Mbyllja e sporteleve të tatimeve, si të veprojnë bizneset për marrjen e shërbimeve dhe tërheqjen e blloqeve

16/03/2020 11:00 PM 0 komente

Drejtoria e Përgjithshme e Tatimeve njoftoi se prej datës 17 mars, e deri në një njoftim të dytë, shërbimet e Administratës Tatimore nuk do të ofrohen në sportelet dhe zyrat e Shërbimit për Tatimpaguesit për shkak të masave të sigurisë për mos përhapjen e koronavirusit.

  Lexo edhe këtë: Tatimet: Shërbimet do të ofrohen vetëm online, mbyllen vizitat në sportele

Bizneset kanë shprehur shqetësimin se për vazhdimësinë e aktivitetit të tyre do duhet të marrin blloqe faturash. Tatimet kanë sqaruar se subjektet, që kërkojnë të pajisen me bllokun e faturave tatimore do të mund ta tërheqin atë nga data 17 mars pranë zyrave rajonale të administratës tatimore, me të njëjtën procedure si edhe më parë .

Burime nga tatimet sqaruan për “Monitor” se pavarësisht masave që janë marë për luftën ndaj koronavirusit, administrata tatimore do të ketë punonjës të saj që do u shërbejnë nevojave të bizneseve për blloqe të faturave tatimore.

Edhe pse shumë prej shërbimeve në organet tatimore mund të bëhen dhe sugjerohet që të bëhen online përmes platformave dixhitale e-Albania apo edhe e-filing, sërish për marrjen fizike të blloqeve tatimore të njohura nga gjithë biznesi, si blloqet e faturave të TVSH-së, do të ketë punonjës së administratës tatimore që do të shërbejnë për plotësimin e kërkesave të këtij lloji.

Bizneset në periudha të zakonshme gjithmonë mbajnë rezervë blloqe TVSH-je, megjithatë për shkak të gjendjes së pazakontë të gjithë ata që do të duan të vazhdojnë të tërheqin fizikisht blloqet e faturave tatimore, mund të realizojnë këtë me paraqitjen fizike të tyre apo përfaqësuesve të tyre tek zyrat e drejtorive rajonanale tatimore, siç ka ndodhur më parë.

Për ofrimin e shërbimeve, si tërheqja e vërtetimeve, administrate tatimore njoftoi se ato do të kryhen vetëm përmes platformës elekronike e-Albania. Për shërbime të tjera gjithashtu, biznesi mund të përdorë llogarinë e deklarimit elektronik e-filing.

Komente

avatar
  Subscribe  
Notify of