“Sunac Guangzhou Grand Theatre”, teatri kinez që ngjan i mbuluar me mëndafsh

30/12/2020 11:11 AM 0 komente

Panelet e ‘Sunac Guangzhou Grand Theatre’ janë vendosur në mënyrë të tillë që të krijojnë një efekt të valëzuar, i cili të sjell ndër mend palosjen e mëndafshit. Projekti mban firmën e studios ‘Steven Chilton Architects’

 

Një pëlhurë e kuqe prej mëndafshi, e zbukuruar me vizatime zogjsh të artë, duket se mbështjell teatrin e ri, ‘Sunac Guangzhou Grand Theatre’, në Kinë. Projekti, me një ndikim të madh, mban firmën e studios ‘Steven Chilton Architects’, e cila dëshironte t’i bënte homazh artit të mëndafshit.

Pjesa e jashtme e ndërtesës përbëhet nga panele të vendosura në një mënyrë të tillë që të krijojnë një efekt të valëzuar, i cli të sjell ndër mend palosjen e pëlhurës së çmuar. Porti tregtar i Guangzhou ka luajtur një rol kyç në tregtinë e mëndafshit dhe konsiderohet vendi ku lindi rruga detare e mëndafshit (një nga rrugët lidhëse midis Lindjes dhe Perëndimit), shpjegoi për revistën e arkitekturës ‘Dezeen’, Steven Chilton, themeluesi i ‘Steven Chilton Architects’.

“Ne u frymëzuam nga artet tradicionale dhe bashkëkohore që praktikohen zakonisht në rajon. Pëlhura e mëndafshit është prodhuar, pikturuar dhe qëndisur në qytet që nga dinastia Han” – shtoi Chilton. Përveç traditës së tekstilit, projekti arkitektonik të sjell ndër mend artin e tatuazheve – në mbulesën e kuqe dallohen vizatime të arta, në veçanti zogj, stili i të cilave pasqyron atë të tatuazheve kineze.

“Kultura e tatuazheve kohët e fundit ka marrë rëndësi si një mjet artistik i respektuar, e cila udhëhiqet nga një brez i ri që e përqafon atë si një shprehje e individualitetit”, – shpjegoi themeluesi i ‘Steven Chilton Architects’. Në qendër të ndërtesës ka një auditor rrethor, me 360 ekrane LED dhe një skenë e vendosur mbi një pishinë, e thellë nëntë metra.

Teatri, në fakt, është krijuar për të pritur edhe shfaqje në ujë. Ai do të hapet në vitin 2021 dhe do të mirëpresë dy mijë spektatorë.

Komente

avatar
  Subscribe  
Notify of