Lidhjet ekonomike, turizmin dhe projektet kryesore të infrastrukturës ishin në fokus gjatë vizitës së kësaj jave të Presidentit turk, Rexhep Tajip Erdogan, në Serbi. Presidenti i Turqisë zhvilloi një vizitë treditore në Serbi, ku lidhjet ekonomike mes dy vendeve, së bashku me tema të tjera, ishin në qendër të vëmendjes. “Turqia është e vetëdijshme se Serbia është një faktor i rëndësishëm i stabilitetit në rajonin e Ballkanit Perëndimor.
Përveç kësaj, Serbia përfaqëson një treg më të madh ekonomik për Turqinë në krahasim me çdo vend tjetër të Ballkanit Perëndimor”, tha për BIRN, Ivan Ejub Kostiç, drejtor i Qendrës Ballkanike për Lindjen e Mesme në Beograd. Në njoftimin nga Zyra e Shtypit e Presidentit turk thuhej se vizita e Presidentit Erdogan vinte menjëherë pas një ftese zyrtare të Presidentit të Serbisë, Aleksandar Vuçiç. Erdogan gjithashtu mori pjesë në Forumin e Biznesit Turqi-Serbi. Ai gjithashtu vizitoi Novi Pazar, një qytet kryesisht boshnjak (me popullsi myslimane) në Serbinë Jugperëndimore. Rreth 200 biznesmenë, ministra dhe zyrtarë turq e shoqëruan Erdogan-in gjatë vizitës në Serbi.
Në konferencën e shtypit më 26 shtator, Vuçiç tha se Turqia dhe Serbia do të nisin një kapitull të ri pas vizitës së Erdogan-it. “Vëllimi ynë tregtar në vitin 2016 ishte 800 milionë dollarë (682 milionë euro) por ne synojmë që kjo shifër të shkojë afër 1 miliard dollarëve (852 milionë euro) dhe qeveria serbe mirëpret dhe u bën thirrje investitorëve turq që të investojnë në Serbi”, tha më tej Vuçiç.
Turqia dhe Serbia janë afruar shumë me njëra-tjetrën vitet e fundit, duke u përqendruar në tregtinë dhe bashkëpunimin ekonomik sesa në mosmarrëveshjet e vjetra midis dy kombeve. Z. Kostiç shpjegoi se ndërsa politikat e Turqisë ndaj Serbisë ishin kryesisht të orientuara nga ekonomia, por kjo nuk do të thotë që temat fetare dhe ato kulturore nuk ishin të përfshira. “Vëllimi i tregtisë midis dy vendeve, investimet turke në Serbi dhe projekti i tubacionit të gazit turk në Turqi janë pikat ekonomike kryesore të vizitës së Presidentit turk.