Një këndvështrim tjetër për ta parë Dorëheqjen e Madhe është si “Shkëputja e Madhe”. Në vazhdën e pandemisë dhe të zhvendosjes masive drejt punës fleksibël, 65% e punonjësve thonë se ndihen më pak të lidhur me kolegët e tyre.
Kjo mungesë e lidhjeve njerëzore mes punonjësve është një nga shtytësit kryesorë të largimeve vullnetare nga puna, sepse, sipas statistikave, punonjësit që ndihen të vetmuar u kushtojnë kompanive amerikane deri në 406 miliardë dollarë në vit. Një studim nga Cigna tregon se punonjësit e vetmuar kanë një mundësi më të madhe për t’u larguar nga puna, produktivitet më të ulët, bëjnë më shumë mungesa në punë dhe performojnë më dobët.
Ndërkohë, BetterUp zbuloi se punonjësit që kanë ndjesinë e përkatësisë në kompani, kanë më pak mundësi për t’u larguar nga puna, performancë më të lartë, bëjnë më pak mungesa dhe ndjehen më të kënaqur në vendin e tyre të punës. Të gjithë këta faktorë rezultojnë në kursime vjetore prej mesatarisht 52 milionë dollarë për një kompani me 10,000 punonjës.
Zgjidhja ndaj ndjesisë së mospërkatësisë në vendin e punës është promovimi i miqësive dhe lidhjeve kuptimplote në punë. Një raport i vitit 2019 nga Instituti i Lidershipit dhe Menaxhimit zbuloi se krijimi i marrëdhënieve të ngushta me kolegët ishte faktori më i rëndësishëm që përcaktonte nivelin e kënaqësisë në punë për 77% të të anketuarve. Paga renditej e teta në listë.
Gallup raporton se vetëm 30% e punonjësve kanë një mik të ngushtë në vendin e punës, por ata që e kanë një të tillë janë shtatë herë më të angazhuar në punë. Punonjësit që kanë një mik të mirë në punë kanë më shumë gjasa të angazhohen me klientët, të bëjnë punë më të mirë, të kenë mirëqenie më të lartë dhe kanë më pak gjasa që të lëndohen në punë. Platforma Imperative zbuloi se ka vetëm 1% mundësi që të ndiheni të përmbushur në jetë nëse ju mungojnë marrëdhëniet kuptimplota në punë.
Teksa Dorëheqja e Madhe është në vazhdim, këtu janë katër mënyra për të ndihmuar ekipin tuaj që të ndërtojë marrëdhënie më të mira në vendin e punës.
- Krijimi i marrëdhënieve në vendin e punës duhet të jetë një ritual.
Për një kohë të gjatë, krijimi i marrëdhënieve në vendin e punës është menduar si diçka që ndodh vetëm gjatë orarit të punës, qoftë përmes bisedave në korridor, apo takimeve të tjera rastësore. Por, këto momente spontane të ndërveprimeve njerëzore janë më të vështira për t’u rikrijuar në një mjedis pune në distancë ose hibrid.
Shasta Nelson, një eksperte e miqësisë, thotë se “miqësitë nuk formohen rastësisht”. Në librin e saj The Business of Friendship, ajo shpjegon se miqësitë kanë nevojë për tre gjëra që të krijohen: pozitivitet, në mënyrë që të ndihemi të kënaqur; vulnerabilitet, që të ndihemi të sigurt; dhe qëndrueshmëri.
Kurdo që të jetë e mundur, krijoni rituale të qëndrueshme që mundësojnë formimin e marrëdhënieve me kolegët. Për shembull, ҫdo të hënë, punonjësit mund ta fillojnë javën duke treguar diçka për të cilën janë mirënjohës. Ose, të premteve, punonjësit mund t’u tregojnë kolegëve historitë e tyre personale. Në këtë mënyrë, ndarja e historive nxit kuriozitetin dhe empatinë, si dhe rrit ndjesinë e përkatësisë.
- Bëjeni më të lehtë që të kërkohet ndihmë.
Sipas psikologes sociale Heidi Grant, 75% deri në 90% e të gjithë ndihmës që kolegët i japin njëri-tjetrit fillon me një kërkesë. Kompanitë mund të krijojnë diҫka të ngjashme me atë që psikologu i ҫështjeve organizative Adam Grant e quan një unazë reciprociteti. Kolegët mund të mblidhen së bashku online, në mënyrë periodike dhe të gjithë mund të ndajnë një problem me të cilin kanë vështirësi. Pjesa tjetër e grupit ofron ide, kontakte dhe burime për ta ndihmuar kolegun e tyre në zgjidhjen e problemit.
Krijimi i unazave të reciprocitetit ndihmon në formimin e një mënyre të qëndrueshme dhe të strukturuar për të kërkuar ndihmë. Kur punonjësit investohen në rritjen personale të njëri-tjetrit, formohet një kulturë ku mund të krijohen miqësi.
- Bëjeni më të lehtë përshtatjen e kolegëve të rinj.
Momenti kur një koleg i ri fillon punë është mundësia e parë kritike për të lehtësuar krijimin e miqësive në punë. Që nga pandemia, miliona njerëz kanë filluar punë të reja, por nuk kanë takuar kurrë ndonjë nga kolegët e tyre personalisht. Sidomos për punonjësit që sapo fillojnë karrierën e tyre, kjo mund të jetë tepër sfiduese.
- Jepini përparësi mirëqenies së punonjësve.
Në vazhdën e një pandemie që ka thelluar epideminë e vetmisë dhe të shkëputjeve, ne duhet të udhëhiqemi nga empatia dhe të kujdesemi më mirë për njëri-tjetrin.
Në mënyrë që lidhjet njerëzore dhe miqësitë të mund të krijohen, duhet ta marrim më seriozisht shëndetin e punonjësve. Kjo mund të fillojë duke ofruar politika më bujare të pushimeve familjare, të përkujdesit për fëmijët dhe për të moshuarit, aksesin në shërbimet e shëndetit mendor, orët e pushimit në punë, në mënyrë që punonjësit të mund të marrin veten duke kaluar më shumë kohë me familjen dhe me miqtë e tyre.
Sipas Cigna, punonjësit janë shtatë pikë më pak të vetmuar kur kanë një ekuilibër të mirë mes punës dhe jetës. Në botën e sotme të vetmuar, krijimi i lidhjeve njerëzore është përgjegjësia e të gjithëve. Ajo është një pjesë thelbësore e ndërtimit të një ambienti të shkëlqyer pune dhe të një shoqërie më të qëndrueshme. / Harvard Business Review