Thonë se është më mirë të kesh dashuruar dhe ta kesh humbur dashurinë, sesa të mos kesh dashuruar fare.
Kjo është e vërtetë. Por, njerëzit me inteligjencë të lartë emocionale mendojnë edhe diçka tjetër: është edhe më mirë të mos e humbasësh atë.
Mund të tingëllojë tepër arrogante, por njerëzit me inteligjencë emocionale arrijnë të kuptojnë se “të mos humbasësh” nuk do të thotë domosdoshmërisht që duhet “të fitosh”. Loja nuk ka përfunduar, edhe pse disa njerëz mund të mendojnë se ka mbaruar. Rezultati nuk është i pandryshueshëm.
Ekziston një strategji me tre pjesë, e cila përdoret nga liderët me inteligjencë emocionale për ta kthyer këtë aspiratë në realitet, veçanërisht kur bëhet fjalë për marrëdhëniet me njerëzit e tjerë. Ky njihet si “Rregulli i Ndikimit të Menjëhershëm”, për disa arsye që do të bëhen të qarta më poshtë.
Pjesa e parë: Të kuptuarit se “të mos fitosh” nuk do të thotë “të humbasësh”.
Le të fillojmë me ndryshimin në mendësi. Imagjinoni sikur po përpiqeni të rekrutoni një person shumë të rëndësishëm në biznesin tuaj, dikë me të cilin do të dëshironit vërtet të punonit. Por ai ose ajo ju refuzon dhe pranon një pozicion pune diku tjetër.
Njerëzit me inteligjencë emocionale e kuptojnë se megjithëse mund të jenë të zhgënjyer, kjo nuk do të thotë domosdoshmërisht se ky person ju ka refuzuar ose që nuk do të keni kurrë mundësinë ta sillni atë në kompaninë tuaj.
Kjo thjesht do të thotë që nuk e keni rekrutuar atë akoma.
Si një shembull tjetër, mund të imagjinoni sikur doni të punoni me një klient potencial, dikë që e dini se do ta bënte biznesin tuaj të ecte përpara. Por, ky klient heziton të bashkëpunojë me ju.
Me përjashtim të rastit kur jua kanë përplasur derën në fytyrë, njerëzit me inteligjencë emocionale e kuptojnë këtë refuzim si një përgjigje që “nuk është momenti i duhur”, në vend që ta kuptojnë atë si “kurrë”.
Pjesa e dytë: Komunikimi i reagimit
Të mësuarit me këtë mendësi është vetëm pjesa e parë e rregullit. Pjesa e dytë ka të bëjë me mënyrën se si ju e shprehni reagimin tuaj ndaj njerëzve të tjerë.
Njerëzit me inteligjencë emocionale përpiqen të gjejnë një mënyrë për të përfunduar çdo bisedë me nota të larta entuziazmi: një përmbledhje të situatës, një premtim për të ardhmen dhe, më e rëndësishmja, me mirënjohje.
Kjo mund të ilustrohet përmes letrës që trajneri i famshëm i basketbollit, Mike Krzyzewski nga Universiteti Duke, i shkroi të riut Michael Jordan në vitin 1980, kur ky i fundit refuzoi ftesën për t’iu bashkuar ekipit të Krzyzewski dhe u bë pjesë e Universitetit të Karolinës së Veriut, përpara se të bëhej lojtari më i mirë në historinë e NBA:
I dashur Majk:
Me keqardhje dëgjova që nuk je i interesuar për të mësuar më shumë për Universitetin Duke, megjithatë dua që ta dish se stafi im dhe unë personalisht të urojmë më të mirën në karrierën tënde në kolegj. Ti je një djalë i ri dhe do të kesh ndikim të menjëhershëm, në çfarëdo që të zgjedhësh. Të urojmë fat!
Sinqerisht,
Mike Krzyzweski
Pjesa e tretë: Mbjellja e farës.
Deri në këtë pikë, objektivi i rregullit të ndikimit të menjëhershëm jeni vetë ju: personi që duhet ta trajtojë refuzimin duke përdorur inteligjencën emocionale, në mënyrë që zhgënjimi afatshkurtër të mos sjellë një dekurajim afatgjatë.
Pjesa e tretë është ҫasti ku fokusi zhvendoset, në mënyrë që të shfrytëzohen jo vetëm emocionet tuaja për të bërë më të mundshëm suksesin final, por edhe ato të njerëzve të tjerë, në mënyrë sa më konstruktive.
Çështja qëndron këtu: duhet të gjeni mënyrën e duhur, jo thjesht për të bindur veten se një “jo” tani nuk është domosdoshmërisht një “kurrë” përgjithmonë.
Kjo lidhet edhe me mbjelljen e farës në mendjen e personit tjetër – në mënyrë që ata të mund të krahasojnë atë që ndodh më pas me atë që i keni thënë se mendoni se do të kishte ndodhur nëse do të kishin pranuar ofertën tuaj.
Kur një punonjës potencial ju refuzon, një përgjigje mund të ishte: “Faleminderit për kohën tuaj. Ju e dini që ne ju vlerësojmë shumë dhe jemi të bindur që do të vazhdoni të jeni një profesionist shumë i mirë. Shpresojmë se do të kemi mundësi të bashkëpunojmë me ju së shpejti.”
Për klientin që vendos të mos e blejë produktin tuaj tani, përgjigjja mund të ishte: “Më vjen keq që dëgjoj se ne nuk do të mund të bëhemi pjesë e suksesit tuaj për momentin. Është 100 për qind e qartë për mua që ju keni mundësinë të jeni biznesi lider në fushën tuaj. Unë do t’ju mbështes duke pritur për një mundësi tjetër për të punuar së bashku.”
Nuk është domosdoshmërisht e nevojshme që të përdorni saktësisht këto fjalë. Thelbi është që të përvetësoni këtë qasje dhe ta zbatoni atë në praktikë. Nëse ndiqni këto tre hapa, ju do të përforconi mentalitetin tuaj dhe do t’i sugjeroni personit tjetër që të krahasojë çfarëdo që do të ndodhë me parashikimin tuaj.
Çelësi për të zhvilluar inteligjencën emocionale është që të përdorni emocionet dhe veprimet – si tuajat, ashtu edhe ato të njerëzve të tjerë – për ta bërë më të mundur arritjen e qëllimeve tuaja, në mënyrë sa më etike dhe efektive. / INC