Si të menaxhoni një shef “të pamundur”

13/11/2019 1:45 PM 0 komente
TEMA TE NGJASHME:

Paga shumë e ulët? Klima e kompanisë? Kriza në kompani? Mërzitje, pasi prej kohësh bëni të njëjtën gjë? Jo, asnjë prej tyre nuk është shkaku kryesor se pse ndryshoni kompani.

Arsyeja e parë për të cilën dikush ndryshon punë është një shef i pamundur, me të cilin nuk arrini të komunikoni, që jua bën jetën të vështirë dhe ju fut ankthin madje edhe përpara se të hyni në zyrë.

Ekzistojnë tre mënyra për të menaxhuar situatë: duke e duruar në mënyrë pasive (kjo është zgjidhja më e keqe, rreziku për t’u sëmurë psikologjikisht dhe fizikisht, me simptoma psikosomatike, është vërtet shumë i lartë); kërkoni menjëherë një punë të re (edhe pse ju vjen keq, pasi jeni shumë i lidhur me kompaninë); përpiqeni të përmirësoni marrëdhënien me një shef të vështirë.

Më poshtë janë 7 këshilla për të menaxhuar një shef “të pamundur”

-Përpiquni të kuptoni nëse keni të bëni me të vërtetë me një shef të keq apo nëse jeni shumë i ashpër me të, mbase sepse, thellë-thellë, do të kishit dashur të ishit ju në vend të tij, por kompania zgjodhi atë, duke ju zhgënjyer.

-Vihuni në vendin e shefit tuaj dhe kuptoni këndvështrimin e tij: a është vërtet një shef i keq, apo është thjesht nën presion për rezultatet që duhet të arrijë dhe nuk e kupton se marrëdhëniet e tij të drejtpërdrejta e mbështesin. Ndonjëherë, veçanërisht nëse kanë qenë për një kohë të gjatë në kompani, njerëzit kanë tendencën të kujtojnë me nostalgji drejtuesin e mëparshëm, duke kujtuar vetëm anët pozitive e jo defektet e tij, ndërkohë tek shefi aktual, shohin vetëm defektet e tij.

-Ndoshta shefi ju streson, por roli juaj në kompani vazhdon, në mënyrë të pavarur prej tij. Nëse ecuria juaj s’mund të kritikohet kurrsesi, nëse nuk rrëzoheni, pavarësisht karakterit të tij, drejtuesit e kompanisë gjithsesi do ta vlerësojnë atë që bëni dhe kjo do të forcojë peshën tuaj. Shefat e pamundur, ndonjëherë, nuk zgjasin shumë, mjafton të rezistoni për një ose dy vjet…

-Keni një shef që bën mikromenaxherin dhe kontrollon kohëzgjatjen e pushimit të drekës e çdo pushimi tjetër, çdo rresht të raportit që shkruani e se si e menaxhoni çdo zë në buxhetin që ju është besuar. Keni të drejtë, keni një drejtues pak strategjik i cili nuk di të delegojë. Ne ju këshillojmë që ta qetësoni nga mania e tij e kontrollit, të paktën gjatë vitit të parë. Do të shihni që pak nga pak, do t’ju besojë gjithnjë e më shumë dhe gjërat do të shkojnë më mirë.

-Vini pikat mbi ‘i’. Duhet ta bëni të kuptojë qartë, me mirësjellje, por edhe me autoritet, që nuk ia keni për borxh të vuani vrazhdësinë e tij; ka njerëz që “marrin zjarr” menjëherë, pasi nuk janë të aftë të menaxhojnë emocionet dhe impulset. Ju nuk duhet të reagoni në momentin e konfliktit, por në ditën tjetër, duke i thënë: “A nuk ju duket pak i ekzagjeruar dje reagimi juaj”. Kjo do ta bëjë të reflektojë dhe se ka një kufi të pakapërcyeshëm, ai i mirësjelljes dhe respektit.

-Kënaqeni në kërkesat e tij. Çdo shef ka manitë e tij, ka nga ata që kanë fiksim tryezat e rregullta, përpikërinë, respektimin e pushimit të drekës, ka nga ata që nuk e pëlqejnë smartwork për shkak të ankthit për të kontrolluar. Ju duhet të ndani me të, të njëjtën filozofi pune.

-Duhet të kuptoni nëse keni të bëni me një shef të vështirë apo me një person që ka nevojë për kujdes psikologjik. Në këtë rast, veçanërisht nëse punoni në një grup të madh, këshillohet që të flisni me përfaqësuesit e Burimeve Njerëzore dhe të ndani këndvështrimin tuaj, për t’u transferuar në një tjetër departament.

Burimi: Forbes

Komente

avatar
  Subscribe  
Notify of