Intervistë me Stela Dhami, Managing Partner – Albania, Colliers International
Ndërtimet në Tiranë po nxiten nga kërkesa për banesa për qëllime banimi apo investimi, si dhe nga kredia e bankave, sipas Stela Dhami, partnere menaxhuese për Albania, Colliers International.
Megjithatë, ajo shton se indikacionet e marra nga tregu aktualisht të çojnë të mendosh për një flluskë të mundshme në periudhën afatmesme.
Por gjithçka do të varet nga ecuria e ekonomisë gri, që është e pamatshme nga statistikat zyrtare.
Tirana vazhdon të mbetet qendra ekonomike dhe sociale, jo vetëm e Shqipërisë, por edhe e shqiptarëve, që jetojnë jashtë kufijve të saj. Kjo ka bërë që kërkesa për banesa, jo vetëm për qëllime banimi, por edhe për qëllime investimi, të shënojë rritje.
Zhvillimi i qendrave të reja si ajo e Bulevardit të Ri, apo projekteve rezidenciale në periferi, kanë rritur sipërfaqen e lejeve të ndërtimit, duke kulmuar në vitin 2021, i cili përkon me daljen nga pandemia.
Ndërkohë që duket se sektori i ndërtimit ka burimet e veta të financimit, pa u mbështetur te bankat, këto të fundit kanë mbështetur anën e kërkesës, duke dhënë shifra rekord kredish për blerje pasurish të patundshme. Vetë ofertat, që janë aktualisht në treg, tregojnë për atraktivitetin e ndërtesave si formë edhe investimi.
Sipas të dhënave tuaja, sa pritet të shtohet sipërfaqja e ndërtimeve në kryeqytet nga kullat e larta (për zyra, banesa, qendra tregtare) dhe si paraqitet kjo në raport me kërkesën?
Është e vështirë të kalkulohen saktësisht sesa sipërfaqe tregtare, sa banesa dhe sa zyra do të hyjnë në treg, pasi këto nuk janë të përcaktuara në mënyrë të saktë nga planet urbanistike dhe në lejet e ndërtimit.
Qendra tregtare në ndërtim, mesa kemi njohuri nuk ka, por ka komponentë komercialë brenda projekteve me përdorim miks. Në varësi të projekteve dhe vendndodhjeve, bëhet fjalë për një 20% hapësira tregtare dhe pjesa tjetër është kryesisht rezidenciale, kurse për kullat e biznesit, është hapësira zyrash.
Sa kanë arritur aktualisht çmimet maksimale në kryeqytet (apartamentet luksoze, zyrat, hapësirat tregtare), sipas zonave dhe si pritet tendenca e tyre?
Për sa u përket çmimeve të apartamenteve luksoze arrijnë nga 3,000-4,000 euro/m², zyrat zakonisht nuk janë në shitje, por shiten me një marzh 10-20% më shumë se pjesa rezidenciale. Ndërsa ambientet tregtare në projekte elitare mund të arrijnë nga 10,000-20,000 euro/m².
Cilët janë blerësit kryesorë, sipas zonave dhe çmimeve? Sa është çmimi maksimal (për metër katror) që mund të përballojë një familje mesatare shqiptare për blerjen e një apartamenti?
Blerësit kryesorë janë familjet e reja në zonat periferike dhe ato më qendrore, por në projekte jo-elitare.
Familjet me të ardhura të larta dhe me disa fëmijë parapëlqejnë komplekset rezidenciale, ose projektet elitare në zona qendrore si Blloku, Tirana e Re, sheshi “Skënderbej”, etj. Një familje mesatare shqiptare nuk mund të përballojë një çmim më shumë se 1,100 – 1,300 euro/m².
Sa potenciale e vlerësoni mundësinë që të ketë një flluskë të pasurive të paluajtshme në kryeqytet?
Indikacionet e marra nga tregu aktualisht të çojnë të mendosh për një flluskë të mundshme në periudhën afatmesme.
Gjithsesi, nëse ekonomia shqiptare do të vazhdojë të ndikohet nga faktorë që nuk përllogariten në statistikat kombëtare, atëherë efekti flluskë mund të shtyhet deri në një tronditje “external shok” që ekonomia mund të marrë nga faktorë të jashtëm, si pjesë e ekonomisë gri.
Ky është artikull ekskluziv i Revistës Monitor, që gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”.
Artikulli mund të ripublikohet nga mediat e tjera vetëm duke cituar “Revista Monitor” shoqëruar me linkun e artikullit origjinal.