Sot nis vaksinimi për punonjësit e transportit; Operatorët: Vendimi pozitiv, por nuk do rrisë frekuentimin e pasagjerëve

25/05/2021 11:00 PM 0 komente

Kriza nga Covid-19 ka vendosur në vështirësi sektorin e transportit.

Në Tiranë operatorët e transportit pohojnë se fluksi i pasagjerëve në linjat urbane për muajin maj është ulur 50% krahasuar me periudhën para pandemisë.

Për t’i ardhur në ndihmë sektorit, në 26 maj, në orën 10:00 të mëngjesit në çadrat e vaksinimit të ngritura në sheshin “Skënderbej” nis vaksinimi i punonjësve të sektorit të transportit të pasagjerëve dhe mallrave. Koordinatorë të fushatës të vaksinimit “Shqipëria buzëqesh” thanë se për punonjësit e transportit do të përdoret vaksina ruse “Sputnik V”.

Sipas të dhënave të INSTAT në 2018 transporti, informacioni dhe komunikacioni gjeneron vende pune për 38 mijë persona, nga të cilat 14 mijë janë vetëm në transport, që pas nisjes të punës më 6 korrik 2020 ka qenë me rënie të frekuentimit të pasagjereve 50 deri 60% që arriti në periudhën e festave të fundvitit.

Kompanitë e transportit të pasagjerëve e mirëpresin vendimin për nisjen e vaksinimit, por pohojnë se është i vonuar. “Vendimi për vaksinimin e punonjësve të transportit vjen pas kërkesave të shumta që operatorët i kanë dërguar qeverisë. Nisja e vaksinimit është pozitiv, por kjo kategori punonjësish duhet të ishte vendosur në kategoritë prioritare të vaksinimit. Nëse shoferët dhe faturinot e autobusëve do të ishin vaksinuar menjëherë pas vaksinimit të mjekëve dhe infermierëve, do të rritej siguria te pasagjerët për të udhëtuar dhe nuk do sillte rënie të frekuentimit në nivelet aktuale që është 50%”, thekson për Monitor drejtori i transportit urban për linjat Kombinat-Kinostudio-Tufinë në kompaninë “Shega Trans”.

Edhe drejtori i transportit urban të linjave të Tiranës së Re dhe Uzinës të Autotraktorëve në kompaninë “Alba Trans”, Rixhin Qoshja thekson se vaksinimi nuk do të ndikojë te shtimi i frekuentimit në autobusë. “Frika nga infektimi është zbehur dhe kjo vihet re te pasagjerët që shumica e tyre nuk mbajnë maska në autobus apo nuk ruajnë distancën. Nëse vaksinimi do të ishte nisur që me vaksinimin e mjekëve, pasagjerëve do t’u krijohej më shumë besim dhe do të ndikonte te frekuentimi. Aktualisht shumica e njerëzve kanë zgjedhur alternativa të tjera udhëtimi, si: mjetet skuter që po qarkullojnë më së shumti në Tiranë apo autobusët e vënë në dispozicion nga ndërmarrjet ku punojnë”.

Me ardhjen e stinës të verës operatorët parashikojnë rënie të frekuentimit të pasagjerëve në linjat urbane për shkak të largimit të kryeqytetasve drejt zonave bregdetare. Transporti urban ishte ndër të fundit sektorë të ekonomisë që u hap pas periudhës të karantinës. Aktiviteti i rinisur më 6 korrik 2020 ishte me rënie 70% për shkak të frikës të pasagjerëve nga frekuentimi. Rënia e frekuentimit vazhdoi edhe në periudhën e festave të fundvitit.

Sakaq sipas të dhënave të Ministrisë të Shëndetësisë ka vijuar vaksinimi masiv me kalendar të kombinuar, për personat mbi 60 vjeç dhe punonjës të shërbimeve kritike.

Në 24 orët e fundit janë kryer 8,519 vaksinime dhe prej fillimit të vaksinimit janë kryer në total 725,135 doza të vaksinës ndaj Covid-19. Prej tyre 249,898 qytetarë i kanë marrë të dyja dozat e vaksinës. / D.Azo

Komente

avatar
  Subscribe  
Notify of