Banka Europiane e Investimeve, në kuadër të projektit të investimeve në rajonin verior të Shqipërisë, njoftoi se ka akorduar 200 mijë euro, për përgatitjen e planit.
BEI, sipas kontratës së nënshkruar me Fondin Shqiptar të Zhvillimit, që është autoriteti kontraktues, deklaron se kjo është faza e parë dhe ka lidhje me asistencën teknike me përgatitjen e një programi rajonal të investimeve në Veri të Shqipërisë.
Ky është hapi i parë në një program më të gjerë të asistencës teknike të miratuar me vlerë deri në 3 milionë EUR për t’u zbatuar në partneritet me FSHZH në mbështetje të rajonit.
Ndihma teknike, e financuar nga BEI, nëpërmjet Iniciativës së Rezistencës Ekonomike (ERI), ka të bëjë me një zonë që përfshin vijën bregdetare të Adriatikut midis Shëngjinit dhe Velipojës, brigjet e Liqenit të Shkodrës, lumit Buna dhe portës së Koplikut në Alpet shqiptare, dhe përfshin pjesë të territoreve të bashkive të Shkodrës, Lezhës dhe Malësisë së Madhe.
Si pjesë e këtij bashkëpunimi, BEI do të ndihmojë FSHZH-në në përcaktimin e Strategjisë së Integruar të Turizmit dhe Azhurnimit Urban të Portës Bregdetare të Alpeve, si dhe në vlerësimin e pasurive natyrore dhe potencialit të zonës, si dhe adresimin e çështjeve mjedisore. Kjo do të mundësojë përgatitjen e një plani afatmesëm dhe afatgjatë të investimeve kapitale që do të plotësojë Master Planin ekzistues të Alpeve duke përmirësuar aksesin, cilësinë e mjedisit dhe pajisjet lokale.
“Duke ndihmuar hartimin e një programi investimesh të infrastrukturës publike bazuar në potencialin rajonal të turizmit dhe një analizë të thelluar të mangësive ekzistuese të infrastrukturës, Banka do të kontribuojë në realizimin e potencialit të rritjes së pashfrytëzuar të veriut të Shqipërisë”, tha Alessandro Bragonzi, përfaqësuesi i BEI për Shqipërinë, Kosovë dhe Maqedoninë e Veriut.
Ky është artikull ekskluziv i Revistës Monitor, që gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”.
Artikulli mund të ripublikohet nga mediat e tjera vetëm duke cituar “Revista Monitor” shoqëruar me linkun e artikullit origjinal.