Varianti Omicron i cili u zbulua në Afrikën e Jugut, deri më tani ka shkaktuar një numër të madh infektimesh në vende të ndryshme, me Afrikën e Jugut që është në krye të listës.
Varianti i ri i COVID-19, Omicron, është më i transmetueshëm se varianti i mëparshëm Delta dhe zvogëlon akoma më shumë efikasitetin e vaksinës, deklaroi Organizata Botërore e Shëndetësisë (OBSH) bazuar në të dhënat e saj paraprake. Së bashku me këtë, ajo gjithashtu ka informuar se varianti ka më pak gjasa të shkaktojë simptoma serioze. Ndërsa varianti Delta, i cili u identifikua për herë të parë në Indi në fillim të këtij viti, shkaktoi një numër maksimal infektimesh në të gjithë botën, në mënyrë të ngjashme, edhe varianti Omicron i cili u zbulua në Afrikën e Jugut ka shkaktuar deri më tani një numër të madh infektimesh në vende të ndryshme, me Afrikën e Jugut që është në krye të listës. Ai gjithashtu ka detyruar vendet të vendosin ndalime të udhëtimeve për fluturimet ndërkombëtare dhe të rivendosin edhe një herë kufizimet e brendshme për frenimin e përhapjes së virusit.
Për më tepër, edhe OBSH ka thënë se nuk është konstatuar ende arsyeja e shkallës kaq të lartë të transmetimit. Ende nuk është plotësisht e qartë nëse faktori që po kontribuon në përhapjen kaq të shpejtë të këtij varianti lidhet me tendencën e tij për t’iu shmangur përgjigjes imunitare apo lidhet me transmetueshmërinë e tij të lartë, shtoi OBSH.
Ndërkohë, OBSH ka vënë në dukje gjithashtu se deri më 9 dhjetor janë evidentuar raste të variantit Omicron në 63 vende.
Omicron tenton të shkaktojë raste të lehta ose asimptomatike, sipas OBSH
Sipas të dhënave të OBSH-së, varianti Omicron deri më tani ka shkaktuar raste më të lehta ose asimptomatike, megjithatë, ende nuk dihet me siguri rreziku i këtij varianti.
“Mbetet e paqartë se deri në çfarë mase Omicron mund të jetë më pak virulent. Duhen më shumë të dhëna për të kuptuar profilin e rrezikshmërisë”, shtoi OBSH. Më herët, më 26 nëntor 2021, Organizata Botërore e Shëndetësisë e identifikoi variantin si një variant shqetësues (VOC) duke u bazuar të këshillat e Grupit Këshillimor Teknik të organizatës për Evolucionin e Virusit.
U tha gjithashtu se varianti ishte shumë i ndryshëm nga virusi fillestar, me një numër të madh mutacionesh, duke përfshirë 26-32 të tilla në proteinën spike, gjë e cila thuhej se ishte shqetësuese, si dhe u deklarua se varianti i ri kishte potencialin e shmangies nga imuniteti dhe transmetueshmëri më të lartë.
Video / Monitor Ekonomi
