Ministri i Punës dhe Mirëqenies Sociale, Skender Reçica ka pritur sot në takim ambasadorin e Shqipërisë në Kosovës, Qemal Minxhozi, për të diskutuar lidhur me hapat në funksion të zbatimit të Marrëveshjes për Mobilitet për Punë, që është nënshkruar në mbledhjen e fundit të dy qeverive.
“Sot, bashkë edhe me zëvendëskryeministren znj. Albulena Balaj-Halimaj pritëm në takim ambasadorin e Shqipërisë në Kosovës, z. Qemal Minxhozi, për të diskutuar lidhur me hapat që kemi ndërmarrë në funksion të implementimit të Marrëveshjes për Mobilitet për Punë, që kemi nënshkruar në mbledhjen e fundit të dy qeverive”, ka treguar ministri Reçica.
Reçica është shprehur se janë të gatshëm për ta jetësuar sa më parë këtë marrëveshje, që për qëllim ka përmirësimin e fushës së punësimit dhe aftësimit profesional, integrimin e një tregu të përbashkët të punës Kosovë-Shqipëri.
“Shpreha gjithë gatishmërinë time, që me mbështetjen e madhe edhe të zëvendëskryeministres Balaj-Halimaj, për ta jetësuar sa më parë këtë marrëveshje, që për qëllim ka përmirësimin e fushës së punësimit dhe aftësimit profesional, integrimin e një tregu të përbashkët të punës Kosovë-Shqipëri, përmbushjen e nevojave të qytetarëve për lëvizje të lirë të punëtorëve, hapjen e horizonteve të bashkëpunimit dhe integrimit andej dhe këndej kufirit”.
Më 2 tetor është mbajtur mbledhja e gjashtë e dy qeverive në Tiranë në përpjekje për të thelluar bashkëpunimin.
Në takimin e fundit, qeveritë sërish premtuan heqjen e barrierave kufitare për tregtinë dhe për këtë nënshkruan 13 marrëveshje, memorandume e protokolle.
Lexo edhe këtë: Këto janë 15 marrëveshjet që do të nënshkruhen ndërmjet Kosovë dhe Shqipërisë
Që prej janarit të vitit 2014 kur u realizua takimi i parë në Prizren, numri i marrëveshjeve të nënshkruara në këto takime arriti në 80.
Për Kosovën, Shqipëria është tregu më atraktiv. Ndërkaq në tregun e Kosovës, pra në kuptimin e importeve Shqipëria është partneri i tretë më i rëndësishëm tregtar.
Mesatarja e shkëmbimeve tregtare në mes të vendeve tona është 234 milionë euro në vit.
Kosova megjithatë është akoma në deficit tregtar me Shqipërinë, ndonëse në vitin 2020 ky deficit është më i vogël. Sidoqoftë, mesatarja e rritjes së eksporteve të Kosovës në Shqipëri është 12 për qind, ndërsa importet ndaj Shqipërisë ka një rënie mesatare prej 24 për qind.
Ky është artikull ekskluziv i Revistës Monitor, që gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”.
Artikulli mund të ripublikohet nga mediat e tjera vetëm duke cituar “Revista Monitor” shoqëruar me linkun e artikullit origjinal.