë debat të hapur përveç Komisionit parlamentar të jetë edhe ministrja e Tregtisë dhe Industrisë, për shkak të sfidave dhe rrethanave që ballafaqohet vendi ynë me problemet ekonomike të cilat aktualisht po kalojmë”, tha Shala.
Armend Muja, deputet nga LVV, kërkoi që debati të organizohet pas mbajtjes së zgjedhjeve.
“Unë propozoj që ky debat të mbahet në një kontekst jashtë presionit të zgjedhjeve lokale”, theksoi Muja.
Pal Lekaj, deputet nga AAK-ja theksoi se një debat i tillë është i domosdoshëm për shpërfaqjen e barrierave tregtare me Serbinë.
“Mendoj se është e domosdoshme dhe Komisioni për Ekonomi është i rëndësisë së veçantë, sepse çfarë do veprimi që merr qeveria, ne jemi pjesë e Parlamentit dhe duhet paraprakisht të diskutohet me ne. Presioni ndërkombëtar më tepër po ndikon në politikat e brendshme të Kosovës se sa tek Serbia kur jemi te reciprociteti”, theksoi Lekaj.
Sa i përket krizës energjetike, kryetari Shala ka kërkuar nga Qeveria t’i mbështesë gjigantët ekonomikë, siç janë Trepça dhe Ferronikeli që të mos humbin nga 1 mijë vende të punës. Shala po ashtu theksoi se nëse vazhdon trendi i çmimit të lartë të energjisë, asnjë kompani në vend nuk do të mund të përballojë këtë krizë.
“Industritë janë të mëdha, kanë dalë në tregun e lirë në një moment të caktuar, por nuk do të thotë që qeveria në situata të tilla krize, ku sot aktualisht janë rreth 1 mijë punëtorë pa punë në Ferronikel nuk mund t’i subvencionojë dhe të krijojë lehtësira që të kthehen prapë në tregun e KEK-ut (KEDS). Aktualisht nuk janë”, tha ai.
Për krizën energjetike, deputeti Lekaj ka kërkuar të raportojë në Komision ministrja e Ekonomisë, Artane Rizvanolli.
Deputeti Lekaj tha se po ashtu ngriti edhe çështjen e vendimit të fundit nga Gjykata Themelore për kompensimin e energjisë prej 40 milionë euro.
“Ne duhet për së afërmi të njoftohemi nga ministria për ekonomi, dhe edhe ZRRE-ja meqë kemi një vendim të Gjykatës Themelore për anulimin e vendimit që tani KEDS-i duhet t’i kompensoi diku 40 milionë euro. Ne kemi bërë edhe një shkelje tjetër për 11 milionë, por e lëmë që gjykata të vendos”, theksoi Lekaj.
Në anën tjetër, deputeti Armend Muja theksoi se aktualisht krizë energjetike në Kosovë nuk ka.
“Nuk po më pëlqen termi krizë energjetike, sepse ende nuk kemi një të tillë si Kosovë, por unë pajtohem që në rajon mund të kemi”, tha ai.
Ditë më parë, ministrja e Industrisë dhe Tregtisë, Rozeta Hajdari, ka deklaruar se kanë marrë dy vendime për masa mbrojtëse antidamping ndaj produkteve të caktuara të importuara nga Serbia. Hajdari ka treguar se vendimet kanë të bëjnë me importin e koncentratit të kafshëve dhe shpezëve, derisa tjetri për njësitë e bllokut ndërtimor. Ajo ka thënë se vendimi lidhet me masat mbrojtëse antidamping të importuara nga Serbia.
“Sot më 8 tetor, kemi marrë dy vendime për masa mbrojtëse antidamping ndaj produkteve të caktuara të importuara nga Serbia. Njëri vendim cakton masën antidamping prej 3 centë për kilogramë në importin e koncentratit të kafshëve dhe shpezëve nga Serbia. Vendimi tjetër cakton masë antidamping prej 3 centë për njësitë e bllokut ndërtimor me origjinë nga Serbia”.
Hajdari ka thënë që të dy vendimet janë marrë në përputhje me Kushtetutën e Republikës së Kosovës me ligjin për masat antidamping.
Ky është artikull ekskluziv i Revistës Monitor, që gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”.
Artikulli mund të ripublikohet nga mediat e tjera vetëm duke cituar “Revista Monitor” shoqëruar me linkun e artikullit origjinal.