Një panel i këshilltarëve të jashtëm të Administratës Amerikane të Ushqimit dhe Barnave (FDA) votuan me shumicë dërrmuese për të mbështetur përdorimin emergjent të vaksinës së koronavirus të Pfizer, duke i hapur rrugën agjencisë që të autorizojë vaksinën, teksa vendi ka humbur më shumë se 285,000 jetë nga COVID-19.
FDA pritet gjerësisht të autorizojë përdorimin emergjent të vaksinës brenda pak ditëve. Menjëherë pas miratimit pritet të fillojë shpërndarja dhe vaksinimi në Shtetet e Bashkuara.
Komiteti votoi 17-4 se përfitimet e njohura të vaksinës tejkaluan rreziqet e marrjes së saj për individët e moshës 16 vjeç e lart, ndërsa një anëtar i panelit abstenoi.
“Ky është një moment historik,” tha pas votimit Eric Dickson, shefi ekzekutiv i UMass Memorial Health Care, i cili nuk ishte në panelin këshillimor. Ai e quajti vaksinën nga Pfizer dhe partnerin gjerman BioNTech si “zgjidhja më e mirë për të na nxjerrë nga situata jonë aktuale dhe për të na ndihmuar të shpëtojmë jetë”.
Pfizer ka kërkuar që vaksina me dy doza të miratohet për përdorim tek njerëzit e moshës 16 deri 85 vjeç. Disa anëtarë të panelit këshillues diskutuan nëse personat 16 dhe 17 vjeç duhet të përfshihen në rekomandim. Në fund, ata votuan për çështjen, ashtu siç u parashtrua nga FDA, duke përfshirë vaksinimin e moshës 16 deri në 17 vjeç, shkruan Reuters.