Konflikti për emrin

27/07/2015 3:00 PM 0 komente

Një ditë pasi kompania e telefonisë celulare AMC paraqiti identitetin e saj të ri, duke u quajtur Telekom Albania, ka reaguar operatori tjetër i telefonisë fikse dhe celulare ALBtelecom. Sipas një njoftimi zyrtar Albtelecom ka si emërtesë shqiptare Telekomi Shqiptar dhe përdorimi i këtij emri është tërësisht i ndaluar bazuar në ligjet tregtare shqiptare në fuqi, dhe direktivat e Bashkimit Evropian.

 

Albtelecom: Përdorimi i emrit Telekom Albania nga një tjetër kompani është i ndaluar

Sipas deklaratës zyrtare: “ALBtelecom, i njohur nga Qytetarët Shqiptarë edhe si Albanian Telecom, duke zotëruar edhe emërtesën zyrtare Telekomi Shqiptar përpara privatizimit, është një kompani po aq e vjetër sa Shteti Shqiptar me rrënjë që zgjaten 104 vjet më parë. Ky institucion, në të cilin Shteti Shqiptar edhe sot zotëron 20 përqind të aksioneve, është kthyer në një identet të konceptit të Telekomunikacioneve dhe Teknologjisë në Shqipëri.

Përdorimi i emrit Albanian Telecom nga kompani të tjera së bashku me të gjitha versionet e mundshme të tij dhe i cilitdo emër që në mënyrë direkte sjell në vëmendje emrin Albanian Telecom dhe përkthimet e tij, është tërësisht i ndaluar bazuar në ligjet tregtare shqiptare në fuqi, dhe direktivat e Bashkimit Evropian.

Albanian Telekom/Telekomi Shqiptar nuk është vetëm një emër kompanie, por gjithashtu edhe një pronë historike e Shtetit Shqiptar. Fakti që regjistrimi i emrit Telekom Albania, që ngjan identikisht me Albanian Telecom thjesht me një radhitje tjetër të fjalëve, është jo vetëm kundër ligjeve tregtare në fuqi, por edhe kundër kodeve të QKR-së dhe praktikave të Autoritetit të Konkurrencës.

Për arsyet më sipër, është shumë surprizuese për ALBtelecom që të shohë përdorimin zyrtar dhe lançimin e emrit të kësaj kompanie nga një kompani tjetër. Gjithësesi, pavarësisht së më lart, ne ende besojmë se ky nuk është veprim i paramenduar, por një pikë pakujdesie brenda institucionit.

ALBtelecom është gati për të përdorur të gjitha të drejtat ligjore lidhur me këtë çështje, gjithsesi ka besim të plotë se ndryshimet përkatëse do të ndodhin dhe në këtë mënyrë nuk do të ketë nevojë për veprime ligjore”, përfundon deklarata e Albtelecom.

 

AMC bëhet Telekom Albania; Blatsios paralajmëron konsolidime

Kompania e telefonisë celulare AMC ka prezantuar javën e kaluar identitetin e ri të saj. Kompania do të quhet tashmë Telekom Albania, pas bashkimit me rrjetin gjerman të telekomunikacionit, Deutsche Telecom.

Gjatë prezantimit të identitetit të ri, drejtori ekzekutiv I AMC Dimitris Blatsios Tregu pohoi se tregu shqiptar i telefonisë celulare do të konsolidohet, pasi ai është shumë i vogël dhe nuk ka hapësirë për 4 operatorë.

Mediat turke shkruanin pak javë më parë se Deutsche Telekom është në negociata në Shqipëri për të blerë operatorin e telefonisë fikse dhe celulare Albtelecom, por këto zëra janë mohuar gjithnjë në mënyrë të fuqishme nga Albtelecom.

Komente

avatar
  Subscribe  
Notify of