Flet Gent Joca, Drejtor i Përgjithshëm i “Albanian Courier”
Shërbimi postar ishte kanali që lidhi bizneset me konsumatorët dhe rëndësia e tij u ndie sidomos në fillim të pandemisë. Nën ndikimin e kësaj situate, kompanitë e tregut u bënë më krijuese, duke parë mundësitë që ofronte e-commerce, e cila lulëzoi.
Gent Joca, Drejtor i Përgjithshëm i “Albanian Courier”, shprehet se kompania u ofroi klientëve një paketë specifike, e cila kishte jo vetëm shërbimin korrier, por edhe krijimin e një faqeje online, si dhe konsulencë për marketingun online. Në momentet e para, kjo paketë u përqafua nga biznesi, nën panikun e emergjencës që krijoi pandemia ndërsa sot, më shumë se një vit më pas, interesi për të vjen nga biznese që janë maturuar, të cilat e shohin e-commerce si një mundësi reale për të rritur biznesin.
Kriza e COVID-19 orientoi bizneset drejt e-commerce dhe një hallkë e rëndësishme në këtë zinxhir janë kompanitë postare. Si janë ndikuar këto të fundit në fluksin e punës në fillim të pandemisë dhe ecurisë së tanishme?
Fillimi i pandemisë COVID-19 u shoqërua me dy faza. E para ishte ajo 15 mars-fund i muajit prill. Në momentin e parë, vendosja e karantinës, i gjeti të gjithë të papërgatitur dhe me nevoja urgjente për t’u përmbushur. Kërkesat në izolim ishin të mëdha dhe në këtë moment u zgjua edhe e-commerce, që deri në atë moment ishte në nivele modeste. Njerëzit kishin nevojë, së pari, për ushqime kurse supermarketet, të mësuar me shitjen klasike në dyqan, u nxitën të gjenin kanale të reja për të arritur te konsumatori. Në fazën e parë, rrjetet e supermarketeve iu drejtuan shërbimit korrier.
Dy javë më pas, vetë këto rrjete nisën të organizojnë strukturat e tyre për të angazhuar stafin që kishin pa punë, për shkak të mbylljes së dyqaneve fizike, me shpërndarje derë më derë. Faqet e tyre online që ishin aktive dhe më parë, në këtë moment morën vëmendjen qendrore, duke u plotësuar drejt ofrimit të mundësisë për çdo individ për të blerë drejtpërdrejt çdo produkt që kishin në raftet fizike. Vetë shërbimi korrier shënoi rritje të vrullshme gjatë asaj kohe dhe për dinamikën që pati situata, i gjeti disi të papërgatitur, por kjo ishte afatshkurtër.
Shërbimi korrier ka nevojë për investime nga të dyja palët, si pjesa që është duke tentuar të shesë, edhe shpërndarja, pasi duhet të ketë sisteme të koordinuara ku bëhet porosia, konfirmohet, kalon te shpërndarja dhe më pas dorëzimi, arkëtimi dhe në fund kalimi i pagesave te shitësi. Këto mungonin në një pjesë të subjekteve dhe shtojmë këtu edhe volumin e lartë të punës, fillimi ishte disi i çorganizuar.
Por ritmi u kap shumë shpejt dhe gjithçka u stabilizua. Kjo ishte faza e parë. Në fazën e dytë, në fillim të majit, pati një relaksim të masave dhe dyqanet fizike nisën të ktheheshin në normalitet. Ushqimet, sidomos, nisën të tërhiqeshin te forma klasike, ku konsumatori viziton vetë dyqanin, ndërkohë që hynë në lojë produktet e tjera dhe ato biznese që kishin parë një përfitim pozitiv nga e-commerce edhe gjatë karantinës. Të tilla ishin veshjet, bizhuteritë, enët e kuzhinës, pajisjet dhe orenditë shtëpiake.
Edhe në këtë aspekt, ngërçi qëndron sërish në faktin që jo të gjithë kanë struktura të posaçme për të ofruar e-commerce të mirëfilltë. Nga maji e deri më sot, le të themi që kompanitë janë në një tjetër fazë. Investimet e panikut për të përballuar fazën e emergjencës tashmë ishin të menduara më mirë për e-commerce (bashkë me hallkat e tij ku futet edhe shpërndarja gjithashtu).
A ka qenë e nevojshme të rishikohet produkti që ofrohet nga kompanitë postare, ose të rimodelohet sipas situatës së pandemisë?
Ne si “Albanian Courier” reaguam shpejt që në mars të 2020-s. Lidhur me këtë konceptuam, përgatitëm dhe komunikuam një ofertë që ishte paketë e kombinuar në shërbim të e-commerce, e cila erdhi nën emërtimin “AC Market Hub”. Ajo konsiston në ofrimin e shërbimit korrier sipas formës “cash on delivery” (pagesë në dorë) dhe ofrimin e një faqe falas të shitjes online (e-commerce), të mbështetur me konsulencë të marketingut online. Paketa ishte e mirëmenduar dhe e dobishme në komunikimin me klientin.
Por gjatë realizimit hasëm vështirësi për shkak të shitësit (klientit), i cili sigurisht ka nevojë për kohën e vet, në funksion të shitjes online. Në momentet që po flasim, bizneset janë ndërgjegjësuar dhe edukuar dhe vendimi për kalimin/investimin në shitjen online merret për të bërë rritjen dhe zhvillimin e biznesit të tyre dhe jo për të përballuar një emergjencë momentale afatshkurtër.
Si paraqitet informaliteti në sektorin postar dhe cilat janë problematikat e tjera që vini re dhe kanë nevojë për vëmendje?
Pandemia dhe kufizimet patën një lloj ndikimi edhe tek informaliteti në shërbimin postar. Kjo ishte disi e lidhur zinxhir, duke nënkuptuar që shitësit online informalë ofronin edhe shpërndarjen në mënyrë informale. Këtë shpërndarje e bëjnë individë të vetëpunësuar, që nuk janë të regjistruar në Tatime. Duke qenë se punojnë në mënyrë informale me mjetet e tyre motor ose automjet, ofrojnë edhe çmime më të ulëta, duke deformuar, në njëfarë mënyre, tregun e shërbimit postar dhe konkurrencën.
Shërbimi i tyre, edhe pse informal, u leverdis shitësve, të cilët tentojnë me çdo kusht të gjejnë çmime të ulëta për të ulur kostot. Informaliteti zë një pjesë domethënëse në tregun e shërbimit postar, por ajo që ndodh realisht me këtë situatë është se kostoja shumë e ulët mund të kthehet në bumerang për bizneset, pasi një individ nuk mund të përballojë flukse të larta dhe do të çalojë te shërbimet dhe standardet që ofron, ndryshe nga kompanitë e konsoliduara me struktura të mirorganizuara.
Ky është artikull ekskluziv i Revistës Monitor, që gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”.
Artikulli mund të ripublikohet nga mediat e tjera vetëm duke cituar “Revista Monitor” shoqëruar me linkun e artikullit origjinal.